Aulawäajen oppe Welt woat daut emma schwanda met daut Ätwoa un daut woat uk aula diera. Daut es wäajen dän Kjrich enne Ukraine un wäajen daut Wada soo dral es. Oba daut schwanste es, daut en de oame Lenda väle meist nich jenuach Äten towäaj brinjen kjennen.

•   “Wäajen doa Kjrich es, daut Wada sikj endat, daut Fia soo väl diera woat un uk wäajen aundret woat doa nich mea soo väl Ätwoa jemoakt ooda de Menschen kjennen daut nich kjrieen” (António Guterres, Hauptvewaulta von de Veeende Nazionen, 17. Juli 2023).

•   “Wäajen Russlaunt nich mea en eenen bestemden Kontrakt es, kjennen se nich mea Jeträajd ut de Ukraine rutbrinjen. Forscha sajen, daut et doaderch bloos noch woat knaupa woaren met daut Äten oppe gaunze Welt. En de oame Lenda, besonda en Nuad-Afrika un de Lenda rom de Turkei, woat daut Ätwoa noch diera woaren” (Atalayar.com, 23. Juli 2023).

 See wie mol, waut de Schreft doaräwa sajcht, daut daut Äten knaup es un waut lota noch komen woat.

•   Jesus säd verut: “Een Volkj woat jäajen daut aundre oppstonen, un een Kjennichrikj jäajen daut aundre. Un doa . . . [woat] opp veschiedne Städen . . . Hungaschnoot . . . sennen” (Matäus 24:7, PB, von ons dunkel jemoakt).

•   Daut Buak Openboarunk rät von vea Rittasch. Eena von dise Rittasch stalt dän Kjrich väa. Hinja am kjemt een aundra Ritta, waut Hungaschnoot väastalt, aulsoo dee Tiet, wan daut Ätwoa wudd weinja woaren un väl diera sennen. “Ekj kjikjt, un sach ver mie een schwoatet Pieet. Un dee doabowen saut, haud eene Wichtschol en de Haunt. Un ekj hieed . . . eene Stemm sajen: Weit fa een Dach fa een Doages Loon, ooda Joascht fa dree Doag fa een Doages Loon” (Openboarunk 6:5-6, PB).

 Dise Profezeiungen ut de Schreft, daut daut Äten wudd knaup sennen, erfellen sikj vondoag dän Dach. De Schreft nant dise Tiet “de latste Doag” (2. Timotäus 3:1, PB). Toom mea äwa “de latste Doag” un de vea Rittasch von de Openboarunk lieren, kjikj daut Video De Welt haft sikj von 1914 aun veendat un läs dän Artikjel “Die vier Reiter der Apokalypse: Wer sind sie?”.

•   De Schreft haft gooden Rot, waut ons halpen kaun, met Schwierichkjeiten foadich to woaren – uk wan daut Äten emma diera woat un mau rajcht dan, wan doa nich jenuach Äten es. En dän Artikjel “Wie man mit weniger Geld auskommt” kaust du soonen Rot finjen.

•   De Schreft jeft ons uk Hopninj, daut daut woat noch mol bäta woaren. Dee vesprakjt, daut doa woat eene Tiet komen, wan “doa woat jenuach Jeträajd oppe Ieed sennen” (Psalm 72:16, NW). Jieda eena woat dan mea aus jenuach to Äten haben. Toom mea äwa dise scheene Hopninj lieren un wuarom wie doaropp vetruen kjennen, läs dän Artikjel “Eine echte Hoffnung für die Zukunft”.