Ekj woss en eene oame Jäajent en de Staut Montreal opp. Aus ekj noch mau sas Moonat wia, storf mien Voda un doawäajen must miene Mame gaunz auleen fa onse Famielje sorjen. Ekj wia de jinjsta von acht Kjinja.

Aus ekj oppwoss, jinkj daut en mien Läwen bloos om aundre tualeiden, opp Jelt spälen un ekj haud met Droggs to doonen un wia met soone toop, waut Sachen deeden, waut jäajen daut Jesaz wieren. Aus ekj tieen Joa wia, funk ekj aun, Norechten opp un dol to brinjen von Huaren un soone Menschen, waut aundre Jelt lieden un dee dan utnuzten. Ekj deed foaken lieejen un ekj jleicht daut, Menschen to unjagonen. Ekj haud schia een Velangen doano.

Aus ekj 14 Joa wia, vestunt ekj daut aul sea fein, Menschen to unjagonen. Biejlikj koft ekj bilje Hauntuaren un muak dee soo, daut et soo leet, daut dee von Golt wieren un vekoft dee sea dia aun de Menschen enne Maul. Ekj wia emma sea hinjaraun no leicht een deel Jelt to vedeenen. Eemol vedeend ekj 10 000 Dola en eenen Dach!

Aus ekj 15 Joa wia, schekjten se mie von de School fuat, wua ekj uk wond, un no daut must ekj dan oppe Gauss ooda oppem Park schlopen ooda bie Frind.

Wäajen ekj schlajchtet deed, fruagen de Poliezen mie foaken ut, oba wäajens dee Sachen, waut ekj vekoft, nich jestolen wieren, kunnen dee mie nich enstoppen. Oba foaken must ekj een deel Strof tolen fa daut, waut ekj deed. Un wiels ekj fa nuscht Angst haud, deed ekj foaken Jelt kollakjten fa soone Menschen, waut Jelt utlieeden toom aundre utnutzen. Daut wia jefäadlich un eenjemol haud ekj eenen Rewolwa met. Noch mol schauft ekj uk met soone Gruppen toop, waut väl schlajchtet deeden.

Toom ieeschte Mol, aus ekj waut von de Schreft hieed, wia ekj noch mau 17 Joa. Ekj läwd dan met miene Mejal toop un see funk aun, met Jehova siene Zeijen toop de Schreft to studieren. Oba ekj jleicht daut nich, waut de Schreft doaräwa säd, woo eena läwen saul un doawäajen veleet ekj ar. Un dan läwd ekj met eene aundre toop, waut uk miene Mejal wia.

Oba aules funk sikj aun to endren, aus dise Mejal dan uk aunfunk, met Jehova siene Zeijen toop to studieren. See endad äa Läwen un ekj must mie wundren, daut see väl leeftolja un jeduldja wort. Eemol kroagd see mie no daut Vesaumlungshus von Jehova siene Zeijen un ekj wankt doa han. De Menschen doa wieren sea leeftolich un neemen mie fein opp; soont wia ekj en de Welt nich jewant. Tus feeld ekj mie emma aufjewäsen un ekj haud kjeenmol werkjlich Leew jekjräajen en miene Kjintheit. Dise Leew, waut ekj doa mank Jehova siene Zeijen späad, wia krakjt daut, wua mie aul emma no jewast wia. Aus Jehova siene Zeijen mie dan aunbooden, de Schreft to studieren, dan neem ekj daut sea schaftich aun.

Daut, waut ekj von de Schreft lieed, haft secha mien Läwen jerat. Ekj un twee Poatna hauden jeplont to stälen toom de Schult betolen, waut ekj haud, wiels ekj opp Jelt späld. Ekj wia äwa 50 000 Dola schuldich. Oba ekj sie soo froo, daut ekj daut aufsäd, wäajen miene Poatna von ea deeden daut doawäajen un eenen von dee wort faustjenomen un dän aundren wort dootjemoakt.

Un aus ekj wieda de Schreft studieed, wort mie daut dietlich, woo väl ekj en mien Läwen endren must. Biejlikj lieed ekj daut, waut de Schreft en 1. Korinta 6:10 (PB) sajcht. Doa sajcht daut, daut dee, waut “stälen, jiezich sent, drinkjen, spotten un Menschen äwafaulen woaren daut Gottesrikj nich oawen”. Aus ekj dän Varsch läsd un aun mien Läwen docht, kjeemen mie de Tronen. Mie wort daut dietlich, daut ekj mien Läwen gaunz endren must (Reema 12:2). Ekj wia hunjsch un deed aundre tualeiden un mien Läwen wia gaunz onopprechtich.

Oba ekj lieed von de Schreft uk, daut Jehova metliedent es un vejäwen deit (Jesaja 1:18). Ekj bäd iernstlich un prachad Jehova, daut hee mie halpen sull, mien Läwen to endren. Un met Jehova siene Help kunn ekj daut dan. Daut wia eene wichtje Entscheidunk, aus ekj un miene Mejal ons dan verem Jesaz befrieden.

Ekj wia 24 Joa un befriet un wie hauden dree Kjinja. Nu must ekj mie eene opprechtje Oabeit sieekjen. Ekj haud nich väl jelieet un haud uk nich eenen gooden Nomen. Dan bäd ekj wada iernstlich to Jehova un wankt no Oabeit sieekjen. Doa, wua ekj no Oabeit fruach, säd ekj, daut ekj mien Läwen wull endren un eene opprechtje Oabeit doonen. Eenjemol säd ekj opp dee Städen, wua ekj no Oabeit socht, daut ekj de Schreft studieed un daut ekj wull een bätra Mensch woaren. Oba väl Menschen wullen mie goanich aunnämen. Tolatst säd ekj to eenen Maun aul daut schlajchte, waut ekj jedonen haud, un dan säd dee: “Ekj weet nich werkjlich woosoo, oba mie späat sikj soo, ekj sull die aunnämen.” Ekj jleew, dit wia de Auntwuat von miene Jebäda. Met de Tiet leeten ekj un miene Fru ons aus Jehova siene Zeijen deepen.

Ekj sie vondoag dän Dach aum Läwen, wäajen ekj daut nokom, waut de Schreft lieet. Ekj hab nu eene Famielje un ons jeit daut scheen un ekj hab uk een reinet Jewessen, wiels ekj mie secha sie, daut Jehova mie vejäft haft.

De latste 14 Joa sie ekj aul en dän Voltietdeenst jewast un hab aundre Menschen jeholpen, daut to lieren, waut de Schreft sajcht. Korz haft miene Fru uk met dän Voltietdeenst aunjefongen. En de latste 30 Joa hab ekj kunt 22 von miene Oabeitspoatna halpen, daut dee uk Jehova deenen kjennen, un daut moakt mie sea schaftich. Ekj wank noch emma no de Maul, oba nu nich toom de Menschen unjagonen, soo aus ekj ea deed. Nu, wan ekj doa hanwank, dan räd ekj foaken met aundre von mienen Gloowen. Ekj well dee nu waut jäwen: eene Hopninj, daut see lota kjennen en eene niee Welt läwen, wua kjeena woat de aundre unjagonen (Psalm 37:10-11).