En dän Watch Tower vom 1. Juni 1912 säd daut: “Daut es goot mäajlich, daut de mieeschte von onse Läsa wäm kjanen, waut blint es. Dise Blinje kjennen emsonst waut kjrieen toom läsen. Dise Bieekja sent met oppligjende Tuksen jemoakt, soo daut dee daut läsen kjennen.” En dän Watch Tower säd daut wieda: “De goode Norecht, daut dise Welt eenen Dach woat voll Säajnungen sennen, es de Blinje aul sea to Hoaten jegonen.”

 Aus dis Watch Tower jemoakt wort, wort de enjlische Blinjeschreft noch nich aulawäajen äwareen jeschräwen. Oba wie aus Jehova siene Zeijen muaken de biblische Woarheit don aul met dise oppligjende Tuksen bekaunt – aulsoo opp Blinjeschreft. Un wie doonen daut noch emma. Nu hab wie aul opp äwa 50 Sproaken Bieekja opp Blinjeschreft. Woo woaren dee jemoakt?

 Om de Blinjeschreft to moaken, woat daut ieeschte daut jeweenelje jeschräwne no de Blinjeschreft omjeschräwen. Michael Millen, waut en de Aufdeelunk schauft, waut jeschräwnet reedmoakt toom rutjäwen, en Patterson, New York, sajcht: “Ea brukt wie emma Komputa-Programs von aundre, om daut no Blinjeschreft omtoschriewen, oba dee kunnen daut nich opp aul dee Sproaken, waut ons fäld. Nu bruck wie een Program, waut sikj Watchtower Translation System nant. Daut kaun meist aule Sproaken oppe gaunze Welt omschriewen no Blinjeschreft. Ekj jleew, soont jeft daut sest noanich.”

 En de Bieekja opp Blinjeschreft es nich bloos daut jeschräwne. Doa woat uk beschräwen, woo de Bilda lat. Biejlikj opp de väaschte Sied von daut Heft Een scheenet Läwen fa emma! es daut Bilt soo beschräwen: “Een Maun jeit opp eenen krauseljen Stich mank väl Eewasch un Boaj un väl schmocket jreenet.” Jamshed, een blinja Deenstaumthelpa un Pionia, sajcht: “Soo aus de Bilda beschräwen sent, es fa mie butajeweenlich scheen.”

 Wan daut ieescht omjeschräwen es, woat daut no de Betels jeschekjt, wua se Bieekja opp Blinjeschreft moaken. Doa woat dise Blinjeschreft dan en duarhauftet Papia nenjeprast. Dit Papia jeit nich derchtodrekjen un jeit uk nich leicht twei, wan daut uk foaken jebrukt woat. Dan woaren de eenselne Sieden met eene Fada toopjemoakt, un daut jeft een Buak. Dan woaren de Bieekja entwäda met de Bieekja fa de Vesaumlungen metjeschekjt, ooda opp eene aundre Wajch, wiels daut en eenje Lenda soont jeft, daut se blinje Menschen emsonst Bieekja schekjen kjennen. Wan daut needich es, nämen de Betels uk de bosje Wajch, om daut to schekjen. Soo kjrieen de Breeda, waut blint sent ooda schlajcht seenen kjennen, daut enne Tiet, waut an fa de Toopkomes fält.

 Aul dise Oabeit brukt väl Tiet un Jelt. Onse Drekjarie en Wallkill, New York kaun en krakjt dee Tiet, wua dee 2 Biblen opp Blinjeschreft drekjt, 50 000 jeweenelje Biblen drekjen. Eene Bibel oppe enjlische Blinjeschreft sent 25 Bieekja. Eene Bibel opp Blinjeschreft to moaken kost 123 Mol soo väl aus eene jeweenelje Bibel. Bloos de Omschläaj fa de 25 Bieekja kosten soo bie 150 stätsche Dola.

