EN DE poa Schreftstäden, wua daut von dän Enjel Michael schrift, deit dee emma irjentwaut besondret. En daut Buak Daniel rät daut doavon, daut dee jäajen beese Jeista kjamft, en Judas läs wie, daut dee met dän Fient stritt un en de Openboarunk heet daut, daut dee jäajen dän Soton un dän siene Enjel Kjrich fieet. Dee stritt fa Jehova siene Harschoft un kjamft jäajen Gott siene Fiend. Doawäajen es Michael uk de paussenda Nomen fa dän, wiels dee bediet “Wäa es soo aus Gott?”. Oba wäa es de Enjel Michael soo rajcht?

Eenjemol haft eent un deeselwje Persoon veschiedne Nomes. Biejlikj Jakob wort uk Israel jenant un de Apostel Petrus heet uk Simon (1. Mose 49:1-2; Matäus 10:2). De Schreft jeft auntovestonen, daut “Michael” een aundra Nomen fa Jesus es. Soo wort dee jenant, ea dee oppe Ieed kjeem un uk aus dee wada trigj em Himmel wia. Well wie mol seenen, wuarom wie daut sajen kjennen.

 Erzenjel. En Gott sien Wuat woat Michael “de gaunz huaga Enjel [“Erzenjel”, Friesenbibel]” jenant (Judas 9). Daut Wuat “Erzenjel” bediet “hechsta Enjel”. Daut jeft auntovestonen, daut Michael de eensja “gaunz huaga Enjel” es. En de Schreft rät daut noanich von miere Erzenjel. Ut 1. Tessalonicha 4:16 kjenn wie vestonen, daut daut Jesus Christus es. Doa sajcht daut: “De Har woat selfst vom Himmel raufkomen un lud sajen, waut passieren saul. De hechsta Enjel woat roopen”. Hia woat jesajcht, daut de Har Jesus, de hechsta Enjel, roopt. No daut no mott Jesus selfst de gaunz huaga Enjel Michael sennen.

Väaschta von een Häa. De Schreft sajcht: “Michael un siene Enjel kjriejden jäajen dän Droak un siene Enjel” (Openboarunk 12:7). Michael es aulsoo de Väaschta von een grootet Häa true Enjel. Dautselwje woat en de Openboarunk uk von Jesus jesajcht (Openboarunk 19:14-16). De Apostel Paulus rät uk von dän Harn “Jesus met siene jewaultje Enjel” (2. Tessalonicha 1:7). En de Schreft rät daut aulsoo von Michael un “siene Enjel” uk von Jesus un “siene Enjel” (Matäus 13:41; 16:27; 24:31; 1. Petrus 3:22). Oba daut sajcht noanich, daut daut em Himmel twee veschiedne Armeeen von true Enjel jeft, soo aus wudd een Häa von Michael jeleit woaren un daut aundre von Jesus. Doawäajen kjenn wie sajen, daut Michael de Nomen sennen mott, waut Jesus em Himmel haft. *