رسولاں دے اعمال 23:1-35
23 پولُس نے وڈی عدالت دے ممبراں وَل ویکھیا تے کہیا: ”بھراوو، مَیں اَج تک خدا دے حضور بالکل صاف ضمیر نال زندگی گزاری اے۔“
2 ایہہ سُن کے اعلیٰ کاہن حننیاہ نے پولُس دے کول کھلوتے بندیاں نُوں حکم دِتا کہ اوہ اوہدے مُونہہ تے چنڈ مارن۔
3 فیر پولُس نے اوہنوں کہیا: ”اوئے پاکھنڈی،* خدا تینوں مارے گا۔ اِک پاسے تُوں شریعت دے مطابق میرے بارے فیصلہ کرن لئی بیٹھا ایں تے دُوجے پاسے مینوں مارن دا حکم دے کے اوسے شریعت دے خلاف جا رہیا ایں!“
4 اوتھے کھلوتے لوکاں نے اوہنوں کہیا: ”تیری اینی جرأت کہ تُوں خدا دے اعلیٰ کاہن دی بےعزتی کریں!“
5 فیر پولُس نے کہیا: ”بھراوو، مینوں نئیں پتہ سی کہ ایہہ اعلیٰ کاہن اے۔ مینوں یاد اے کہ پاک کلام چ لکھیا اے کہ ”اپنی قوم دے کسے حاکم نُوں بُرا بھلا نہ کہوو۔““
6 پولُس جان دا سی کہ وڈی عدالت دے کجھ ممبر صدوقی نیں تے کجھ فریسی نیں۔ ایس لئی اوہنے اُچی آواز چ کہیا: ”بھراوو، مَیں اِک فریسی آں تے فریسیاں دا پُتر آں۔ میرے تے مُقدمہ ایس لئی چلایا جا رہیا اے کیونکہ مَیں ایمان رکھنا واں کہ مُردے زندہ ہون گے۔“
7 اوہدی ایہہ گل سُن کے فریسیاں تے صدوقیاں دا آپس چ جھگڑا ہو گیا تے اوہناں چ پُھٹ پے گئی
8 کیونکہ صدوقی کہندے نیں کہ مُردے زندہ نئیں ہون گے تے اوہ فرشتیاں تے اسمانی ہستیاں تے وی یقین نئیں کردے۔ پر فریسی ایہناں ساریاں گلاں نُوں من دے نیں۔
9 ایس لئی بڑا ہنگامہ شروع ہو گیا۔ فریسیاں وچوں کجھ شریعت دے عالم کھلو گئے تے غصے چ آ کے بحث کرن لگ پئے۔ اوہناں نے کہیا: ”ساڈی نظر چ ایہہ بندہ بےقصور اے۔ کیہہ پتہ کسے اسمانی ہستی یاں فرشتے نے ایہدے نال گل کیتی ہوئے۔“
10 جدوں جھگڑا بوہت زیادہ ودھ گیا تے فوجی کمانڈر نُوں ڈر سی کہ کِتے اوہ پولُس دے ٹوٹے ٹوٹے نہ کر دین۔ ایس لئی اوہنے فوجیاں نُوں حکم دِتا کہ اوہ پولُس نُوں اوہناں چوں کڈھ کے فوجیاں دے قلعے چ لے جان۔
11 اوسے رات مالک نے پولُس کول آ کے کہیا: ”حوصلہ رکھ، جیویں تُوں یروشلم چ میرے بارے چنگی طرحاں گواہی دِتی اے اوسے طرحاں تُوں روم چ وی گواہی دینی اے۔“
12 فیر جدوں دن چڑھیا تے یہودیاں نے پولُس دے خلاف سازش گھڑی تے قسم کھادی کہ اوہ اوہدوں تک کجھ وی نئیں کھان پین گے جدوں تک اوہ پولُس نُوں مار نئیں دیندے تے جے اوہناں نے ایہہ قسم پوری نہ کیتی تے اوہناں اُتے خدا دی لعنت ہوئے۔
13 ایہہ قسم 40 توں زیادہ آدمیاں نے کھادی سی۔
14 اوہناں نے وڈے کاہناں تے بزرگاں کول جا کے کہیا: ”اَسی قسم کھادی اے کہ اَسی اوہدوں تک کجھ وی نئیں کھانواں گے جدوں تک اَسی پولُس نُوں مار نئیں دیندے تے جے اَسی ایہہ قسم پوری نہ کیتی تے ساڈے اُتے خدا دی لعنت ہوئے۔
15 ایس لئی تُسی وڈی عدالت نال مِل کے فوجی کمانڈر نُوں کہوو کہ اوہ پولُس نُوں تواڈے کول لیائے کیونکہ تُسی اوہدے کولوں ہور پچھ گچھ کرنا چاہندے او۔ پر اوہدے ایتھے پونچن توں پہلاں ای اَسی اوہنوں مارن لئی راہ چ تیار بیٹھے ہوواں گے۔“
16 پر پولُس دی بھین دے پُتر نُوں پتہ چل گیا کہ یہودی پولُس تے حملہ کرن دی سازش کر رہے نیں۔ ایس لئی اوہ فوجیاں دے قلعے چ گیا تے پولُس نُوں ساری گل دَس دِتی۔
