“Moakt junt nich Sorjen om daut, waut morjen komen saul. Morjen woat fa sikj selfst sorjen” (MATÄUS 6:34)

Waut daut bediet: De Sorjen sent Poat vom Läwen. Oba moak de Sorjen nich noch jrata doaderch, daut du dee von morjen noch mank dee von vondoag deist. Nemm eenen Dach opp eemol.

• Äwafoddat sennen kaun Sorjen veuasoaken. Waut kaust du doonen? Ieeschtens: Du motst enseenen, daut du nich aule Schwierichkjeiten kaust utem Stich gonen, un von Sorjen moaken woat et nich leichta. Tweedens: Du motst em Denkj hoolen, daut et foaken nich mol soo utkjemt, aus eena jedocht haft.

“Bliew en aule Omstend derchjedocht un besonnen” (2. TIMOTÄUS 4:5)

Waut daut bediet: Sie nich too neiw un denkj doaraun, daut kjeena onen Fäla es. Stal nich toone strenje Räajlen opp: nich fa die uk nich fa aundre.

• Denkj nich too väl von die un hool em Denkj, daut du Jrensen hast un aundre uk. Wan du daut soo deist, dan woat die un uk aundre daut nich soo Stress moaken un daut woat bie beid bäta utkomen. Hab uk wellich mol een bät Spos. Wan du lachst, endoont aus doa irjentwaut nich jlei rant, dan halpt daut, daut du die loosjelotna feelst un schaftja best.

“Wäa vestendich es, haft eenen rujen Jeist” (SPRICHA 17:27)

Waut daut bediet: Wäa doll, vedrislich ooda ojjeduldich es, kaun nich kloa denkjen. Doawäajen proow, ruich to bliewen.

• Finj ut, waut die äwafoddat un woo du dan best. Du wurscht daut mau rajcht kjennen oppschriewen, waut du dan jroz denkjst, woo du die feelst ooda oppstalst. Dan woascht du bäta weeten, woo du doamet omgonen kaust. Denkj uk doaräwa no, woo du daut verheipts kaust väabieejen, waut die äwafoddat. Wan daut nich jeit, dan see mol, aus du die kaust diene Oabeit ooda Tiet bäta endeelen, daut doa nich aules tojlikj oppkjemt.

• Proow, aules mol von eene aundre Kaunt to beseenen. Waut die äwafoddat, kaun fa aundre nuscht waut schlemmet sennen. Daut kjemt doaropp aun, woo eena daut sitt. Doatoo mol dreeatlei, waut die veleicht halpen kaun:

  1. Denkj nich fuaz, daut aundre aules doonen toom die trotzen. Saj wie mol, du steist wua enne Rieej un eena jeit bloos ver die. Wan du fuaz denkjst, woo onbelieet daut es, dan woascht du die oajren. Oba deed dee daut werkjlich utem schlajchten Senn? Veleicht nich!

  2. See de goode Sieden. Wan du em Hospitol ooda oppem Zhett-Plauz lang luaren motst, wurscht du de Tiet dan kjennen utnutzen? Veleicht kust du waut läsen, fa diene Oabeit waut doonen ooda E-Mails noseenen.

  3. Denkj nich bloos aun diene Loag nu. Froag die: “Woat dis Trubbel mie morjen ooda näakjste Wäakj uk noch groot väakomen?” Proow, daut to seenen, wanea daut mau een kjliena Trubbel es, waut boolt vejeit, ooda wanea dee schlemma es.

“Daut mott oba aules schekjlich un ordentlich jedonen woaren” (1. KORINTA 14:40)

Waut daut bediet: Hab eene jewesse Ordnunk en dien Läwen.

• Auljemeen jleicht eena Ordnunk em Läwen. Oba wan eena biejlikj Sachen emma oppschuwen deit, dan klompt aules soo opp un dan woat aules onordentlich un eena feelt sikj äwafoddat. Proow mol, dise beid Sachen to doonen:

  1. Moak die eenen Plon, waut du uk nokomen kaust, un hool die aun dän.

  2. Finj ut, wuarom du emma eenjet oppschuwen deist un proow, daut to vebätren.

“Daut es bäta, wan eena eene Hauntvoll haft, un sikj utreiwen kaun, aus wan eena twee Henj voll haft, un sikj kjwält, un vesieekjt dän Wint to jriepen” (LIERA 4:6)

Waut daut bediet: Wäa emma bloos rakat, kaun daut veleicht nich mol utnutzen, waut hee en siene “twee Henj voll haft” von siene Oabeit. Dee haft aul schia nich mea Tiet un Krauft toom sikj daut loten scheen gonen.

