بائبل چ دَسیا گیا اے کہ یہوواہ وفاداری دی راہ تے چلن والیاں نُوں کوئی وی نعمت دین توں پچھے نئیں ہٹے گا۔ (‏زبور 84:‏11‏)‏ وفاداری دی راہ تے چلن دا کیہہ مطلب اے؟ ایہدا مطلب اے کہ اَسی اپنے اوس وعدے نُوں پورا کرئیے جیہڑا اَسی یہوواہ نال کیتا سی۔ ایہہ وعدہ اَسی یہوواہ نال اوہدوں کیتا سی جدوں اَسی اپنی زندگی اوہدے ناں کیتی سی۔ (‏واعظ 5:‏4، 5‏)‏ تُسی بپتسمہ لین توں بعد وفاداری دی راہ تے کیویں چل سکدے او؟‏

ایس مضمون چ:‏

•  مشکلاں دا ڈٹ کے سامنا کرو

•  غلط خواہشاں توں بھجو

•  اپنے ارادے نُوں مضبوط کرو

 پاک کلام دا اصول:‏ خدا دی بادشاہی چ جان لئی سانوں بوہت ساریاں مصیبتاں سہنیاں پین گیاں۔—‏اعمال 14:‏22‏۔‏

 ایہدا کیہہ مطلب اے:‏ سچ تے ایہہ وے کہ سارے مسیحیاں نُوں مشکلاں دا سامنا کرنا پووے گا۔ مسیحی ہون دی وجہ توں توانوں ظلم تے بے‌عزتی دا سامنا کرنا پووے گا۔ پر پیسے دی تنگی تے بیماری دا سامنا سارے انساناں نُوں کرنا پے سکدا اے۔‏

 کیہہ ہو سکدا اے:‏ کدی کدی تواڈی زندگی چ ایہو جہیاں تبدیلیاں آن گیاں جیہڑیاں شاید توانوں پسند نہ آن۔ بائبل چ لکھیا اے کہ کسے تے وی بُرا وقت آ سکدا اے فیر بھانویں اوہ مسیحی ہوئے یاں نہ ہوئے۔—‏واعظ 9:‏11‏۔‏

 تُسی کیہہ کر سکدے او:‏ تُسی جان دے او کہ توانوں مشکلاں دا سامنا ہوئے گا۔ ایس لئی پہلاں توں ای اپنے آپ نُوں تیار کرو۔ سوچو کہ ایہہ مشکلاں یہوواہ اُتے اپنے ایمان نُوں مضبوط کرن تے اوہدے اُتے ہور زیادہ بھروسا کرن دا اِک موقع نیں۔ (‏یعقوب 1:‏2، 3‏)‏ اِنج کرن نال تُسی وی پولُس وانگوں محسوس کرو گے جنہے کہیا:‏ جیہڑا مینوں طاقت دیندا اے، اوہدے ذریعے مَیں سب کجھ کر سکنا واں۔—‏فِلپّیوں 4:‏13‏۔‏

 مشورہ:‏ یوسف دی مثال تے غور کرو۔ تُسی اوہدی زندگی بارے پیدائش 37 باب تے 39 توں 41 باب چ پڑھ سکدے او۔ ایس بارے سوچو:‏ اوہدی زندگی چ ایہو جہیاں کیہڑیاں مشکلاں آئیاں جنہاں بارے اوہنے سوچیا وی نئیں سی؟ اوہنے ایہناں دا سامنا کیویں کیتا؟ یہوواہ نے یوسف دی مدد کیویں کیتی؟‏

 ہور مدد لئی:‏

•   ایہہ مضمون پڑھو:‏

   ‏”‏زندگی میں آنے والی تبدیلیوں کا سامنا کیسے کِیا جا سکتا ہے؟‏‏“‏

 پاک کلام دا اصول:‏ ہر انسان اپنیاں خواہشاں دے جال چ پھس کے اَزمایا جاندا اے۔—‏یعقوب 1:‏14‏۔‏

 ایہدا کیہہ مطلب اے:‏ کدی کدار اَسی اپنیاں غلط خواہشاں دی وجہ توں اَزمیش چ پے سکنے آں۔ جے اَسی اپنیاں غلط خواہشاں اُتے قابو نئیں رکھاں گے تے اَسی کوئی غلط کم کرسکنے آں۔‏

 کیہہ ہو سکدا اے:‏ بپتسمے توں بعد وی توانوں جسم دِیاں خواہشاں دا سامنا ہوئے گا۔ (‏2-‏پطرس 2:‏18‏)‏ ہوسکدا اے کہ توانوں شادی توں پہلاں سیکس کرن دی اَزمیش دا سامنا ہوئے۔‏