17 فیر پولُس نے اِک فوجی افسر نُوں کول بلا کے کہیا: ”ایہہ مُنڈا فوجی کمانڈر نُوں کجھ دَسنا چاہندا اے۔ ایہنوں اوہدے کول لے جاؤ۔“
18 افسر اوہنوں کمانڈر کول لے گیا تے کہیا: ”پولُس ناں دے قیدی نے مینوں درخاست کیتی اے کہ مَیں ایس مُنڈے نُوں تواڈے کول لیاواں کیونکہ ایہہ توانوں کجھ دَسنا چاہندا اے۔“
19 فوجی کمانڈر اوس مُنڈے دا ہتھ پھڑ کے اوہنوں اِک پاسے لے گیا تے کہیا: ”دَس کیہہ گل اے؟“
20 اوہنے کہیا: ”یہودیاں نے منصوبہ بنایا اے کہ اوہ تواڈے کولوں درخاست کرن گے کہ تُسی کل پولُس نُوں وڈی عدالت چ لے جاؤ تاکہ اوہ اوہدے معاملے بارے ہور جان سکن۔ پر ایہہ بس اِک بہانہ اے۔
21 تُسی اوہناں دی گل نہ مننا کیونکہ اوہناں دے 40 توں وی زیادہ بندے پولُس تے حملہ کرن لئی راہ چ بیٹھے ہون گے۔ اوہناں نے قسم کھادی اے کہ جے اوہ پولُس نُوں مارن توں پہلاں کجھ کھان پین تے اوہناں تے لعنت ہوئے۔ اوہ ایس اِنتظار چ بیٹھے نیں کہ تُسی اوہناں دی گل من لوو۔“
22 کمانڈر نے اوس مُنڈے نُوں ایہہ حکم دے کے بھیج دِتا: ”کسے نُوں نہ دَسیں کہ تُوں مینوں ایہہ خبر دِتی اے۔“
23 ایہدے بعد اوہنے دو فوجی افسراں نُوں بلا کے کہیا: ”اپنے نال 200 فوجی، 70 گُھڑ سوار تے 200 نیزہ باز لے کے رات دے تقریباً 9 وجے* سِدھا قیصریہ چلے جاؤ۔
24 نالے پولُس لئی وی گھوڑے تیار کرو تے اوہنوں صحی سلامت حاکم فیلکس کول لے جاؤ۔“
25 اوہنے نال اِک خط وی گھلیا جدے چ لکھیا سی:
26 ”کلودِیُس لُوسیاس وَلّوں جناب حاکم فیلکس دے ناں خط: سلام!
27 یہودیاں نے ایس بندے نُوں پھڑیا ہویا سی تے ایہنوں جانوں مارن والے سن۔ پر جیویں ای مینوں پتہ چلیا کہ ایہہ بندہ رومی شہری اے تے مَیں چھیتی نال اپنے فوجی لے کے اوتھے پونچ گیا تے ایہنوں بچا لیا۔
28 مَیں جاننا چاہنا ساں کہ اوہ ایس بندے تے کیہہ اِلزام لا رہے نیں۔ ایس لئی مَیں ایہنوں اوہناں دی وڈی عدالت دے سامنے پیش کیتا۔
29 مَیں ویکھیا کہ اوہ ایہدے تے جیہڑا اِلزام لا رہے نیں، اوہدا تعلق اوہناں دی شریعت نال اے۔ پر اوہ کوئی ایہو جیہا ثبوت نئیں دے سکے جدی وجہ توں ایہنوں موت یاں قید دی سزا دِتی جائے۔
30 پر مینوں خبر ملی سی کہ ایہنوں مارن دی سازش کیتی جا رہی اے۔ ایس لئی مَیں فوراً ایہنوں تواڈے کول گھل رہیا واں۔ نالے مَیں ایہدے تے اِلزام لان والیاں نُوں حکم دِتا اے کہ اوہ تواڈے سامنے آ کے اپنا معاملہ پیش کرن۔“
31 ایس لئی کمانڈر دے حکم دے مطابق فوجی پولُس نُوں لے کے راتوںرات انتیپترس آ گئے۔
32 اگلے دن اوہناں نے پولُس نُوں گُھڑسواراں نال اَگے گھل دِتا تے آپ فوجیاں دے قلعے چ واپس آ گئے۔
33 گُھڑسواراں نے قیصریہ پونچ کے حاکم نُوں فوجی کمانڈر دا خط دے دِتا۔ نالے پولُس نُوں وی اوہدے اَگے پیش کیتا۔
34 خط پڑھن دے بعد حاکم نے پچھیا کہ پولُس کیس صوبے توں اے تے اوہنوں دَسیا گیا کہ اوہ کِلکیہ توں اے۔
35 حاکم نے اوہنوں کہیا: ”جدوں تیرے تے اِلزام لان والے لوک ایتھے آن گے، اوہدوں مَیں تینوں صفائی پیش کرن دا موقع ضرور دَواں گا۔“ فیر اوہنے حکم دِتا کہ پولُس نُوں ہیرودیس دے محل وچ پہرے چ رکھیا جائے۔
