Jeschräwen von Matäus 6:1-34
6 Siet väasechtich, daut jie ver de Menschen nich goodet doonen, bloos om jeseenen to sennen. Wiels wan jie daut doonen, dan woa jie von junen Voda em Himmel kjeene Beloonunk kjrieen.
2 Soo, wan du de Oame ut Metleet waut jefst, dan lot ver die nich de Trompeet blosen, soo aus de Heichla daut en de Juden äare Vesaumlungshiesa* un oppe Gaussen doonen, om von de Menschen jeieet to woaren. Ekj saj junt daut soo, aus et es: Dee haben aul äa gaunzet Loon jekjräajen.
3 Oba wan du de Oame halpst, wäajen du Metleet hast, dan lot diene linkje Haunt daut nich weeten, waut de Rajchte deit,
4 soo daut et nich fa aulem to seenen es. Dan woat dien Voda, waut daut sitt, wan aundre daut uk nich seenen, die doafäa beloonen.
5 Un wan du bätst, dan doo daut nich soo aus de Heichla, wiels dee jleichen daut, en äare Vesaumlungshiesa* un oppe Akjen von de groote Gaussen to stonen un to bäden, daut de Menschen äant seenen sellen. Ekj saj junt daut soo, aus et es: Dee haben aul äa gaunzet Loon jekjräajen.
6 Oba wan du bätst, dan go fa die auleen en diene Stow un wan du de Däa toojemoakt hast, dan bäd to dienen Voda. Kjeena kaun am seenen, oba hee sitt aules un hee woat die doafäa beloonen.
7 Wan du bätst, dan saj nich emma un emma wada dautselwje äwa, soo aus dee Sorten Menschen* doonen, waut nich weeten, woo Gott aunjebät mott. Dee jleewen, wan see väl Wieed sajen, dan woaren äare Jebäda jehieet woaren.
8 Sie nich soo aus dee, wiels jun Voda weet daut, waut junt fält, mau rajcht noch ea jie doarom bäden.
9 Jie sellen leewa soo aus dit bäden:
‘Ons Voda em Himmel, lot dienen Nomen jeheilicht woaren*.
10 Lot dien Kjennichrikj komen; lot dienen Wellen oppe Ieed krakjt soo jedonen woaren aus em Himmel.
11 Jeff ons daut Broot, waut ons vondoag fält.
12 Vejeff ons daut, waut wie veschulcht haben, krakjt soo aus wie dee daut aul vejäft haben, waut sikj aun ons veschulcht haben.
13 Halp ons, nich notojäwen, wan wie aufjeprooft* woaren, un moak ons frie* von dän Beesen.’
14 Wiels, wan jie de Menschen daut vejäwen, waut dee orrajcht doonen, dan woat jun Voda em Himmel junt uk vejäwen.
15 Oba wan jie de Menschen daut nich vejäwen, waut dee orrajcht doonen, dan woat jun Voda em Himmel junt uk nich vejäwen.
16 Wan du fausten* deist, dan hia opp met een truajet Jesecht wiesen, soo aus de Heichla doonen. Wiels dee vestalen äare Jesechta*, soo daut de Menschen denkjen sellen, daut see fausten. Ekj saj junt daut soo, aus et es: Dee haben aul äa gaunzet Loon jekjräajen.
17 Oba wan du fausten deist, dan wausch dien Jesecht un doo Parfum-Eelj opp dienen Kopp nopp*.
18 Soo woaren de Menschen daut nich seenen kjennen, daut du fausten deist, oba bloos dien Voda, waut aules sitt. Dan woat hee die doafäa beloonen.
19 Hieet opp, junt wieetvolle Sachen oppe Ieed opptoklompen, wua de Motten* un daut Rosta daut vefräten un wua de Stäla enbräakjen un junt daut fuatstälen.
20 Enne Städ daut, saumelt junt soont, waut fa Gott em Himmel wieetvoll es. Daut woaren de Motten un daut Rosta nich vefräten un de Stäla woaren doa nich enbräakjen kjennen un junt daut fuatstälen.
