JAKOBUS un Judas wieren Jesus siene Haulfbreeda. Petrus un Johanes jehieeden to Jesus siene 12 Apostel. Dise vea Mana schreewen em gaunzen säwen Breew, dee en de Christliche Griechische Schreften to finjen sent un no an benant woaren. Gott haft dise Breef oppschriewen loten, wiels de Rot doa bennen Christen halpen kaun, am volstendich tru to bliewen un sikj aun sien Kjennichrikj to hoolen.

Gloowen bewiesen. Daut rieekjt nich too, bloos väajäwen, Gloowen to haben. Woara Gloowen es aun Woakjen to seenen. Jakobus schrift, daut de “Gloowen onen Woakjen doot” es (Jakobus 2:26). Een stoakja Gloowen halpt Christen, en schwoare Tieden uttohoolen. Doatoo motten dee oba om Weisheit bäden un faust doaropp vetruen, daut Gott an dee uk jäwen woat. Christen kjennen Gott jefaulen, wan see nich oppjäwen (Jakobus 1:2-6, 12). Gott halpt siene Deena, wan dee am ut Gloowen volstendich tru bliewen. Jakobus sajcht: “Nodat junt no Gott, dan woat hee uk dicht no junt komen” (Jakobus 4:8).

Christen motten eenen stoakjen Gloowen haben, daut see Onmoral un aundre Vesieekjungen wadastonen kjennen. Judas root siene Gloowesbreeda sea too, “fa dän Gloowen to kjamfen”, wiels dee medden mank Menschen wonden, waut een sea schlajchtet Läwen fieeden (Judas 3).

Een reinet Vehoolen. Jehova velangt von siene Deena, see sellen heilich sennen, daut meent, en aules rein sennen. Petrus schrift aun de Christen: ‘Jie sellen en aul june Wäaj heilich sennen. Wiels daut steit jeschräwen: “Ekj [Jehova] sie heilich un doawäajen sell jie heilich sennen”’ (1. Petrus 1:15-16). Christus jeef doarenn daut baste Väabilt. Petrus schrift: ‘Christus haft uk fa junt jeläden un junt doarenn een Väabilt jeloten, daut jie en siene Footspoaren gonen sellen’ (1. Petrus 2:21). Foaken woaren Christen schlajcht behaundelt, wiels see sikj aun Gott siene Jesazen hoolen, oba ver Gott kjennen see een reinet Jewessen haben (1. Petrus 3:16-17). Petrus rot Christen too, sikj heilich to vehoolen un Gott toom Jefaulen to läwen, wäarent see Gott sienen Jerechtsdach aufwachten uk de vesproakne niee Welt, “wua aules woat jerajcht sennen” (2. Petrus 3:11-13).

Leew bewiesen. “Gott es Leew”, schrift de Apostel Johanes. De Apostel wiest doaropp han, daut Gott siene groote Leew doaderch bewäsen haft, daut hee Jesus oppe Ieed schekjen deed, “ons de Sinden auftonämen”. Waut sellen Christen doahäa doonen? Johanes schrift wieda: “Leewe Frind, wan Gott ons soo goot es, dan sull wie ons uk unjarenaunda goot sennen” (1. Johanes 4:8, Friesen; 4:9-11). Eena kaun Leew bewiesen, wan eena oppnäment es un de Breeda unjastetten deit (3. Johanes 5-8).

Woo kjennen Christen wiesen, daut see Jehova leewen? En 1. Johanes 5:3 sajcht daut: “Wan wie Gott goot sent, dan hool wie siene Jebooten, un siene Jebooten sent nich schwoa.” Deejanje, waut Gott jehorchen, kjennen sikj secha sennen, daut Gott an emma woat goot sennen un an woat “daut eewje Läwen” jäwen (Judas 21).

Stett sikj opp de Bibelbieekja Jakobus, 1. Petrus, 2. Petrus, 1. Johanes, 2. Johanes, 3. Johanes un Judas.