رسولاں دے اعمال 2:1-47
2 پنتِکُست دی عید دے دن سارے شاگرد اِک جگہ جمع ہوئے۔
2 فیر اچانک اوہناں نُوں اسمانوں اِک آواز سُنائی دِتی جیہڑی اِک تیز نھیری دی آواز ورگی سی تے اوہدے نال اوہ سارا گھر گُونج اُٹھیا جِتھے اوہ بیٹھے ہوئے سن۔
3 نالے اوہناں نُوں اَگ دے شعلے ورگیاں زباناں نظر آئیاں۔ ایہہ شعلے الگ الگ ہو گئے تے اِک اِک شعلہ اوہناں وچوں ہر اِک دے سِر اُتے آ کے ٹھہر گیا۔
4 اوہ سارے پاک روح نال بھر گئے تے فرق فرق زباناں بولن لگ پئے کیونکہ پاک روح نے اوہناں نُوں ایس قابل بنایا سی۔
5 اوس ویلے دُنیابھر چوں خدا نُوں پیار کرن والے یہودی یروشلم آئے ہوئے سن۔
6 جدوں اوہ آواز سُنائی دِتی تے بوہت سارے لوک کٹھے ہو گئے تے بڑے حیران ہوئے کیونکہ شاگرد اوہناں ساریاں دِیاں زباناں بول رہے سن۔
7 اوہ حیران ہو کے کہن لگ پئے: ”ویکھو، ایہہ سارے لوک تے گلیلی نیں
8 تے فیر ایہہ ساڈے وچوں ہر اِک دی ماں بولی چ گل کیویں کر رہے نیں؟
9 ایتھے پارتھی، مادی تے عیلامی لوک نیں۔ کجھ لوک مسوپتامیہ، یہودیہ، کپدُکیہ، پُنطُس، صوبہ آسیہ،
10 فروگیہ، پمفیلیہ تے مصر توں نیں تے کجھ کُرینے دے نیڑے لیبیا دے علاقیاں چوں نیں تے کجھ روم توں آئے نیں۔ ساڈے چوں کجھ پیدائشی یہودی نیں تے کجھ نے یہودی مذہب اپنا لیا اے۔
11 ایتھے کجھ لوک کرِیٹ توں وی نیں تے کجھ عرب توں۔ پر اَسی اپنی اپنی زبان چ خدا دے شاندار کماں بارے سُن رہے آں۔“
12 اوہ سارے حیران تے پریشان ہو گئے تے اِک دُوجے نُوں کہن لگ پئے: ”ایہہ کیہہ ہو رہیا اے؟“
13 پر کجھ لوک شاگرداں دا مذاق اُڈان لگ پئے تے کہن لگ پئے: ”ایہہ تے مے دے نشے چ نیں۔“
14 پر پطرس نے 11 رسولاں دے نال کھلو کے اُچی آواز چ کہیا: ”یہودیہ دے لوکو تے یروشلم دے رہن والیو، میری گل دھیان نال سُنو۔
15 ایہہ لوک نشے چ نئیں نیں جیویں کہ تُسی سوچ رہے او کیونکہ حالے تے سویر دے صرف 9 ای وجے* نیں۔
16 اصل چ جو کجھ وی ہو رہیا اے، اوہ یُوایل نبی دی ایس پیشینگوئی دے مطابق ہو رہیا اے:
17 ”خدا نے کہیا اے: ”آخری زمانے چ مَیں اپنی روح ہر طرحاں دے لوکاں تے نازل کراں گا تے تواڈے پُتر تے دِھیاں پیشینگوئیاں کرن گے تے تواڈے جوان بندے رُویا ویکھن گے تے تواڈے وڈیرے بندے خواب ویکھن گے۔
18 اوس زمانے چ مَیں اپنے بندے تے بندِیاں اُتے وی اپنی روح نازل کراں گا تے اوہ پیشینگوئیاں کرن گے۔
19 مَیں اسمان تے حیران کرن والے کم کراں گا تے زمین تے نشانیاں وکھاواں گا یعنی دھوئیں دے بدّل، خون تے اَگ۔
20 یہوواہ دا خاص تے شاندار دن آن توں پہلاں سورج تے نھیرا چھا جائے گا تے چن خون وانگوں لال ہو جائے گا۔
21 پر جیہڑا وی یہوواہ دا ناں لیندا اے، اوہ نجات پائے گا۔““
22 اِسرائیل دے لوکو، میری ایہہ گل سُنو: یسوع ناصری نُوں خدا نے گھلیا سی تے ایس گل دا ثبوت دین لئی خدا نے اوہدے ذریعے معجزے تے حیران کرن والے کم کیتے تے نشانیاں وکھائیاں جیویں کہ تُسی جان دے او۔
23 اوہنوں خدا دی مرضی تے ارادے دے مطابق تواڈے حوالے کیتا گیا تے تُسی اوہنوں بھیڑے لوکاں دے ہتھوں سُولی چڑھا کے مار دِتا۔
24 پر خدا نے اوہنوں زندہ کر کے موت دِیاں بیڑیاں توں آزاد کیتا کیونکہ موت لئی اوہنوں اپنے قبضے چ رکھنا ممکن نئیں سی۔
25 ہاں، داؤد نے وی اوہدے بارے کہیا: ”مَیں یہوواہ نُوں ہمیشاں ویکھدا رہنا واں۔ اوہ میرے سجے ہتھ اے، ایس لئی مَیں کدی وی نئیں ڈولاں گا۔
26 ایسے وجہ توں میرا دل باغ باغ اے تے میری زبان تے خوشی دے بول نیں۔ مَیں اپنی امید تے قائم رہواں گا
