De Breef aun de Kolossa 3:1-25
3 Oba wan jie sent met dän Christus toop oppjestonen, dan sieekjt wieda no de Sachen von bowen, wua de Christus bie Gott siene rajchte Sied sett.
2 Hoolt jun Vestaunt bie de Sachen dort bowen, nich bie de Sachen oppe Ieed.
3 Wiels jie sent jestorwen un jun Läwen es en dän Christus vestoaken, dee met Gott veeent es.
4 Wan de Christus, waut ons Läwen es, ieescht verendach kjemt, dan woa jie uk met am toop en Harlichkjeit verendach komen.
5 Doawäajen moakt jieda orrajchten Wunsch en junt doot, waut to soont fieren kunn aus sintelje Sorten Sex*; Orreinet; onkontroldet Sex-Velangen; Wenschen, waut Schoden aunrechten; un Bejia, waut eene Sort Aufjettarie es.
6 Wäajen soone Sachen aus dit kjemt Gott siene Wutt.
7 Dits, woo jie junt en jun Läwen ea uk oppstalden.
8 Oba nu moakt junt von aul dit loos: von Wutt, Oaja, Schlajchtet, hunjsche Räd un schwiensche Räd.
9 Doot junt nich unjarenaunda väalieejen. Trakjt junt de oole Natua* met äare Woakjen toop ut
10 un kjleet junt met de niee Natua. Dee woat doaderch emma wieda niejemoakt, daut jie Gott bäta kjanen lieren. Dise Natua likjent dän, waut dee jemoakt haft.
11 Dauts endoont aus een Mensch een Griech es ooda een Jud, aus dee beschnäden es ooda onbeschnäden, aus daut een Utlenda es ooda een Skiet*, een Sklow ooda eena, waut frie es. Oba de Wichtichsta es Christus, waut met aules veeent es.
12 Wiels jie Gott siene Utjewälde sent, un siene heilje un leewe Kjinja sent, kjleet junt met Metjefeel un Leew, met leeftolich sennen, met Deemoot, met ruich enjestalt sennen un met Jedult.
13 Vedroacht junt wieda unjarenaunda un siet emma wellich reed toom vejäwen, mau rajcht wan jie uk eene Uasoak haben, jäajen eenen aundren to kloagen. Krakjt soo aus Jehowa* emma wellich reed es, junt to vejäwen, soo doot jie daut uk.
14 Oba buta aul dit kjleet junt met Leew, wiels daut veeenicht de Menschen opp eene volkomne Wajch.
15 Un lot uk Christus sienen Fräd en june Hoaten rejieren*, wiels Gott haft junt jewält, daut jie soo aus Poats* von eenen veeenden Kjarpa sent un Fräd haben. Un wiest, daut jie dankboa sent.
16 Lot Christus siene Lia volstendich en junt wonen un junt weis moaken. Doot junt wieda unjarenaunda lieren un Moot toospräakjen met Psalmen. Doot daut uk doaderch, daut jie Gott derch sinjen preisen un ut Dankboakjeit jeistelje Leeda sinjen. Sinjt en june Hoaten fa Jehowa*.
17 Wautemma jie doonen ooda sajen, doot daut emma en dän Harn Jesus sienen Nomen, un dankt Gott, dän Voda, derch am.
18 Jie Ehefrues, siet june Ehemana unjadon, soo aus daut von dän Harn siene Nofolja velangt woat.
19 Jie Ehemana, leeft june Ehefrues wieda un siet nich doll* to dee.
20 Jie Kjinja, siet june Elren en aule Stekjen jehuarsom, wiels daut es, waut de Har jleicht.
21 Jie Vodasch, doot june Kjinja nich veoajren, soo daut dee nich mootloos woaren.
22 Jie Sklowen, siet june menschelje* Haren* en aule Stekjen von Hoaten jehuarsom. Doot daut nich bloos, wan dee junt beoobachten*, aulsoo bloos toom Menschen jefaulen, oba ut Forcht fa Jehowa*.
23 Wautemma jie doonen, doot daut met june gaunze Seel*, soo aus fa Jehowa* un nich fa Menschen.
24 Wiels jie weeten, daut et Jehowa* es, dee junt daut Oafgoot woat aus Beloonunk jäwen. Deent dän Harn, Christus, aus Sklowen.
25 Dee, waut orrajcht deit, woat secha doafäa bestroft woaren, un Gott moakt kjeenen Unjascheet.
Footnooten
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ Wuatlich: “dän oolen Mensch”.
^ En de ieeschtemmasche Tieden wieren daut Menschen, opp dee raufjekjikjt wort wäajen dee äare Jewanheiten un woo dee sikj beneemen.
^ See Wuaterkjläarunk bie “Jehowa”.
^ Ooda: “june Hoaten kontrollen”.
^ Ooda: “Jläda”.
^ See Wuaterkjläarunk bie “Jehowa”.
^ Ooda: “hunjsch”.
^ Wuatlich: “fleeschelje”.
^ Ooda: “Wieets”.
^ Wuatlich: “om daut Uag to deenen”.
^ See Wuaterkjläarunk bie “Jehowa”.
^ See Wuaterkjläarunk bie “Seel”.
^ See Wuaterkjläarunk bie “Jehowa”.
^ See Wuaterkjläarunk bie “Jehowa”.
