Daut jratste Poat vonne Ieed es unja Wota. Oba von aulet Wota oppe Ieed es “bloos 0.5% to brucken un leicht to kjrieen” (World Meteorological Organization). Daut hieet sikj veleicht no weinich, oba daut wudd sellen jenuach sennen fa aulet Läwen oppe Ieed. Oba väl Wota es schwiensch un väle haben nich de Mäajlichkjeit, Wota to kjrieen, wäajen doa emma mea Wota jebrukt woat ooda wäajen daut Wada sikj endat. Forscha sajen, daut et en de näakjste 30 Joa äwa fiefdusent Millionen Menschen (5,000,000,000) jäwen woat, waut nich mea woaren jenuach Wota kjrieen kjennen.

De Ieed es soo enjerecht, daut doa saul emma jenuach Wota sennen. Daut dit mäajlich es, schaufen miere Sachen toop; biejlikj de Ieed halpt met, de Mäatieren un mau rajcht de Sonneschien. Well wie mol eenjet seenen, waut bewiest, daut onse Ieed soo jemoakt es, daut dee fa emma bliewen kaun.

• Doa wort beoobacht, daut de Ieed methalpen kaun, sea väl veschiednet Jeft ut daut Wota ruttonämen. En wotajet Launt jeft daut biejlikj wesse Plaunten, waut soont utem Wota rutfiltren, waut von Jeft spretzen, ferteleisen ooda Dunk häakjemt. a

• Forscha haben utjefungen, woo daut schauft, daut daut Wota enne Natua rein blift. Wan doa wua Wota schält, dan nemt daut aulet orreine met, un dan doonen kjliene Baktierieen de jeftje Sachen uteneen nämen, bat dee soo kjlien sent, daut dee nich mea schoden doonen.

• Daut jeft jewesse Schnigjen, waut en jeweeneljet Wota un nich em Mäawota läwen. En bloos een poa Doag kjennen dise Schnigjen Sachen, waut kunnen jeftich sennen, von daut Wota rutnämen. Dee vestonen daut veleicht noch bäta aus de Maschienen, waut Menschen jemoakt haben toom krakjt deeselwje Oabeit doonen.

• Onse Ieed es soo jemoakt, daut dautselwje Wota emma wada vedonst un dan wada rauf oppe Ieed räajent. Wäajen dit un uk aundret soo fein oppjestalt es, blift daut Wota emma oppe Ieed ooda enne Wolkjen un daut veschwinjt uk nich.

Soone, waut sikj daut unjastonen haben, roden too, daut eena saul nich onneedich Wota vekwosen. Dee sajen uk, eena saul soone Foatieja repäaren, waut Schmäa lakjen, un nich Medizien biem Zekjreet derchloten ooda Jeft bie de Wauschkomm derchjeeten. Aul daut halpt met, daut daut Wota nich soo schwiensch woat.

Kluake Menschen haben sikj mau rajcht veschiednet utjejrebbelt, woo eena daut Solt vom Mäawota rutkjrieen kaun. Daut doonen dee doatoo, daut et saul mea Wota toom drinkjen jäwen.

Oba bloos daut woat nich toorieekjen. Daut Solt von daut Mäawota ruttonämen haft werkjlich noch waut opp sikj, wäajen daut kjemt sea dia un brukt een deel Fia. Aune 2021 schreewen se en eenen Berecht, woo eena daut Wota rein hoolen kaun, daut et emma jenuach Wota toom drinkjen jeft. En eenen Berecht von de Veeende Nazionen (UNO) säd daut: “Rajcht jesajcht wudd daut needich sennen, oppe gaunze Welt noch soo väl to doonen, om daut Wota rein to hoolen, aus nu jedonen woat.”

“[Gott] nemt daut Wota enne Loft nenn, un jitt daut em Räajen oppe Ieed; hee lat de Wolkjen äwaranen, fa aul de väle Menschen.” (Hiob 36:27-28)

Gott haft aules soo enjerecht, daut de Ieed daut Wota selfst reinjen deit (Liera 1:7).

Denkj mol äwa dit no: Gott haft de Ieed soo jemoakt, daut dee daut Wota selfst reinhoolen kaun. Waut jleefst, wudd hee dan nich uk wellen dee Trubbels fiksen, waut de Menschen veuasoakt haben? Un wudd Gott nich uk de Macht doafäa haben? Wan du mea doaräwa weeten west, dan läs dän Artikjel “Gott vesprakjt, daut onse Ieed fa emma bliewen woat” opp de 15. Sied.