رسولاں دے اعمال 1:1-26
1 پیارے تھیُفِلُس، مَیں پہلی کتاب* چ اوہ سب کجھ لکھیا سی جو یسوع نے شروع توں* کیتا تے سکھایا سی یعنی اوہ ساریاں گلاں
2 جیہڑیاں اوس دن تک ہوئیاں جدوں خدا نے یسوع نُوں اسمان تے بلا لیا۔ اسمان تے جان توں پہلاں اوہنے اپنے چُنے ہوئے رسولاں نُوں پاک روح دے ذریعے ہدیتاں دِتیاں سن۔
3 یسوع بڑی دردناک موت سہن دے بعد کئی وار رسولاں تے ظاہر ہویا تاکہ اوہناں نُوں یقین ہو جائے کہ اوہ واقعی زندہ ہو گیا اے۔ اوہ 40 دِناں تک اوہناں نُوں نظر آندا رہیا تے اوہناں نُوں خدا دی بادشاہی بارے دَسدا رہیا۔
4 جدوں اوہ اوہناں نُوں ملیا تے اوہنے ایہہ حکم دِتا: ”یروشلم نُوں چھڈ کے کِتے نہ جانا سگوں اوس نعمت دا اِنتظار کرنا جدا باپ نے وعدہ کیتا اے تے جدے بارے مَیں وی توانوں دَسیا سی
5 کیونکہ یوحنا تے پانی نال بپتسمہ دیندا سی، پر کجھ دِناں بعد توانوں پاک روح نال بپتسمہ دِتا جائے گا۔“
6 جدوں اوہ اِک ہور موقعے تے کٹھے ہوئے تے اوہناں نے یسوع نُوں پچھیا: ”مالک، کیہہ تُوں ایسے ویلے اِسرائیل دی بادشاہی بحال کریں گا؟“
7 اوہنے اوہناں نُوں کہیا: ”تواڈے لئی ایہہ جاننا ضروری نئیں اے کہ طے کیتا ہویا ویلا کیہڑا اے۔ ایہہ فیصلہ کرن دا حق* صرف باپ کول اے کہ کیہڑا کم کیہڑے ویلے کرنا اے۔
8 پر جدوں تواڈے تے پاک روح نازل ہوئے گی تے توانوں طاقت ملے گی تے تُسی یروشلم، سارے یہودیہ تے سامریہ سگوں زمین دے کونے کونے چ میرے بارے گواہی دَوو گے۔“
9 ایہدے بعد اوہنوں رسولاں دے سامنے اسمان تے چُک لیا گیا تے فیر اِک بدّل نے اوہنوں اوہناں دِیاں نظراں توں چھپا لیا۔
10 جدوں اوہ یسوع نُوں اسمان تے جاندے ویکھ رہے سن تے اچانک دو آدمی جنہاں نے چِٹے کپڑے پائے ہوئے سن، اوہناں دے نال آ کے کھلو گئے
11 تے کہیا: ”گلیل دے رہن والیو، تُسی اسمان وَل کیوں ویکھی جا رہے او؟ ایہی یسوع جنہوں خدا تواڈے سامنے اسمان تے لے گیا اے، اوسے طرحاں واپس آئے گا جیویں تُسی اوہنوں اسمان تے جاندے ویکھیا اے۔“
12 فیر رسول زیتون دے پہاڑ توں یروشلم واپس چلے گئے۔ ایہہ پہاڑ یروشلم دے نیڑے یعنی ایہدے توں تقریباً 1 کلو میٹر* دے فاصلے تے وے۔
13 جدوں پطرس، یوحنا، یعقوب، اندریاس، فِلپّس، توما، برتُلمائی، متی، حلفئی دا پُتر یعقوب،شمعون جنہوں جوشیلا وی کہیا جاندا اے تے یعقوب دا پُتر یہوداہ یروشلم پونچے تے اوہ اوس گھر دے اُتے والے کمرے چ گئے جِتھے اوہ ٹھہرے ہوئے سن۔
