خدا دی بادشاہی انساناں دِیاں ساریاں حکومتاں نوں ختم کر دَوے گی تے پوری زمین تے حکمرانی کرے گی۔ (‏دانی‌ایل 2‏:‏44‏؛‏ مکاشفہ 16‏:‏14‏)‏ ایہدے بعد خدا دی بادشاہی ایہہ کم کرے گی:‏

•   سارے بُرے لوکاں نُوں ہلاک کر دَوے گی جنہاں دی خودغرضی دی وجہ توں سانوں ساریاں نُوں بوہت نقصان پونچیا اے۔ بُرے لوکاں نُوں زمین توں ختم کر دِتا جائے گا۔—‏امثال 2‏:‏22‏۔‏

•   جنگاں نُوں ختم کر دَوے گی۔ خدا زمین دے کونے کونے چوں جنگ نُوں ختم کرائے گا۔—‏زبور 46‏:‏9‏۔‏

•   زمین تے خوش‌حالی تے سلامتی لیائے گی۔ اوہدوں ہر کوئی اپنی انگوراں دی ویل تے اپنے انجیر دے درخت تھلے بَوے گا تے اوہناں نُوں کوئی نہ ڈراوے گا۔—‏میکاہ 4‏:‏4‏۔‏

•   زمین نُوں عدن دے باغ وانگوں سوہنا بنا دَوے گی۔ ریگستان تے پیاسی زمین باغ باغ ہوئے گی تے بیابان کِھل جان گے۔—‏یسعیاہ 35‏:‏1‏۔‏

•   ہر بندے نُوں ایہو جیہا کم دَوے گی جدے توں اوہنوں خوشی ملے گی۔ میرے لوک اپنے ہتھاں دے کم توں سالاں تک فائدہ چکن گے۔ اوہناں دی محنت بے‌فائدہ نہ ہوئے گی۔—‏یسعیاہ 65‏:‏21‏-‏23‏۔‏

•   بیماریاں دا ناں نشان مٹا دے گی۔ اوتھے دا کوئی واسی نہ کہوے گا کہ مَیں بیمار آں۔—‏یسعیاہ 33‏:‏24‏۔‏

•   بڑھاپے توں نجات دَوائے گی۔ فیر اوہدا جسم اِک بچے دے جسم وانگوں ہو جائے گا؛ اوہدی جوانی واپس آ جائے گی۔—‏ایوب 33‏:‏25‏۔‏

•   مُردیاں نُوں زندہ کرے گی۔ سارے لوک جیہڑے قبراں وچ نیں اوہدی آواز سُنن گے۔—‏یوحنا 5‏:‏28‏، 29‏۔‏