Wie hoolen ons aun dän Rot von de Schreft un doonen doa nich emma waut met, wan se ons beschuljen ooda vespotten. Biejlikj sajcht daut en de Schreft: “Wäa eenen Spetta trajchthalpt, recht sikj Beleidjunk aun” (Spricha 9:7-8, De Plautdietsche Bibel; 26:4). Enne Städ daut wie ons doa oppräajen un jiedatsmol een Jestried aunrechten, wan wie orrajcht beschulcht woaren, proow wie, Gott to jefaulen (Psalm 119:69).

 Oba daut es soo, “stell sennen haft siene Tiet, räden haft siene Tiet” (Liera 3:7, De Plautdietsche Bibel). Wan opprechtje Menschen de Woarheit sieekjen, dan sent wie wellich reed, met dee to räden. Oba wie jäwen ons nich met Striedarieen auf, waut opplatst nuscht brinjen. Un soo hool wie ons aun daut, waut Jesus un de ieeschte Christen deeden un lieeden.

•   Jesus jeef kjeene Auntwuat, aus dee ver Pilatus orrajcht beschulcht wort (Matäus 27:11-14; 1. Petrus 2:21-23). Jesus muak sikj doa uk nuscht ut, aus von am jesajcht wort, daut hee een Fräta un een Drinkja wia. Enne Städ daut deed hee derch siene Woakjen dietlich moaken, wäa hee wia, wiels “de Weisheit [rajchtfoadicht] sikj derch daut waut see deit” (Matäus 11:19, De Plautdietsche Bibel). Oba wan daut doaropp aunkjeem, dan räd hee sondasorj met dee, waut äwa am lastaden (Matäus 15:1-3; Markus 3:22-30).

   Jesus lieed siene Nofolja, daut dee nich sullen mootloos woaren, wan see orrajcht beschulcht worden. Hee säd: “Seelich sent jie, wan de Menschen om mient haulwen äwa junt schellen, junt vefoljen, un junt aulahaunt schlajchtet noräden, wan daut nich soo es” (Matäus 5:11-12, De Plautdietsche Bibel). Oba Jesus säd uk, daut siene Nofolja eenjemol wudden kjennen Zeichnis jäwen, wan see beschulcht worden, un hee vespruak dee: “Ekj woa junt met Wieed un Weisheit vesorjen, wuajäajen june Jäajna nich woaren räden ooda stonen kjennen” (Lukas 21:12-15, De Plautdietsche Bibel).

•   De Apostel Paulus jeef de Christen dän Rot, see sullen sikj von de Jäajna äa Jezank oppoat hoolen, waut nuscht enhilt un “kjeenem waut nutzen” deed (Titus 3:9, De Plautdietsche Bibel; Reema 16:17-18).

•   De Apostel Petrus säd, Christen sullen fa äaren Gloowen enstonen, wan see de Jeläajenheit hauden (1. Petrus 3:15). Oba dee wist uk, daut daut foaken bäta schauft derch Woakjen aus derch Wieed. Hee schreef, daut Christen “derch goodet doonen de Schosel[s] daut Mul toostoppen sellen, dee doa jäajenaun sent un nich bäta weeten” (1. Petrus 2:12-15, De Plautdietsche Bibel).