  تُسی کیہہ کر سکدے او:‏ کسے اَزمیش دے آن توں پہلاں ای ایہہ ارادہ کرو کہ تُسی کوئی غلط کم نئیں کرو گے۔ اِنج کرن نال تُسی کوئی غلط کم کرن توں بچ جاؤ گے۔ یسوع دی کہی ایس گل نُوں یاد رکھو:‏ ”‏کوئی وی انسان دو مالکاں دی غلامی نئیں کر سکدا۔“‏ (‏متی 6:‏24‏)‏ تُسی ایہہ فیصلہ کر سکدے او کہ تُسی کنہوں اپنا مالک بناؤ گے۔ چنگا ہوئے گا کہ تُسی یہوواہ نُوں اپنا مالک بناؤ۔ تواڈے دل چ کوئی غلط کم کرن دی خواہش بھانویں جِنّی وی زیادہ ہووے، تُسی اوہدے توں بچن دا فیصلہ کر سکدے او۔—‏گلتیوں 5:‏16‏۔‏

 مشورہ:‏ ایہہ جانو کہ تواڈیاں صلاحیتاں تے کمزوریاں کیہہ نیں۔ ایہو جہے دوست چُنو جیہڑے تواڈی مدد کرن تاکہ تُسی اپنیاں خوبیاں نُوں نکھار سکو۔ ایہو جہے لوکاں تے تھانواں توں دُور رہوو جنہاں دی وجہ توں تواڈے لئی صحی کم کرنا مشکل ہوسکدا اے۔—‏زبور 26:‏4، 5‏۔‏

 ہور مدد لئی:‏

•   ایہہ مضمون پڑھو:‏

   ‏”‏آپ غلط خواہشات پر قابو پا سکتے ہیں!‏‏“‏

   ‏”‏مَیں اپنے ساتھیاں دے دباؤ دا مقابلہ کیویں کر سکنا واں؟‏‏“‏

   ‏”‏کیا آپ یہوواہ کی سوچ کو اپنا رہے ہیں؟‏‏“‏

 پاک کلام دا اصول:‏ جذبہ ظاہر کرو تاکہ تُسی سُست نہ ہو جاؤ۔—‏عبرانیوں 6:‏11، 12‏۔‏

 ایہدا کیہہ مطلب اے:‏ جیہڑا بندہ اپنے کم تے دھیان نئیں دیندا، اوہ اسانی نال سُست پے سکدا اے۔‏

 کیہہ ہو سکدا اے:‏ شاید بپتسمے توں بعد تواڈے چ بوہت جوش ہوئے تے تواڈے دل چ یہوواہ لئی بڑا پیار ہوئے۔ پرشاید کجھ‌چِر بعد توانوں ہر معاملے چ یہوواہ دی گل مننا مشکل لگے جدی وجہ توں تُسی بے‌حوصلہ ہو سکدے او تے تواڈا جوش ٹھنڈا پے سکدا اے۔—‏گلتیوں 5:‏7‏۔‏

  تُسی کیہہ کر سکدے او:‏ صحی کم کردے رہوو فیر بھانویں اِنج کرن تے تواڈا دل کرے یاں نہ کرے۔ (‏1-‏کُرنتھیوں 9:‏27‏)‏ اپنے اسمانی باپ یہوواہ نُوں ہور چنگی طرحاں جانو تے ہر روز اوہدے کولوں دُعا کرو۔ اِنج اوہدے نال تواڈی دوستی ہور مضبوط ہوندی جائے گی۔ نالے اوہناں لوکاں نال قریبی دوستی کرو جیہڑے یہوواہ نُوں دِلوں پیار کردے نیں تے اوہدی خدمت کردے نیں۔‏

 مشورہ:‏ یاد رکھو کہ یہوواہ توانوں بوہت پیار کردا اے تے تواڈی مدد کرن لئی تیار اے۔ جے کجھ وقت لئی تواڈا جوش ٹھنڈا پے جائے تے ایہہ نہ سوچو کہ یہوواہ تواڈے توں ناراض اے۔ پاک کلام چ لکھیا اے کہ اوہ تھکے ہوئے نُوں زور بخشدا اے تے جنہاں دی طاقت گھٹ اے، اوہناں نُوں ہور طاقت دیندا اے۔ (‏یسعیاہ 40:‏29‏)‏ جے تُسی کوشش کردے رہوو گے تے تُسی ویکھو گے کہ یہوواہ تواڈی مدد کر رہیا اے تاکہ تُسی فیر توں جوش نال بھر جاؤ۔‏

 ہور مدد لئی:‏

•   ایہہ مضمون پڑھو:‏

   ‏”‏نوجوانو، نجات حاصل کرنے کی کوشش کریں‏“‏

   ‏”‏مَیں خدا کی پرستش سے کیسے خوشی حاصل کر سکتا ہوں؟‏‏“‏

•   ایہہ ویڈیو ویکھو:‏

   ‏”‏نوجواناں دی رائے—‏زندگی دی بہترین راہ‏“‏

 یاد رکھو:‏ جے تُسی وفاداری دی راہ تے چلدے رہوو گے تے تُسی یہوواہ نُوں خوش کرو گے۔ (‏اَمثال 27:‏11‏)‏ اوہ ایہہ ویکھ کے بوہت خوش ہوئے گا کہ تُسی اوہدی مرضی پوری کرن دا فیصلہ کیتا اے تے اوہ تواڈی مدد کرے گا تاکہ تُسی شیطان دے ہر حملے دا مقابلہ کر سکو۔‏