رسولاں دے اعمال 13:1-52
13 انطاکیہ دی کلیسیا چ ایہہ نبی تے اُستاد خدمت کردے سن: برنباس، شمعون جنہوں نیگر وی کہیا جاندا اے، لُوکیُس جیہڑا کُرینے توں اے، مناہیم جنہے بادشاہ ہیرودیس نال تلیم حاصل کیتی سی تے ساؤل۔
2 اِک دن اوہ روزہ رکھ کے یہوواہ خدا دی عبادت کر رہے سن۔ اوہدوں خدا نے پاک روح دے ذریعے اوہناں نُوں کہیا: ”برنباس تے ساؤل نُوں میرے لئی الگ رکھو کیونکہ مَیں اوہناں نُوں اِک خاص کم لئی چُنیا اے۔“
3 ایس لئی روزہ رکھن تے دُعا کرن دے بعد بھراواں نے برنباس تے ساؤل تے اپنے ہتھ رکھے تے اوہناں نُوں گھل دِتا۔
4 ایس لئی اوہ دونویں پاک روح دی رہنمائی چ سلوکیہ چلے گئے۔ فیر اوتھوں سمندری جہاز تے بیٹھ کے قُبرص ناں دے جزیرے وَل نکل پئے۔
5 جدوں اوہ اوس جزیرے دے شہر سلمیس پونچے تے اوہ یہودیاں دِیاں عبادتگاہواں چ خدا دا کلام سُنان لگ پئے۔ یوحنا* وی اوہناں دی خدمت* کرن لئی اوہناں دے نال سی۔
6 جدوں اوہ اوس پورے جزیرے دا سفر کر کے شہر پافوس تک پونچے تے اوہناں نُوں اِک یہودی بندہ ملیا جدا ناں بریسوع سی۔ اوہ اِک جادوگر تے جھوٹھا نبی سی۔
7 اوہ صوبے دے حاکم سرگِیُس پولُس دے نال سی جیہڑا اِک سمجھدار بندہ سی۔ حاکم نے برنباس تے ساؤل نُوں اپنے کول بلایا کیونکہ اوہنوں خدا دا کلام سُنن دی بڑی خواہش سی۔
8 پر بریسوع اوہناں دونواں دی مخالفت کرن لگ پیا تاکہ سر گِیُس پولُس خدا دے کلام تے ایمان نہ لیائے۔ (بریسوع نُوں اِلیماس وی کہیا جاندا اے جدا مطلب اے جادوگر۔)
9 فیر ساؤل جنہوں پولُس وی کہیا جاندا اے، پاک روح نال بھر گیا۔ اوہنے اوس جادوگر نُوں گھور کے ویکھیا
10 تے کہیا: ”اوئے اِبلیس دے بچے تے نیکی دے دُشمن! تُوں ہر طرحاں دی بُرائی تے دھوکھےبازی نال بھریا ہویا ایں۔ کیہہ تُوں یہوواہ دی سِدھی راہ چ رُکاوٹ پان توں باز نئیں آئیں گا؟
11 ویکھ، یہوواہ دا ہتھ تیرے خلاف اُٹھیا اے۔ تُوں اَنھا ہو جائیں گا تے کجھ عرصے لئی سورج دی روشنی نئیں ویکھیں گا۔“ اوسے ویلے اوہدیاں اَکھاں سامنے گہری دُھند تے نھیرا چھا گیا تے اوہ ایدھر اودھر لوکاں نُوں لبھن لگ پیا تاکہ کوئی اوہدا ہتھ پھڑ کے اوہنوں لے جائے۔
12 صوبے دا حاکم ایہہ سب کجھ ویکھ کے ایمان لے آیا کیونکہ اوہ یہوواہ دی تلیم سُن کے حیران سی۔
13 فیر پولُس تے اوہدے ساتھی سمندری جہاز تے بیٹھ کے پافوس توں نکلے تے صوبہ پمفیلیہ دے شہر پرگہ پونچے۔ پر یوحنا اوہناں دے نال نہ رہیا سگوں واپس یروشلم چلا گیا۔