 Woo feelen deejanje sikj, waut doa methalpen, Bieekja oppe Blinjeschreft to moaken? Nadia, waut em Betel von Sied-Afrika deent, sajcht: “Onse Breeda un Sestren, waut blint sent ooda nich goot seenen kjennen, haben daut schwoa em Läwen. Doawäajen es daut een Säajen fa mie, daut ekj waut doonen kaun, waut dee halpt. Daut es kloa to seenen, daut Jehova dee sea leeft.”

 Waut wan wäa blint es un nich de Blinjeschreft läsen kaun? Eenje Joaren trigj hab wie daut Buak Learn to Read Braille rutjejäft. Daut es een Buak, wua beides bennen es, Blinjeschreft uk de jeweenelje. Daut es soo jemoakt, daut eene Persoon, waut seenen kaun, un eene blinje Persoon daut toop brucken. Bie daut Buak es uk Jereetschoft bie, waut eene blinje Persoon brucken kaun, om de Blinjeschreft to schriewen. Wan deejanja daut Jereetschoft brukt un de Latren doa selfst nendrekjt, dan halpt dän daut, dee bäta em Denkj to hoolen, wan hee dee lota späat.

 Woo kjeemen dise Bieekja de Breeda un Sestren, waut blint sent ooda nich goot seenen kjennen, togood? Ernst von Haiti wankt no de Toopkomes, oba hee haud nich Bieekja opp Blinjeschreft. Doawäajen must hee goot em Denkj hoolen, waut hee sajen wull, wan hee Oppgowen haud ooda Auntwuaten jäwen wull. Hee sajcht: “Nu daut ekj dee hab, kaun ekj dan Auntwuaten jäwen, wan ekj well. Ekj feel mie werkjlich met miene Breeda un Sestren veeent. Wie kjrieen aula dautselwje jeistelje Äten.”

 Jan es een Eltesta en Oostareich, waut nich goot seenen kaun. Hee leit daut Bibelstudium von de Vesaumlunk un daut Woaktorm-Studium. Hee sajcht: “De Bieekja von de Organisazion opp Blinjeschreft sent väl dietelja aus aundre Bieekja, waut ekj jeläst hab. Biejlikj hab wie Siednummasch un Footnooten, waut leicht to finjen sent, un daut woat dietlich beschräwen, woo de Bilda loten.”

 Seon-ok es eene Pionia-Sesta en Sied-Korea, waut blint un doof es. Ea musten se ar met de Henj dietlich moaken, om waut daut en de Toopkomes jinkj. Oba nu kaun see selfst de Bieekja opp Blinjeschreft läsen, waut wie brucken toom de Schreft studieren. See sajcht: “Aundre Bieekja opp Blinjeschreft sent schwoa to läsen, wäajen doa Tuksen fälen, de Rieejen sent nich jlikj ooda daut Papia es too denn. Oba Jehova siene Zeijen brucken fa de Bieekja bätret Papia, de Tuksen sent bäta to späaren un eena kaun dee leichta läsen. Ea kunn ekj de biblische Bieekja bloos studieren, wan aundre mie holpen, oba nu kaun ekj dee selfst studieren. Mie jeft daut ne groote Freid, daut ekj mie jieda Wäakj fa de Toopkomes reedmoaken kaun un doa metmoaken. Ekj läs aul onse Bieekja, waut daut opp Blinjeschreft jeft. Ekj kaun nich opphieren dee to läsen.”

 Soo aus daut bie onse jeweenelje Bieekja es, sajcht daut uk en de Bieekja opp Blinjeschreft: “Dit Buak es nich toom vekjeepen. Daut woat rutjejäft aus Poat von een weltwiedet biblischet Liawoakj, waut derch friewelje Gowen unjastett woat.” Dankscheen fa aul de Gowen, waut jie jäwen derch de Mäajlichkjeiten opp donate.isa4310.com. Derch june friewelje Gowen kjennen aule Menschen jeisteljet Äten kjrieen, uk dee waut blint sent ooda schlajcht seenen kjennen.