Ekj sie butakaunt de Staut Room jebuaren un doa woss ekj uk opp. Daut wia eene oame Städ, wua ekj wond. Un daut Läwen wia sea schwoa. Ekj hab miene rajchte Mame kjeenmol kjanen jelieet un ekj wort nich goot met mienen Voda foadich. Von kjlien aun must ekj lieren, mie selfst to weeten en eene jefäadelje Omjäajent.

Aus ekj noch mau tieen Joa oolt wia, funk ekj aul aun to stälen. Aus ekj 12 wia, kleiwd ekj daut ieeschte Mol von tus ut. Mea aus eemol must mien Voda mie von de Poliezen aufholen un mie no Hus brinjen. Ekj street emma met de Menschen un wia uk hunjsch un äwa aulem doll. Aus ekj dan 14 Joa oolt wia, veleet ekj von tus un kjeem niemols wada trigj. Ekj funk aun Droggs to brucken un wond oppe Gauss. Ekj haud kjeene Städ toom schlopen. Doawäajen bruak ekj mie en Foatieja nenn un schleep doa, bat daut dach wort. Dan socht ekj mie irjentwua Wota toom mie wauschen.

Ekj wia een gooda Stäla. Ekj stool de Menschen de Tauschen fuat un de Nacht bestool ekj uk de Hiesa. Ekj kjrieech eenen schlajchten Nomen un daut brocht daut soo wiet, daut ekj mie met eene bekaunde Baund toopstunt. Un dan deed wie mau rajcht Banken bestälen. Wäajen ekj soo hunjsch wia, jleewden aule von de Baund boolt wunda von mie. Ekj haud emma mienen Rewolwa met. Ekj schleep mau rajcht met mienen Rewolwa unja mien Kjessen. Ekj haud een schwienschet Läwen, brukt Jewault, Droggs, ekj deed stälen un haud schlajchte Räd. De Poliezen sochten emma no mie. Ekj wort mieremol faustjenomen un fa Joaren wia ekj emma mol wada em Jefenkjnis bennen un dan wada buten.

Eemol, aus ekj utem Jefenkjnis kjeem, fua ekj no miene Taunte spazieren. Ekj wist daut goanich, daut miene Taunte un twee von äare Kjinja wieren Jehova siene Zeijen jeworden. Dee kroagden mie no een Toopkomen von Jehova siene Zeijen. Un wiels ekj nieschierich wia, wort ekj mie eenich, doa hantowanken. Aus ekj no daut Vesaumlungshus kjeem, wull ekj onbedinjt dicht bie de Däa setten, om daut ekj kunn oppaussen, wäa doa nenkjeem un wäa doa rutjinkj. Un soo aus emma haud ekj mienen Rewolwa met.

Daut Toopkomen endad mien Läwen. Ekj weet noch, ekj docht don, daut dit eene gaunz aundre Welt wia. De Menschen bejreesten mie leeftolich un frintlich un kjikjten schaftich. Dee jinkj daut auntoseenen, daut et opprechtje un leeftolje Menschen wieren. Daut wia gaunz aundasch, aus daut, waut ekj jewant wia!

Ekj funk aun, de Schreft to studieren met Jehova siene Zeijen toop. Un je mea ekj lieed, je dietelja wort mie daut, daut ekj mien Läwen gaunz endren must. Mie jinkj daut sea to Hoaten, waut daut en Spricha 13:20 (PB) sajcht: “Wäa daut met weise Menschen helt, woat weis, oba wäa met Noaren vekjieet, woat Schoden lieden.” Mie wort daut dietlich, daut ekj de Baund must veloten. Daut wia nich leicht, oba met Jehova siene Help kunn ekj daut doonen.

Ekj deed mie en väl Stekjen endren. Mie foll daut sea schwoa, oba ekj kunn opphieren met schmieekjen un Droggs brucken. Ekj deed uk miene lange Hoa aufschnieden un hieed opp met Uarenrinj brucken. Ekj haud uk nich mea schlajchte Räd. Toom ieeschte Mol haud ekj mien Läwen unja Kontroll.

Ekj haud daut noch kjeenmol sea jejleicht to läsen un studieren. Fa mie wia daut sea schwoa, bie de Sach to bliewen, wan ekj de Schreft studieed. Oba ekj strenjd mie sea aun un soo bie sacht kjrieech ekj Leew fa Jehova, un en mie funk sikj aun, waut to endren. Mien Jewessen funk mie aun to baudren. Foaken feeld ekj mie sea schlajcht un twieweld, aus Jehova mie kunn vejäwen fa aul daut schlajchte, waut ekj jedonen haud. En soone Tieden funk ekj väl Troost, wan ekj läsd, woo Jehova dän Kjennich David vejeef fa de schwoare Sinden, waut dee jedonen haud (2. Samuel 11:1–12:13).

Mie wia daut uk sea schwoa, von Hus to Hus to prädjen (Matäus 28:19-20). Ekj haud Angst, daut ekj wudd wäm trafen, waut ekj ea haud Schoden aunjedonen ooda schlajcht behaundelt. Oba met de Tiet haud ekj nich mea Angst. Enne Städ daut jleicht ekj daut, aundre to halpen, von onsen leeftoljen himlischen Voda to lieren un woo wellich hee reed es, ons to vejäwen.

Von Jehova to lieren haft mie daut Läwen jerat. De mieeschte von miene Poatna ut de Baund sent nu doot ooda em Jefenkjnis. Oba ekj hab werkjlich een schaftjet Läwen un eene scheene Hopninj fa lota. Ekj hab jelieet, deemootich un jehuarsom to sennen un nich mea soo wuttich to woaren. Un wäajen aul dit kaun ekj nu bäta met de Menschen rom mie foadich woaren. Ekj hab eene feine Fru jefungen, waut Carmen heet, un wie haben eenen gooden Ehestaunt. Wie jleichen daut beid sea, aundre to halpen, äwa de Schreft to lieren.

Ah, un dan noch: Nu doo ekj opprechtich schaufen. Ekj hab eenjemol uk noch met Banken to doonen, oba nu doo ekj dee reinmoaken, enne Städ dee bestälen!