14 پر پولُس تے برنباس پرگہ توں پِسدیہ دے شہر انطاکیہ آئے تے سبت دے دن یہودیاں دی عبادتگاہ چ جا کے بہہ گئے۔
15 اوتھے ساریاں دے سامنے شریعت تے نبیاں دِیاں کتاباں چوں کجھ حوالے پڑھ کے سُنائے گئے۔ اوہدے بعد عبادتگاہ دے نگہباناں نے پولُس تے برنباس نُوں کہیا: ”بھراوو، جے تُسی لوکاں دا حوصلہ ودھان لئی کجھ کہنا چاہندے او تے ضرور کہوو۔“
16 ایس لئی پولُس اُٹھیا تے اوہنے لوکاں نُوں چپ ہون دا اشارہ کیتا تے کہیا:
”اِسرائیلیو تے خدا توں ڈرن والے دُوجے لوکو، میری گل سُنو۔
17 اِسرائیل دے خدا نے ساڈے پیو دادیاں نُوں چُنیا تے جدوں اوہ مصر چ پردیسیاں وانگوں رہ رہے سن تے خدا نے اوہناں نُوں عزت بخشی تے اپنی بانہہ دے زور نال اوہناں نُوں مصر چوں کڈھ لیایا۔
18 اوہنے اوہناں نُوں ویرانے چ تقریباً 40 سالاں تک صبر نال برداشت کیتا۔
19 فیر اوہنے ملک کنعان چوں سَت قوماں نُوں ختم کیتا تے اِسرائیلی قوم نُوں اوس ملک دا مالک بنایا۔
20 ایہہ سب کجھ تقریباً 450 سالاں دے دوران ہویا۔
ایہدے بعد خدا نے سموئیل نبی دے زمانے تک لوکاں دی رہنمائی کرن لئی ذمےدار آدمی* چُنے۔
21 پر فیر اِسرائیلیاں نے کہیا کہ اوہناں دا اِک بادشاہ ہونا چاہی دا اے۔ ایس لئی خدا نے اوہناں دی منگ مطابق بنیمین دے قبیلے چوں قیس دے پُتر ساؤل نُوں بادشاہ بنایا۔ اوہنے 40 سالاں تک حکومت کیتی۔
22 فیر خدا نے اوہنوں ہٹا کے داؤد نُوں اوہناں دا بادشاہ بنایا جدے بارے اوہنے ایہہ گواہی دِتی: ”مینوں یسی دا پُتر داؤد لبھ گیا اے جدے توں میرا دل خوش اے۔ اوہ سارے کم میری مرضی مطابق کرے گا۔“
23 خدا نے اپنے وعدے مطابق داؤد دی نسل چوں اِسرائیلیاں لئی اِک نجاتدہندہ گھلیا یعنی یسوع۔
24 یسوع دے آن توں پہلاں یوحنا نے سارے اِسرائیلیاں چ ایہہ مُنادی کیتی کہ اوہ بپتسمہ لے کے ثابت کرن کہ اوہناں نے توبہ کر لئی اے۔
25 پر جدوں یوحنا اپنی خدمت ختم کرن والا سی تے اوہنے کہیا: ”تواڈے خیال چ مَیں کون آں؟ مَیں اوہ نئیں آں جدا تُسی اِنتظار کر رہے او سگوں ویکھو، جیہڑا میرے توں بعد آ رہیا اے* مَیں تے اوہدی جُتی دے تسمے کھولن دے لائق وی نئیں۔“
26 بھراوو، تُسی جیہڑے ابراہام دی اولاد او تے دُوجے لوکو جیہڑے خدا توں ڈردے او، ایس گل تے دھیان دَوو کہ خدا نے سانوں نجات دا پیغام دِتا اے۔