27 کیونکہ تُوں مینوں قبر چ نئیں رہن دَویں گا تے اپنے وفادار خادم دے جسم نُوں گلن سڑن نئیں دَویں گا۔
28 تُوں مینوں زندگی دی راہ وکھائی اے۔ تیرے حضور میرا دل خوشی نال بھر جائے گا۔“
29 بھراوو، مَیں ساڈے خاندان دے سربراہ داؤد بارے ایہہ گل کُھل کے کہہ سکنا واں کہ اوہ مریا تے اوہنوں دفنایا گیا تے اوہدی قبر اَج تک ایس شہر دے وچ اے۔
30 اوہ اِک نبی سی تے اوہنوں پتہ سی کہ خدا نے قسم کھا کے اوہدے نال وعدہ کیتا اے کہ اوہدا اِک پُتر* اوہدے تخت تے بیٹھے گا۔
31 ایس لئی داؤد پہلاں توں ای جان دا سی کہ مسیح نُوں مُردیاں وچوں زندہ کیتا جائے گا تے اوہنے دَسیا سی کہ خدا مسیح نُوں قبر چ نئیں چھڈے گا تے اوہدے جسم نُوں گلن سڑن نئیں دَوے گا۔
32 خدا نے واقعی یسوع نُوں زندہ کیتا تے اَسی سارے ایس گل دے گواہ واں۔
33 ایس لئی اوہنوں خدا دے سجے ہتھ بیہن دا مان بخشیا گیا تے اوہنوں اوہ پاک روح ملی جدا باپ نے وعدہ کیتا سی۔ ایسے لئی اوہنے ساڈے تے وی پاک روح نازل کیتی جیویں کہ ہُن تُسی ویکھ تے سُن رہے او۔
34 داؤد تے اسمان تے نئیں گیا، پر اوہنے آپ کہیا: ”یہوواہ نے میرے مالک نُوں کہیا: ”تُوں اوہدوں تک میرے سجے ہتھ بہہ
35 جدوں تک مَیں تیرے دُشمناں نُوں تیرے پیراں دی چونکی نہ بنا دَواں۔““
36 ایس لئی اِسرائیل دا سارا گھرانا ایس گل نُوں چنگی طرحاں جان لوے کہ جیس یسوع نُوں تُسی سُولی چڑھایا سی، اوسے یسوع نُوں خدا نے مالک تے مسیح بنایا اے۔“
37 ایہناں ساریاں گلاں دا اوہناں دے دِلاں تے بڑا گُوڑھا اثر ہویا تے اوہناں نے پطرس تے باقی رسولاں نُوں پچھیا: ”بھراوو، سانوں دَسو کہ اَسی کیہہ کریئے؟“
38 پطرس نے اوہناں نُوں کہیا: ”تُسی سارے توبہ کرو تے اپنے گُناہواں دی معافی لئی یسوع مسیح دے ناں تے بپتسمہ لوو تاکہ توانوں پاک روح دی نعمت ملے
39 کیونکہ ایس نعمت دا وعدہ تواڈے نال، تواڈی اولاد نال تے اوہناں سارے لوکاں نال کیتا گیا اے جیہڑے دُور نیں۔ ہاں، اوہناں ساریاں نال جنہاں نُوں یہوواہ ساڈا خدا چُنے گا۔“*
40 پطرس نے ہور وی بوہت ساریاں گلاں کہیاں تے چنگی طرحاں گواہی دِتی۔ اوہنے وار وار اوہناں نُوں نصیحت کیتی تے کہیا: ”ایس وِگڑی ہوئی پُشت توں دُور رہوو تاکہ تُسی نجات پا سکو۔“
41 جیہڑے لوکاں نے ایس پیغام نُوں خوشی نال قبول کیتا، اوہناں نے بپتسمہ لے لیا تے اوس دن تقریباً 3 ہزار لوک شاگرداں چ شامل ہو گئے۔
42 اوہ رسولاں کولوں تلیم پان، اِک دُوجے نال جمع ہون، مِل کے کھانا کھان تے دُعا کرن چ لگے رہے۔
43 رسولاں نے بوہت سارے حیران کرن والے کم کیتے تے نشانیاں وکھائیاں تے جنہاں نے وی ایہہ سب کجھ ویکھیا اوہناں دے دل چ خدا دا خوف بہہ گیا۔
44 سارے نویں شاگرد آپس چ جمع ہوندے سن تے اپنیاں چیزاں رَل مِل کے استمال کردے سن۔
45 اوہ اپنیاں چیزاں تے جائیداد ویچ کے پیسیاں نُوں ہر اِک دی ضرورت مطابق وَنڈ دیندے سن۔
46 اوہ ہر روز اِک دل ہو کے ہیکل چ کٹھے ہوندے سن، کھانا کھان لئی اِک دُوجے دے گھر جاندے سن، بڑی خوشی نال رَل مِل کے کھاندے پیندے سن تے ایہہ سب کجھ سچے دل نال کردے سن۔
47 اوہ خدا دی وڈیائی کردے سن تے سارے لوک اوہناں نُوں پسند کردے سن۔ ایس دوران یہوواہ دی برکت نال ہور وی لوکاں نُوں نجات پان دا موقع ملیا کیونکہ ہر روز نویں شاگرد بن رہے سن۔
فٹ نوٹ
^ یونانی چ: ”تیجا گھنٹہ۔“
^ یونانی چ: ”اوہدی نسل چوں اِک جناں۔“
^ یاں، ”اپنے کول بلائے گا۔“
