De Schreft es nich een Buak toom doktren, oba dee haft gooden Rot fa soone, waut Narfentrubbel haben. See wie mol een poa Biespels.

“De jesunde brucken dän Dokta nich. Dän brucken mau de kranke.” (MATÄUS 9:12)

De Schreft sajcht, daut ons daut eenje Mol fält to doktren. Väle haft daut jeholpen, mea äwa äare Narfenkrankheit to weeten un uk wan dee Help kjrieen von de Doktasch.

“De kjarpaliche Eewunk halpt”. (1. TIMOTÄUS 4:8)

Wan eena soone Sachen deit, waut goot fa de Jesuntheit es, kaun daut uk fa de Narfenkrankheit halpen. Soone Sachen kjennen biejlikj sennen, daut eena pinkjlich ekserseisen deit, jesunt at un jenuach schlopen deit.

“Een frooet Hoat deit krakjt soo väl goot aus Medizien, oba eenen bedrekjten vedrieejen de Knoakes.” (SPRICHA 17:22)

Wan du soone Varzhen en de Schreft läst, waut die Moot jäwen, un die soont väanemst, waut du uk nokomen kaust, dan woascht du schaftja sennen. Wan du en dien Läwen no daut goode kjikjst un doaropp vetrust, daut daut lota noch mol woat bäta sennen, dan kaun die daut nu aul halpen, bäta met diene  Narfenkrankheit foadich to woaren.

“Met Deemoot kjemt uk Weisheit.” (SPRICHA 11:2)

Lot die von aundre met daut halpen, wua du nich auleen met foadich woascht. Veleicht wellen diene Frind un Famielje die wellich halpen, oba dee weeten nich woo. Saj dee, waut dee fa die doonen kjennen. Velang nich too väl von dee un sie dankboa fa de Help, waut dee die jäwen.

Nicole, a waut emma sea opp un dol met äare Jefeelen es (bipolar disorder/trastorno bipolar), sajcht: “Ekj wist, daut doa irjentwaut met mie orrajcht wia, un doawäajen fua ekj nom Dokta un dee funk dan rut, waut ekj haud. Dit holp mie to weeten, waut mie krakjt schod un waut vonne Doktarieen mie halpen kunnen fa miene Krankheit.”

Peter, waut foaken met de Narfen rauf es (depression/depresión), sajcht: “Wan ekj jieda Zemorjes met miene Fru toop de Schreft läs, daut halpt mie, goode Jedanken to haben, waut mie Moot jäwen. Un aun soone Doag, wua ekj mie sea rauf feel, es doa foaken een Bibelvarsch, waut mie sea to Hoaten jeit.”

Ji-yoo haft eene Krankheit, waut ar daut schwoa moakt, de rajchte Mot to äten (eating disorder/trastorno alimentario). See sajcht: “Ekj schämd mie sea, aundre daut to vetalen, waut vonne Krankheit ekj hab. Eene von miene sea goode Frind horcht mie goot too un proowd mie to vestonen. See holp mie, daut ekj mie bäta feeld un nich soo auleen.”

Timothy kaun nich kontrollen, waut hee denkjt, un hee deit emma un emma wada dautselwje (obsessive-compulsive disorder/trastorno obsesivo-compulsivo). Hee sajcht: “De Schreft haft mie jeholpen, utjejlikjta to sennen. Ekj näm mie jenuach Tiet toom vereiwen un doo nich soo sea schaufen. De Rot ut de Schreft haft mie jeholpen, bäta met miene Jefeelen foadich to woaren.”