Metjefeel haben met “aule [Sorten] Menschen”
AUS Jesus siene Jinja lieed, de goode Norecht to prädjen, säd hee uk, daut nich aula wudden horchen wellen (Luk. 10:3, 5-6). Soo es daut vondoag dän Dach uk. Eenje Menschen sent veleicht jäajenaun ooda stalen sikj domm opp, wan wie dee prädjen wellen. Dan kaun daut fa ons schwoa sennen, metfeelent to bliewen un wiedatoprädjen.
Een metfeelenda Mensch sitt, waut aundre fa Trubbels haben un waut dee fält. Dee haft Metleet met dee un well dee halpen. Wan wie ons Metjefeel fa de Menschen em Deenst velieren, woa wie dee nich mea prädjen wellen un dan woa wie dee uk nich halpen kjennen. Oba wan wie doano trachten, daut wie mea Metjefeel haben, dan es daut soo, aus wan wie bie een Fia mea Holt aunlajen, un ons woat daut dan sea jankren, wieda flietich to prädjen (1. Tess. 5:19, NW).
Woo kjenn wie lieren mea Metjefeel to haben, wan daut uk nich emma eefach es? Well wie mol dree goode Biespels seenen. Daut sent Jehova, Jesus un de Apostel Paulus.
JEHOVA SIEN METJEFEEL NODOONEN
Äwa Jehova haben se aul dusende Joaren beese Läajes vetalt. Oba hee haft doawäajen “een Jaumahoat fa de ondankboare un dee waut orrajcht doonen” (Luk. 6:35). Aun waut es daut to seenen? Doaraun daut hee jeduldich es. Jehova well haben, “daut aule [Sorten] Menschen sellen jerat woaren” (1. Tim. 2:3-4). Gott haust daut beese, oba hee räakjent de Menschen soo väl, daut hee well, daut kjeena veloaren jeit (2. Pet. 3:9).
Jehova weet krakjt, woo fein de Soton sikj doamet weet, de Menschen met Blintheit to schlonen (2. Kor. 4:3-4). Väle haben se von kjlien aun Läajes äwa Gott jelieet un daut moakt dee daut schwoa, de Woarheit auntonämen. Oba Jehova well dee halpen. Woo weet wie daut?
Daut es biejlikj doaraun to seenen, woo Jehova äwa de Staut Ninive docht. De Menschen doa wieren grausom, oba Jehova säd to Jona: “Ninive es eene Staut wua äwa 120.000 Menschen wonen. . . . Dee weeten nich soo väl von goot un schlajcht, daut see eene linkje von eene rajchte Haunt unjascheeden kjennen! . . . Woo sull mie daut nich äwa de Staut schod sennen?” (Jona 4:11). Jehova jaumad daut äwa de Menschen en Ninive, wiels dee wisten nich de Woarheit äwa am. Doawäajen schekjt hee Jona doahan, om dee to woarnen.
Soo aus Jehova räakjen wie de Menschen uk väl. Wie kjennen am nodoonen, wan wie ons flietich bemieejen aulem to halpen, wan sikj daut uk soo feelt, daut dee de Woarheit nich aunnämen woaren.
JESUS SIEN METJEFEEL NODOONEN
Jesus jaumad daut krakjt soo äwa de Menschen aus sienen Voda, wiels dee “wieren vejoacht un helploos, soo aus Schop onen Hoad” (Mat. 9:36). Jesus wist, wuarom de Menschen en dise Loag wieren. Dee äare Gloowesleidasch hauden dee schlajcht behaundelt un Läajes jelieet. Hee wist uk, daut väle von dee, waut am toohieeden, wäajen veschiedne Omstend nich wudden siene Jinja woaren. Oba doawäajen “lieed [Jesus] an väl” (Mar. 4:1-9).
Woa nich mootloos, wan doa wäa aum Aunfank nich intressieet es
Wan en de Menschen äa Läwen waut woat, dan horchen dee veleicht no de Woarheit
Wan de Menschen em Deenst nich horchen wellen, dan sell wie doaräwa denkjen, wuarom dee soo jesonnen sent. Eenje wellen veleicht nuscht von de Schreft weeten ooda von christelje Gloowes, wäajen eenje, waut sikj Christen nanen, schlajchtet doonen. Aundre haben veleicht Läajes jehieet äwa daut, waut wie jleewen. Un noch aundre haben Angst, daut äa Frintschoft ooda de Nobasch äwa an spotten woaren, wan see met ons räden.
Eenje sent veleicht nich leeftolich, wan wie dee prädjen, wäajen dee ea väl schwoaret beläft haben. Eene Missionoa-Sesta, waut Kim heet, sajcht: “Opp eene jewesse Städ, wua wie prädjen, sent een deel Menschen, waut eenen Kjrich beläft haben un aul äa Hab un Goot veloaren haben. Dee haben nich Hopninj fa bätre Tieden. Dee sent vetwiewelt un sea mestrusch. En dee Jäajent sent de Menschen foaken jäajenaun. Eemol deeden see mie mau rajcht waut aun, aus ekj prädijd.”