14 اوہ سارے اِک دل ہو کے دُعا کردے رہے۔ اوہناں دے نال کجھ عورتاں دے علاوہ یسوع دی ماں مریم تے اوہدے بھرا وی سن۔
15 اوہناں دِناں چ جدوں تقریباً 120 شاگرد جمع سن تے پطرس نے اوہناں دے وچکار کھلو کے کہیا:
16 ”بھراوو، ایہہ ضروری سی کہ پاک کلام چ لکھی اوہ گل پوری ہوئے جدی پیشینگوئی داؤد نے پاک روح دی رہنمائی چ یہوداہ بارے کیتی سی۔ اوہ یسوع نُوں پھڑوان لئی سپاہی لے کے آیا سی۔
17 اوہنوں ساڈے چ گنیا جاندا سی تے ساڈے نال خدمت کرن لئی چُنیا گیا سی۔
18 (اوہنے اپنے بھیڑے کم دی کمائی نال زمین خریدی تے اوہ سِر پرنے ڈِگیا تے اوہدا ٹیڈھ پاٹ گیا تے اوہدیاں آندراں باہر آ گئیاں۔
19 ایہہ گل یروشلم دے سارے لوکاں نُوں پتہ چل گئی تے اوہناں دی زبان چ اوس زمین دا ناں ہقلدما پے گیا جدا مطلب اے: ”خون دی زمین۔“)
20 زبور دی کتاب چ لکھیا اے: ”اوہدا گھر اُجڑ جائے تے اوہدے چ کوئی نہ وَسے“ تے ”اوہدی جگہ نگہبان دی ذمےداری کوئی ہور سنبھالے۔“
21 ایس لئی ضروری اے کہ اوہدی جگہ کسے ایہو جہے بندے نُوں چُنیا جائے جنہے اوس سارے عرصے دے دوران ساڈا ساتھ دِتا جدوں مالک یسوع ساڈے نال رہ کے اپنی خدمت پوری کر رہیا سی۔
22 اوہ ایہو جیہا بندہ ہوئے جیہڑا اوس دن توں ساڈے نال ہوئے جدوں یسوع نے یوحنا کولوں بپتسمہ لیا تے اوہدوں تک ساڈے نال رہیا ہوئے جدوں خدا نے یسوع نُوں اسمان تے بلا لیا۔ نالے اوہ بندہ ساڈے وانگوں یسوع دے جی اُٹھن دا گواہ وی ہوئے۔“
23 ایس لئی بھراواں نے دو بندیاں دے ناں دَسے۔ اِک یوسف جنہوں برسبّا تے یُوستُس وی کہیا جاندا سی تے دُوجا متیاہ۔
24 فیر اوہناں نے ایہہ دُعا کیتی: ”اَے یہوواہ، تُوں ساریاں دے دِلاں نُوں جاننا ایں۔ سانوں دَس کہ تُوں ایہناں دونواں وچوں کِنہوں چُنیا اے
25 تاکہ اوہ اوس خدمت تے رسول دی ذمےداری نُوں سنبھالے جنہوں یہوداہ نے اپنی مرضی تے چلن لئی ٹھکرا دِتا۔“
26 فیر اوہناں نے قُرعہ پایا تے متیاہ دا ناں نکلیا تے اوہ بارہواں* رسول بنیا۔
فٹ نوٹ
^ یعنی لُوقا دی اِنجیل۔
^ یعنی زمین تے اپنی خدمت دے شروع توں۔
^ یاں، ”اِختیار۔“
^ یونانی چ: ”اِک سبت دے دن دی دُوری تے وے،“ یعنی اوہ فاصلہ جیہڑا سبت والے دن اِک یہودی نُوں طے کرن دی اجازت سی۔
^ یونانی چ: ”11 رسولاں دے نال گنیا گیا۔“
