FA ELREN
6: Trajchtwiesen
WAUT BEDIET DAUT?
Trajchtwiesen kaun bedieden, wäm lieren, daut rajcht to doonen. Eenjemol es doa uk met en, een Kjint trajchttostalen, wan daut nich schmock es. Oba foaken es doa met en, de Kjinja von kjlien aun to lieren, waut sikj jehieet un waut nich.
WUAROM ES DAUT WICHTICH?
En de latste Joaren haben väle Elren oppjehieet äare Kjinja trajchttowiesen, wäajen dee Angst haben, daut de Kjinja daut woat raufbrinjen. Oba goode Elren woaren met Mot Räajlen oppstalen un äare Kjinja lieren, dee notokomen.
Pamela sajcht: “Wan Kjinja Räajlen haben, dan woat dee daut uk halpen, wan dee ieescht groot sent. Wan Kjinja nich trajchtjewäsen woat, sent dee soo aus een Boot, waut nuscht haft toom wenjen, waut dan utjleist ooda soogoa omstelpt.”
WAUT KAUN EENA DOONEN?
Hoolt junt aun daut, waut jie sajen. De Kjinja motten weeten, waut doa passieet, wan dee sikj nich aun de Räajlen hoolen. Oba siet uk wellich reed, dee to lowen, wan dee waut goot moaken.
Christine sajcht: “Ekj low miene Kjinja eendrajchtich, wan dee jehuarsom sent, wan daut en dise Welt uk nich Mood es. Dee to lowen moakt dee daut uk leichta, daut auntonämen, wan ekj dee trajchtwiesen mott.”
WAUT DE SCHREFT SAJCHT: “Waut een Mensch seit, woat hee uk arnten” (Galata 6:7).
Siet nich too strenj. Hoolt em Denkj, woo oolt daut Kjint es, waut daut aul aules vesteit un bejriepen kaun un woo schlemm daut es, waut daut Kjint orrajcht deed. De Strof mott met daut to doonen haben, waut daut Kjint orrajcht jedonen haft. Biejlikj, wan daut Kjint daut Fon orrajcht jebrukt haft, dan wudd daut daut Fon fa een Stootje nich mea brucken kjennen. Oba moakt de Sach nich oaja, aus daut werkjlich es, bloos wäajen jie junt oajren.
Wendell sajcht: “Ekj proow uttofinjen, aus mien Kjint daut met Fliet deed ooda aus daut bloos een onbedochta Fäla wia. Daut es gaunz aundasch, wan een Kjint mol eenen Fäla moakt, aus wan daut emma wada met Fliet waut deit. Un doano, waut daut dan es, mott eena dan doamet schaufen.”
WAUT DE SCHREFT SAJCHT: “Veoajat un vebettat june Kjinja nich, daut see nich . . . mootloos woaren” (Kolossa 3:21).
Siet leeftolich. Wan Kjinja weeten, daut äare Elren an emma ut Leew trajchtwiesen, es dee daut väl leichta, daut auntonämen.
Daniel sajcht: “Aus ons Jung waut orrajcht deed, dan leet wie dän daut weeten, daut wie brow wieren fa aules, waut hee ea goot jedonen haud. Wie säden am, daut hee wäajen disen Fäla nich wudd een schlajchta Mensch woaren, soo lang aus hee daut wudd trajchtstalen. Un wie wieren doa toom am halpen.”
WAUT DE SCHREFT SAJCHT: “Leew es jeduldich, Leew es frintlich” (1. Korinta 13:4).
