رسولاں دے اعمال 14:1-28
14 اِکُنیُم چ آ کے پولُس تے برنباس یہودیاں دی عبادتگاہ چ گئے۔ اوتھے اوہناں نے اینے ودھیا طریقے نال تلیم دِتی کہ بوہت سارے یہودی تے یونانی* ایمان لے آئے۔
2 پر جیہڑے یہودی ایمان نئیں لیائے سن، اوہناں نے غیریہودی لوکاں نُوں بھڑکایا تے اوہناں دے دِلاں چ بھراواں دے خلاف زہر بھر دِتا۔
3 ایس لئی اوہ دونویں کافی عرصے تک اوتھے رہے تے اوہناں نے یہوواہ دی طاقت* دے ذریعے دلیری نال تلیم دِتی۔ خدا نے اوہناں دے ذریعے نشانیاں وکھا کے تے حیران کرن والے کم کر کے ایس گل دا ثبوت دِتا کہ اوہ اوہدی عظیم رحمت دا پیغام سُنا رہے نیں۔
4 پر شہر دے لوکاں چ پُھٹ پے گئی۔ کجھ یہودیاں وَل ہو گئے تے کجھ رسولاں وَل۔
5 فیر غیریہودیاں، یہودیاں تے اوہناں دے حاکماں* نے رسولاں نُوں بےعزت کرن تے پتھراں نال جانوں مارن دا منصوبہ بنایا۔
6 پر اوہناں نُوں ایہدی خبر مِل گئی تے اوہ لکاؤنیہ دے شہراں یعنی لِسترہ، دربے تے اوہناں دے آلے دَوالے دے علاقیاں چ چلے گئے۔
7 اوتھے وی اوہ خوشخبری سُناندے رہے۔
8 لِسترہ چ اِک بندہ سی جیہڑا معذور سی۔ اوہ پیدائشی لنگڑا سی تے کدی وی نئیں ٹُریا سی۔
9 اوہ بہہ کے پولُس دِیاں گلاں سُن رہیا سی۔ جدوں پولُس نے اوہدے وَل ویکھیا تے اوہ سمجھ گیا کہ اوہ بندہ ایمان رکھدا اے* تے اوہنوں یقین اے کہ اوہ ٹھیک ہو سکدا اے۔
10 ایس لئی پولُس نے اُچی آواز چ کہیا: ”اپنے پیراں تے کھلو جا۔“ اوہ بندہ اوسے ویلے اُٹھ کے کھلو گیا تے ٹُرن لگ پیا۔
11 جدوں لوکاں نے پولُس دا ایہہ معجزہ ویکھیا تے اوہ لکاؤنیہ دی زبان چ اُچی اُچی کہن لگ پئے: ”دیوتا انسان بن کے ساڈے کول اُتر آئے نیں!“
12 اوہ برنباس نُوں زیوس دیوتا تے پولُس نُوں ہرمیس دیوتا* کہہ رہے سن کیونکہ اوہ ای زیادہ گلاں کر رہیا سی۔
13 زیوس دیوتا دا مندر شہر دے دروازے کول سی۔ اوس مندر دا پجاری کجھ بیل تے پُھلاں دے ہار* لے کے شہر دے دروازے تے آیا کیونکہ اوہ لوکاں نال مِل کے پولُس تے برنباس دے اَگے قربانیاں چڑھانا چاہندا سی۔
14 جدوں رسولاں یعنی برنباس تے پولُس نے ایہہ سُنیا تے اوہناں نے اپنے کپڑے پاڑے تے چھیتی نال لوکاں چ جا کے اُچی آواز چ کہیا:
15 ”بھراوو، تُسی ایہہ سب کجھ کیوں کر رہے او؟ اَسی وی تواڈے وانگوں عام انسان آں۔ اَسی توانوں خوشخبری ایس لئی سُنا رہے آں تاکہ تُسی ایہناں فضول چیزاں نُوں چھڈ کے اوس زندہ خدا وَل مُڑو جنہے اسمان، زمین، سمندر تے ایہناں چ ساریاں چیزاں بنائیاں نیں۔
16 پرانے زمانے چ خدا نے ساریاں قوماں نُوں اپنی منمرضی کرن دِتی۔