27 یروشلم دے لوکاں تے اوہناں دے حاکماں* نے یسوع نُوں تے نجات دے پیغام نُوں قبول نئیں کیتا سگوں اوہناں نے اوہدے بارے اپنی مرضی مطابق فیصلہ کیتا۔ اصل چ اِنج اوہناں نے نبیاں دِیاں اوہناں گلاں نُوں پورا کیتا جیہڑیاں ہر سبت دے دن ساریاں دے سامنے پڑھیاں جاندیاں نیں۔
28 بھانویں کہ اوہناں لوکاں کول اوہنوں جانوں مارن دی کوئی وجہ نئیں سی، فیر وی اوہناں نے پیلاطُس کولوں اوہنوں موت دی سزا دین دی منگ کیتی۔
29 جدوں اوہناں نے اوہ ساریاں گلاں پوریاں کر لئیاں جیہڑیاں اوہدے بارے لکھیاں گئیاں سن تے اوہناں نے اوہنوں سُولی* توں لاہ کے قبر چ دفنا دِتا۔
30 پر خدا نے اوہنوں مُردیاں چوں زندہ کر دِتا۔
31 ایہدے بعد اوہ کئی دِناں تک اپنے شاگرداں نُوں نظر آیا جیہڑے اوہدے نال گلیل توں یروشلم گئے سن۔ ہُن اوہی اوہدے بارے سارے لوکاں نُوں گواہی دے رہے نیں۔
32 ایس لئی اَسی توانوں اوس وعدے بارے خوشخبری سُنا رہے آں جیہڑا خدا نے ساڈے پیو دادیاں نال کیتا سی۔
33 خدا نے اوہناں دی اولاد یعنی ساڈی خاطر اوہ وعدہ اوہدوں پورا کیتا جدوں اوہنے یسوع نُوں زندہ کیتا، بالکل جیویں کہ دُوجے زبور چ لکھیا ہویا اے: ”تُوں میرا پُتر ایں۔ اَج توں مَیں تیرا باپ آں۔“
34 خدا نے اوہنوں مُردیاں چوں زندہ کر کے اِک ایہو جیہا جسم دِتا جیہڑا کدی نئیں گلے سڑے گا۔* خدا نے ایس گل دی گواہی دیندے ہوئیاں کہیا: ”مَیں داؤد نال جیہڑا وعدہ کیتا سی، اوہ بھروسے دے لائق اے۔ اوس وعدے مطابق مَیں توانوں برکتاں دَواں گا تے تواڈے نال اَٹل محبت کراں گا۔“
35 نالے اِک ہور زبور چ لکھیا اے: ”تُوں اپنے وفادار خادم دے جسم نُوں گلن سڑن نئیں دَویں گا۔“
36 پر داؤد نے پوری زندگی خدا دی خدمت کیتی تے اوہ موت دی نیندر سوں گیا۔ اوہنوں اوہدے پیو دادیاں نال دفنایا گیا تے اوہدا جسم گل سڑ گیا
37 جد کہ اوہدا جسم نئیں گلیا سڑیا جنہوں* خدا نے زندہ کیتا۔
38 بھراوو، توانوں ایہی خبر سُنائی جا رہی اے کہ یسوع دے ذریعے ای گُناہواں دی معافی ملے گی
39 تے اوہدے ای ذریعے ہر اوہ انسان بےقصور ٹھہر سکدا اے جیہڑا اوہدے تے ایمان لیاندا اے جد کہ موسیٰ دی شریعت دے ذریعے تُسی بےقصور نئیں ٹھہر سکدے۔
40 ایس لئی خبردار رہوو کہ کِتے نبیاں دِیاں ایہہ گلاں تواڈے تے پوریاں نہ ہون:
41 ”تُسی جیہڑے میرے کماں نُوں گھٹیا سمجھدے او، تُسی ایہناں نُوں ویکھو، حیران ہووو تے مٹ جاؤ کیونکہ مَیں تواڈے زمانے چ جیہڑا کم کر رہیا واں، تُسی اوہدے تے کدی یقین نئیں کرو گے فیر بھانویں کوئی توانوں ایہدے بارے کُھل کے ای کیوں نہ دَسے۔““
42 فیر جدوں اوہ عبادتگاہ چوں باہر جا رہے سن تے لوکاں نے اوہناں نُوں درخاست کیتی کہ اوہ اگلے سبت فیر آ کے اوہناں نُوں ایہناں گلاں بارے ہور دَسن۔
43 ایس لئی جدوں عبادت ختم ہو گئی تے بوہت سارے یہودی تے یہودی مذہب اپنان والے لوک جیہڑے خدا نُوں من دے سن، پولُس تے برنباس دے پچھے پچھے گئے۔ اوہناں دونواں نے اوہناں لوکاں نُوں حوصلہ دِتا کہ اوہ صحی راہ تے چلدے رہن تاکہ اوہناں نُوں خدا دی عظیم رحمت مِلدی رہوے۔
44 اگلے سبت دے دن یہوواہ دا کلام سُنن لئی تقریباً پورا شہر ای کٹھا ہو گیا۔
45 جدوں یہودیاں نے لوکاں دی اینی وڈی بِھیڑ ویکھی تے اوہ حسد دے مارے پولُس نال بحث کرن لگ پئے، ایتھوں تک کہ اوہ کُفر بکن لگ پئے۔
46 فیر پولُس تے برنباس نے بڑی دلیری نال اوہناں نُوں کہیا: ”ایہہ ضروری سی کہ خدا دا کلام پہلاں توانوں سُنایا جائے۔ پر تُسی ایہنوں ٹھکرا کے ثابت کر رہے او کہ تُسی ہمیشاں دی زندگی دے لائق نئیں او۔ ایس لئی ویکھو، اَسی غیریہودی لوکاں نُوں خدا دا کلام سُناواں گے
47 کیونکہ یہوواہ نے سانوں ایہہ حکم دِتا اے: ”مَیں تینوں قوماں لئی روشنی ٹھہرایا اے تاکہ تُوں زمین دے کونے کونے تک نجات دا اعلان کریں۔““
48 ایہہ گل سُن کے غیریہودی لوک بڑے خوش ہوئے تے یہوواہ دے کلام دی تعریف کرن لگ پئے تے جیہڑے لوک ہمیشاں دی زندگی دی راہ تے چلن لئی دِلوں تیار سن، اوہ سارے ایمان لے آئے۔
49 ایہدے علاوہ یہوواہ دا کلام سارے علاقے چ پھیلدا گیا۔
50 پر یہودیاں نے خدا توں ڈرن والیاں جانیاںمانیاں عورتاں نُوں تے شہر دے وڈے وڈے بندیاں نُوں بھڑکایا۔ ایس لئی لوکاں نے پولُس تے برنباس نُوں مار کُٹ کے شہروں باہر کڈھ دِتا۔
51 پر اوہناں دونواں نے اوس شہر دی مٹی اپنے پیراں توں جھاڑ* دِتی تے شہر اِکُنیُم چلے گئے۔
52 نالے شاگرد پاک روح نال بھرے رہے تے اوہناں دی خوشی قائم رہی۔
فٹ نوٹ
^ یعنی یوحنا مرقس۔
^ یاں، ”مددگار۔“
^ یاں، ”جج، منصف، قاضی۔“
^ یعنی مسیح۔
^ یعنی مذہبی رہنماواں۔
^ یاں، ”درخت۔“
^ 1-پطرس 3:18 نُوں ویکھو۔
^ یعنی یسوع۔
^ ایہہ ایس گل دا اشارہ سی کہ اوہناں نے اپنی ذمےداری پوری کیتی اے۔
