De Profeet Moses säd, daut wan wie Gott siene Jebooten jehorchen, dan woa wie sienen Säajen kjrieen (5. Mose 10:13; 11:27). Wie jehorchen Gott nich ut Angst fa siene Strof. Siene goode Perseenlichkjeit brinjt ons bat doa, daut wie am wellen ut Leew jehorchen un am nich wellen truarich moaken. “Wan wie Gott goot sent, dan hool wie siene Jebooten” (1. Johanes 5:3).

Oba wuahäa woa wie jesäajent, wan wie Gott jehorchen? Well wie mol tweeatlei seenen.

“Ekj sie de HAR, dien Gott, un ekj lia die daut, waut goot fa die es, un wies die dän Wajch, dän du gonen saust” (JESAJA 48:17)

Jehova Gott, ons Schepfa, kjant ons un jeft ons dän Rot, waut ons fält. Siene Lieren kjennen ons halpen, rajcht to entscheiden. Doatoo mott wie derch de Heilje Schreft seenen, waut Gott von ons velangt un daut dan uk nokomen.

“Jesäajent sent dee, dee Gott sien Wuat hieren, un doonen, waut daut sajcht” (LUKAS 11:28)

Millionende Menschen hoolen sikj aun Gott sien Wuat un sent doaderch schaftich. Een Maun en Spaunien biejlikj wort emma leicht doll un deed aundre schlajcht behaundlen – mau rajcht siene Fru. Eenen Dach läsd hee en dän Profeet Moses siene Schreften de Jeschicht von Jakob sienen Sän, Josef. Josef wort vekoft, toom Sklow jemoakt un ojjerajcht enjestopt, oba hee bleef ruich un frädlich un wia reed toom vejäwen (1. Mose, Kapitel 37 bat 45). De Maun von Spaunien sajcht: “Äwa Josef siene Enstalunk nodenkjen, holp mie, uk aun mie to schaufen un doaderch wort ekj ruja, leeftolja un kunn mie bäta beoabeiden. Un nu hab ekj een scheenet Läwen.”

De Heilje Schreft haft noch mea Rot fa ons, woo wie aundre behaundlen sellen. En dän näakjsten Artikjel es noch mea doaräwa jeschräwen.