• Denkj äwa Oabeit un Jelt soo aus daut werkjlich es. Mea Jelt meent je nich, daut eena schaftja es ooda daut leichta haft. Daut kaun daut Jäajendeel sennen. Liera 5:11 sajcht: “De rikja kaun nich schlopen, wiels hee soo väl aum dreien haft.” Proow, met daut Jelt foadich to woaren, waut du hast.

• Nemm die Tiet toom vereiwen. Eenem woat daut leichta, wan eena waut deit, waut eenem scheen jeit. Oba bloos setten un biejlikj Tellewizhen kjikjen, halpt veleicht nich väl waut.

• Bruck de Tablets, Fons un Komputa nich too foaken. Doo nich dän Tiet äwa noseenen, aus die wäa jeschräwen ooda waut jeschekjt haft. Wan du nich bie de Oabeit best, dan doo nich de E-Mails noseenen äwa de Oabeit, buta daut es onbedinjt needich.

Kjarpaliche Eewunk kaun halpen (1. TIMOTÄUS 4:8)

Waut daut bediet: Pinkjlich Ekserseis doonen halpt fa de Jesuntheit.

• Proow, goode Jewanheiten to kjrieen. Ekserseis doonen halpt, daut eena schaftja es un de Kjarpa kaun bäta met Stress omgonen. Ät jesunt un lot nich Moltieden ut. Un see doano, daut du jenuach schlapst.

• Denkj nich, daut schmieekjen, supen ooda Droggs brucken eene Help es. Met de Tiet woat de Sach doaderch bloos schlemma: daut schot de Jesuntheit un kjemt dia.

• Foa nom Dokta, wan du die gaunz äwafoddat feelst. Du doascht die doawäajen nich schämen.

“Jie [sellen] fauststalen lieren, waut daut aulabaste es” (FILIPPA 1:10)

Waut daut bediet: Denkj doa jescheit äwa no, waut daut ieeschte kjemt.

• Schriew daut opp, waut du aules to doonen hast. Daut wichtichste kjemt daut bowaschte. Soo kaust du seenen, woont du fuaz doonen motst, waut aundre doonen kunnen un waut soogoa jinkj to strikjen.

• Schriew daut opp, waut du eene Wäakj lank aules deist. Un dan kjikj, waut du vebätren kaust. Je dolla du daut aun Haunt hast, je weinja äwafoddat woascht du die feelen.

• Nemm uk Tiet toom vereiwen. Wan daut uk mau een Stootje es, kaun eenem daut mea Krauft jäwen un leichta moaken.

“Wäa em Hoat beduat es, haft daut schwoa, oba wäa jetreest woat, freit sikj” (SPRICHA 12:25)

Waut daut bediet: Wan aundre leeftolich un voll Metleet met ons räden, dan kaun ons daut Moot jäwen.

• Räd met eenen gooden Frint. Dee kaun die halpen, Sachen von eene aundre Kaunt to beseenen ooda eenen Rot jäwen, aun dän du nich dochst. Bloos doaräwa räden kaun eenem uk aul halpen.

• Sieekj no Help. Kaust du wäm eene Oabeit äwajäwen ooda dee endeelen?

• Wan een Oabeitspoatna die daut schwoa moakt, dan proow, waut to endren. Kaust du dän daut veleicht frintlich sajen, woo du die feelst? (Spricha 17:27). Wan daut nuscht halpt, kust du dan proowen, weinja met dän toop to sennen?

“De Mensch läft nich bloos von Broot, oba von aule Wieed, dee Gott jerät haft” (MATÄUS 4:4)

Waut daut bediet: Menschen brucken nich mau bloos Äten, Kjleeda un Woninj. Wie brucken uk Gott en ons Läwen. Wan wie ons doaräwa em kloaren sent un daut nokomen, dan woa wie schaftich sennen.

• Bäden kaun sea halpen. Gott well haben, daut wie onse Sorjen sellen opp am schmieten, wiels hee sorcht fa ons (1. Petrus 5:7). Wan wie bäden un äwa goodet nodenkjen, dan woa wie ennalich Fräd haben (Filippa 4:6-7).

• Läs soont, waut die em Gloowen stoakjt. Waut wie en dit Buak jeseenen haben, kjemt von de Schreft, un dee es doatoo jeschräwen, daut wie Gott siene Help finjen. Dee äa Rot halpt ons, daut wie ons aun de Weisheit hoolen un Sachen vestonen kjennen (Spricha 3:21). Wuarom nemst die daut nich väa, de Schreft to läsen? Du wurscht kjennen bie Spricha aunfangen.