Aus David Goliat dootjemoakt haud, muak Saul dän toom Väaschten äwa siene Soldoten. David jewonn foaken em Kjrich un wort wiet bekaunt. Emma wan David vom Kjrich trigjkjeem, kjeemen de Frues rut un daunzten un sungen: “Saul haft dusende doljeschloagen un David haft tieendusende!” Saul wort David aufjenstich un wull dän dootmoaken.

David vestunt sea fein, met de Hoap to spälen. Eemol aus David jroz fa Saul met de Hoap späld, schmeet de Kjennich sienen Spies no dän. David tekjt enne Tiet tosied un de Spies fua enne Waunt nenn. Lota proowd Saul noch ieremol, David doottomoaken. Dan rand David wajch un vestuak sikj enne Wiltnis.

Saul neem 3 000 Soldoten un wull sikj David jriepen. Nu jinkj Saul noch krakjt en dee Heel nenn, wua David un siene Mana  sikj vestoaken hauden. David siene Mana fuschelden un säden: “Nu kaust Saul dootmoaken.” David kroop no dän Kjennich un schneet een Biet von dän sienen Äwarock auf. Saul wort daut nich en. Lota jinkj David daut sea schlajcht, daut hee respakjtloos to Jehova sienen jesaulwden Kjennich jewast wia. Hee leet daut nich, daut siene Mana Saul waut doonen kunnen. David roopt Saul un säd, daut hee am wudd haben kunt dootmoaken. Docht Saul nu aundasch äwa David?

Nä. Saul leet David nich tofräd. Eene Nacht schlikjten David un siene Sesta äa Sän Abischai sikj no Saul un siene Soldoten. Aule schleepen, mau rajcht Abner, Saul sien Woaka. Abischai säd: “Lot mie Saul dootmoaken! Nu, wan wie kjennen!” David säd: “Jehova woat met Saul veräakjnen. Well wie ons bloos sienen Spies un siene Wotakruck nämen un dan well wie gonen.”

David jinkj opp eenen Boajch nopp, waut dicht bie Saul un siene Mana wia. David breld: “Abner, wuarom paust du nich no dienen Kjennich opp? Wua es Saul siene Wotakruck un sien Spies?” Saul hieed, daut et David wia, un säd: “Du hautst mie kunt dootmoaken, oba du hast nich. Ekj weet, du woascht de näakjsta Kjennich en Israel sennen.” Saul jinkj wada trigj no sien Kjennichshus. Oba nich aule von Saul siene Famielje kunnen David schlajcht lieden.