21 Wiels daut, waut fa die wieetvoll es, bie daut woascht du uk dienen Kopp* haben.
22 De Uagen sent soo aus eene Laump von dän Kjarpa. Wan de Uagen dan kloa no eenatlei kjikjen*, dan woat de gaunza Kjarpa dach sennen*.
23 Oba wan diene Uagen aufjenstich* sent, dan woat dien gaunza Kjarpa diesta sennen. Un woo schlemm daut nich es, wan daut Licht en die diesta woat.
24 Kjeena kaun een Sklow sennen von twee Wieets. Hee woat entwäda dän eenen haussen un dän aundren leewen ooda sikj aun dän eenen hoolen un dän aundren veachten. Jie kjennen nich Gott siene Sklowen sennen un to deeselwje Tiet Sklowen sennen von daut Jelt*.
25 Doawäajen saj ekj junt: Hieet opp, junt Sorjen to moaken äwa jun Läwen*; biejlikj waut jie äten ooda drinkjen woaren ooda äwa junen Kjarpa, soo aus waut jie junt auntrakjen woaren. Es daut Läwen* nich mea wieet aus daut Äten un de Kjarpa mea wieet aus de Kjleedie?
26 Beoobacht mol krakjt de Väajel enne Loft. Dee seien nich un arnten uk nich un saumlen nuscht enne Spikjasch un doch feet jun himlischa Voda dee. Sent jie nich mea wieet aus de Väajel?
27 Wäa von junt kaun sien Läwen een kjlien bät aunlenjen*, wan dee sikj Sorjen moakt?
28 Krakjt soo uk: Woosoo moak jie junt Sorjen äwa de Kjleedie? Lieet von de Bloomen* oppe Stap, woo dee waussen. Dee doonen nich schwoa schaufen un neien uk nich Kjleeda*.
29 Oba ekj saj junt, daut nich mol Sa̱lomo, waut soo rikj wia, soo schmock jekjleet wia aus eene von dise.
30 Soo, wan Gott dise Plaunten oppe Stap aul soo schmock moakt, waut vondoag hia sent un morjen em Owen jeschmäten woaren, woat hee junt dan nich noch väl ea kjleeden, jie, met soonen kjlienen Gloowen?
31 Doawäajen moakt junt nienich Sorjen un sajcht: ‘Waut sell wie äten?’ ooda ‘Waut sell wie drinkjen?’ ooda ‘Waut sell wie ons auntrakjen?’
32 Wiels dit sent aules soone Sachen, wua de Menschen, waut Gott nich kjanen*, sea hinjaraun no sent. Oba jun himlischa Voda weet, daut junt aul dit fält.
33 Doawäajen, sieekjt wieda daut ieeschte no Gott sien Kjennichrikj un doot daut, waut hee fa rajcht talt*, un dan woat hee junt aul daut aundre uk noch jäwen.
34 Soo, moakt junt nienich Sorjen äwa dän näakjsten Dach, wiels de näakjsta Dach woat aul siene ieejne Sorjen haben. Jieda Dach haft fa sikj aul jenuach Trubbels.
Footnooten
^ Wuatlich: “en de Sinagogen”.
^ Wuatlich: “en äare Sinagogen”.
^ Ooda: “dee Velkja”; “dee Raussen”.
^ Ooda: “heilich jehoolen woaren”; “heilich behaundelt woaren”.
^ Ooda: “vesocht”.
^ Ooda: “un rad ons”.
^ Ooda: “sent endoontich, woo daut met äant lat”.
^ Ooda: “doo diene Hoa besorjen”.
^ Ooda: “daut Ojjezeffa”.
^ Wuatlich: “dien Hoat”.
^ Wuatlich: “eefach kjikjen”.
^ Ooda: “voll Licht sennen”.
^ Wuatlich: “schlajcht”; “bees”.
^ Ooda: “Rikjtum”.
^ Ooda: “june Seel”.
^ Ooda: “de Seel”.
^ Wuatlich: “Lelje”.
^ Wuatlich: “spennen nich”.
^ Wuatlich: “de Velkja”.
^ Wuatlich: “sieekjt no siene Jerajchtichkjeit”.