17 پر فیر وی اوہ تواڈے نال بھلائی کردا رہیا۔ اِنج اوہنے ثابت کیتا کہ اوہ کیہو جیہا خدا اے۔ اوہنے تواڈے لئی اسمانوں بارش ورسائی تے توانوں ہر موسم چ چنگی فصل دِتی۔ اوہنے توانوں کھان پین دِیاں چیزاں دِتیاں تے تواڈے دِلاں نُوں خوشی نال بھریا۔“
18 ایہہ ساریاں گلاں کہن دے باوجود اوہناں نے لوکاں نُوں اپنے اَگے قربانیاں چڑھان توں بڑی مشکل نال روکیا۔
19 پر انطاکیہ تے اِکُنیُم توں کجھ یہودیاں نے اوتھے آ کے لوکاں نُوں بھڑکایا جدی وجہ توں اوہناں نے پولُس نُوں پتھر مارے۔ اوہناں نُوں لگیا کہ اوہ مر گیا اے، ایس لئی اوہ اوہنوں گھسیٹ کے شہروں باہر لے گئے۔
20 پر جدوں شاگرد پولُس نُوں ویکھن لئی اوہدے کول کٹھے ہوئے تے اوہ اُٹھ کے شہر دے اندر چلا گیا۔ اگلے دن اوہ برنباس نال دربے چلا گیا۔
21 جدوں اوہناں نے اوس شہر چ خوشخبری سُنائی تے بوہت سارے لوک شاگرد بن گئے۔ ایہدے بعد اوہ واپس لِسترہ، اِکُنیُم تے انطاکیہ گئے۔
22 اوتھے اوہناں نے شاگرداں دی ہمت ودھائی تے اوہناں نُوں اپنے ایمان تے قائم رہن دا حوصلہ دِتا تے کہیا: ”خدا دی بادشاہی چ جان لئی سانوں بوہت ساریاں مصیبتاں سہنیاں پین گیاں۔“
23 ایہدے علاوہ اوہناں نے ہر کلیسیا چ کجھ بھراواں نُوں بزرگاں دے طور تے چُنیا۔ اوہناں نے دُعا کرن تے روزہ رکھن دے بعد اوہناں نُوں یہوواہ دے حوالے کر دِتا جدے تے اوہ ایمان لیائے سن۔
24 فیر اوہ پِسدیہ دے علاقے چوں لنگھ کے صوبہ پمفیلیہ پونچے
25 تے شہر پرگہ چ خدا دا کلام سُنان دے بعد اوہ اتلیہ چلے گئے۔
26 اوتھوں اوہ سمندری جہاز چ بیٹھ کے واپس انطاکیہ گئے۔ انطاکیہ چ ای بھراواں نے اوہناں نُوں خدا دی عظیم رحمت دے حوالے کیتا سی تے ہُن اوہناں نے اپنا کم پورا کر لیا سی۔*
27 جدوں اوہ انطاکیہ پونچے تے اوہناں نے ساری کلیسیا نُوں کٹھا کر کے دَسیا کہ خدا نے اوہناں دے ذریعے بوہت سارے کم کیتے تے اوہنے غیریہودی قوماں لئی وی ایمان لیان دی راہ* کھول دِتی اے۔
28 اوہناں نے اوتھے شاگرداں نال کافی وقت گزاریا۔
فٹ نوٹ
^ یعنی یونانی بولن والے غیریہودی لوک۔
^ یاں، ”اِختیار۔“
^ یعنی مذہبی رہنماواں۔
^ یعنی اوہناں گلاں تے ایمان رکھدا اے جیہڑیاں پولُس دَس رہیا سی۔
^ اوس زمانے دے لوک من دے سن کہ ہرمیس مہارت نال گل کرن والا دیوتا اے۔
^ یاں، ”پُھلاں دے تاج۔“
^ ایس ایت چ سُوریہ دے شہر انطاکیہ دی گل ہو رہی اے۔ پولُس ایسے شہر توں اپنے پہلے مشنری دَورے لئی نکلیا سی۔
^ یونانی چ: ”ایمان دا دروازہ۔“