Woo kaun Kim wieda Metjefeel bewiesen? See sajcht: “Wan mie wäa schlajcht behaundelt, dan proow ekj aun Spricha 19:11 to denkjen. Doa sajcht daut: ‘Weisheit moakt eenem jeduldich’. Wan ekj doaräwa nodenkj, waut de Menschen doa beläft haben, dan es mie daut leichta, Metjefeel fa dee to haben. Un dee sent uk nich aula jäajenaun. Opp deeselwje Städ hab wie eenje goode Wadabesuchs.”
Wie wudden kjennen äwalajen: “Waut wudd ekj doonen, wan ekj en de Menschen äare Städ wia un mie wäa de goode Norecht prädjen wudd?” Woo wudd daut toom Biespel sennen, wan se ons aul emma hauden Läajes äwa Jehova siene Zeijen vetalt? Dan wudd wie veleicht uk nich horchen wellen un ons wudd daut fälen, daut aundre met ons Metjefeel hauden. Jesus säd, daut wie aundre sellen soo behaundlen, aus dee ons behaundlen sellen. Doawäajen mott wie doano trachten, de Menschen to vestonen un jeduldich met dee to sennen, wan daut uk schwoa es (Mat. 7:12).
PAULUS SIEN METJEFEEL NODOONEN
De Apostel Paulus haud mau rajcht met deejanje Metjefeel, waut am vefoljden. Wuarom? Hee docht doaraun, woo hee ea mol jewast wia. Hee säd: “Ekj [wia] verhäa uk een rietenda Vefolja un Lastra . . ., Gott oba haud Metleet met mie, wiels ekj wist nich waut ekj deed, wiels ekj dan noch nich aun Jesus jleewd” (1. Tim. 1:13). Hee wist, daut Jehova un Jesus väl Metleet met am jehaut hauden. Un hee wist, woo siene Jäajna dochten, wäajen hee ea uk soo jedocht haud.
Eenjemol räd Paulus met soone, waut gaunz faust aun faulsche Lieren wieren. Woo jinkj hee doamet om? Aposteljeschicht 17:16 sajcht, aus Paulus en Ateen wia, “räajd sien Jeist sikj en am opp, aus hee sach woo de Staut voll Aufjetta wia”. Oba Paulus brukt krakjt daut, waut am doa soo baudad, toom een goodet Zeichnis jäwen (Apj. 17:22-23). Hee paust sien prädjen doano aun, woo de Menschen wieren ooda waut dee beläft hauden, “om opp aule Oat un Wies eenje to raden” (1. Kor. 9:20-23).
Wie kjennen Paulus nodoonen, wan wie Menschen trafen, waut nich horchen wellen ooda waut aun faulsche Lieren jleewen. Daut, waut wie von dee weeten, kaun ons halpen, dee eene “scheene Norecht” von waut bätret to brinjen (Jes. 52:7). Eene Sesta, waut Dorothy heet, sajcht: “Doa, wua wie prädjen, jleewen väle, daut Gott hoat es un de Menschen strofen well. Ekj low dee, daut see soo faust aun Gott jleewen, un proow dee dan to wiesen, waut de Bibel doaräwa sajcht, woo leeftolich Jehova es un waut dee noch mol fa ons doonen woat.”
“DOOT GOODET, OM DAUT BEESE UNJATOKJRIEEN”
Wie kjennen doaropp räakjnen, daut eenje Menschen, waut wie prädjen, emma dolla jäajen ons sennen woaren, je noda daut Enj kjemt (2. Tim. 3:1, 13). Oba wie sellen doawäajen nich ons Metjefeel ooda onse Freid velieren. Jehova kaun ons de Krauft jäwen toom “goodet [doonen], om daut beese unjatokjrieen” (Reem. 12:21). Jessica, eene Pionia-Sesta, vetalt: “Ekj bejäajen foaken Menschen, waut nich deemootich sent un sikj domm haben äwa ons un onse Norecht. Soont stieet mie eenjemol sea. Wan ekj met wäm räd, dan bäd ekj opp stelles om Help, daut ekj de Menschen soo see aus Jehova. Daut halpt mie doaraun to denkjen, woo ekj dee halpen kaun, un nich soo sea doaraun, waut mie stieet.”
Wie sieekjen wieda no dee, waut to daut eewje Läwen rajcht enjestalt sent
Eenje horchen met de Tiet un lieren de Woarheit kjanen
Wie sellen uk proowen, onse Gloowesbreeda Moot to moaken. Jessica sajcht: “Wan eena von ons waut schlajchtet beläft haft, dan räd ekj nich dän Tiet äwa doavon. Ekj proow leewa, von waut bätret to vetalen, biejlikj von daut, waut ons Deenst fa goodet brinjt, wan doa uk eenje jäajenaun sent.”
Jehova weet, waut vonne Schwierichkjeiten wie em Deenst bejäajnen. Hee freit sikj sea, wan wie soo metfeelent sent aus hee (Luk. 6:36). Oba Jehova woat nich fa emma metliedent un jeduldich sennen. Wie kjennen ons doaropp veloten, daut hee krakjt to de rajchte Tiet met dise Welt een Enj moaken woat. Oba bat dan mott wie onbedinjt prädjen (2. Tim. 4:2, NW). Doawäajen well wie flietich wiedaprädjen un “aule [Sorten] Menschen” Metjefeel wiesen.
