EENE VETAL AUNFANGEN
3. KAPITEL
Leeftolich un frintlich sennen
De Gruntsauz: “Leew es frintlich” (1. Kor. 13:4)
Woo deed Jesus daut?
1. Kjikj ieescht daut VIDEO ooda läs Johanes 9:1-7, un dan denkj äwa dise Froagen no:
-
Funk Jesus fuaz aun, dän blinjen Maun von de goode Norecht to vetalen, ooda deed Jesus am ieescht heelen? (See uk Johanes 9:35-38.)
-
Waut jleefst du, wuarom wia de Maun reed, Jesus tootohorchen?
Waut lia wie von Jesus?
2. Wan de Menschen daut späaren, daut wie werkjlich om dee bekjemmat sent, dan woaren dee ea reed sennen, no de goode Norecht to horchen.
Woo kaust du Jesus nodoonen?
3. Feel met dänjanjen met. Proow to vestonen, woo dän daut jeit.
-
Denkj mol äwa dit no: Äwa waut sorcht dee sikj veleicht? Waut kaun dän veleicht halpen? Waut wudd dee jleichen to weeten? Wan du äwa dise Froagen nodenkjst, kaun die daut halpen, leeftolich un opprechtich om dän bekjemmat to sennen.
-
Wan dee die siene Meeninj sajcht ooda waut fa Trubbels dee haft, dan horch dän too un räd nich eefach von waut aundret. Wan du goot toohorchst, dan wiest du, daut die daut intressieet, waut fa dän wichtich es.
4. Räd leeftolich un respakjtvoll. Wan du Metjefeel hast un dän werkjlich halpen west, dan woat daut aun diene Stemm uk to hieren sennen. Pauss opp, waut du sajchst un woo du daut sajchst, un saj nich soont, waut dän beleidjen kunn.
5. Sie reed to halpen. Sieekj no Jeläajenheiten, waut goodet fa dänjanjen to doonen. Dan woat dee ea met ons räden wellen.
