Vejäwen meent, daut wie wäm daut togood hoolen, wan dee ons beleidicht haft. Daut griechische Wuat, waut enne Schreft met “Vejäwunk” äwasat woat, bediet “daut gonen loten”; soo aus wan wäa eene Schult strikjt un daut nich trigjfoddat. Jesus deed daut uk soo vejlikjen, aus hee siene Nofolja soo aus dit lieed bäden: “Vejeff ons onse Sinden, wiels wie vejäwen uk aule dee ons schuldich sent” (Lukas 11:4, PB). Bie de Jeschicht von dän ondankboaren Kjnajcht, deed Jesus vejäwen uk met Schult strikjen vejlikjen (Matäus 18:23-35).

 Wie vejäwen wäm, wan wie nich mea waut jäajen dän haben. Wie velangen uk nich, daut dee ons waut trigjtolt fa dän Schoden, waut dee ons aunjedonen haft. De Schreft lieet, daut groote Leew fa aundre ons halpt, opp iernst to vejäwen, wiels Leew “es nich nodroagent” (1. Korinta 13:4-5, PB).

Waut Vejäwunk nich meent

•   Orrajchtet fa goot talen. De Schreft veuadeelt deejanje, waut doa endoontich sent äwa Schlajchtet ooda daut mau rajcht fa gootheeten (Jesaja 5:20).

•   Soo doonen, aus wan nuscht jewast wia. Gott vejeef dän Kjennich David groote Sinden. Oba hee bewoad am nich fa de Trubbels, waut hee sikj doaderch enjerieet haud. Gott leet David siene Sinden mau rajcht enne Schreft oppschriewen, daut wie vondoag dän Dach uk noch doavon läsen kjennen (2. Samuel 12:9-13).

•   Sikj loten von aundre utnutzen. Saj wie mol, du hast wäm Jelt jelieet, oba dee vekwost daut un kaun die daut dan nich trigjtolen, soo aus hee vesproaken haud. Dän deit daut sea leet un dee frajcht die om togood hoolen. Du wurscht kjennen dän daut vejäwen un proowen nich lang doll äwa dän to sennen, un uk nich emma wada von de Sach räden. Du wurscht uk kjennen dän siene Schult gaunz strikjen, wan du wust. Oba daut näakjste Mol woascht du dän veleicht kjeen Jelt mea lieen (Psalm 37:21; Spricha 14:15; 22:3; Galata 6:7).

•   Vejäwen, onen eenen rajchten Grunt. Gott vejeft soone Menschen nich, waut met Fliet un ut eenen schlajchten Senn sindjen, äare Fäla nich toostonen, sikj nich endren un nich dee om togood hoolen froagen, waut see Schoden aunjedonen haben (Spricha 28:13; Aposteljeschicht. 26:20; Hebräa 10:26). Soone Menschen, waut daut nich leet es, waut see doonen, woaren Gott siene Jäajna. Un hee velangt von ons nich, daut wie sellen soone vejäwen, waut hee uk nich vejeft (Psalm 139:21-22).

   Waut, wan die wäa sea groff behaundelt haft un dee well die nich mol om togood hoolen froagen ooda dee well daut nich mol toostonen, waut dee jedonen haft? De Schreft jeft disen Rot: “Hool die wajch fonn Oaja, un hia opp met Wut” (Psalm 37:8, NTR). Wan du daut schlajchte uk nich fa goot talst, saust du die oba nich loten vebetren. Vetru doaropp, daut Gott dänjanjen rechten woat (Hebräa 10:30-31). Die kaun daut uk treesten to weeten, daut Gott boolt doano seenen woat, daut wie ons nich mea soo schlajcht feelen woaren aus nu (Jesaja 65:17; Openboarunk 21:4).

•   Aules to “vejäwen”, waut se eenem minkj aunjedonen haben. Eenjemol es daut nich mol needich, waut to vejäwen, wäajens wan wie äwa de Sach goot nojreblen, woa wie en, daut wie nich mol eenen Grunt haben, beleidicht to sennen. De Schreft sajcht: “Lot die nich leicht enoajren; wiels de Schosel drajcht dän Oaja em Hoat” (Liera 7:9).

Waut kaun ons halpen, wäm to vejäwen?

1.   Denkj doaraun, waut bie vejäwen met en es. Eena deit daut Schlajchte nich fa gootheeten un eena deit sikj uk nich soo, aus wan daut verheipts goanich passieet wia. Eena lat daut eefach gonen.

2.   Dän Nutzen seenen. Wan eena nich oajalich blift un nich lang aune Wutt fausthelt, kaun eenem daut halpen, ruich to bliewen un jesunda un schaftja to sennen (Spricha 14:30; Matäus 5:9). Un waut noch wichtja es, Gott woat ons dan uk onse ieejne Sinden vejäwen (Matäus 6:14-15).

3.   Metjefeel haben. Wie aula moaken bieaun Fäla (Jakobus 3:2). Wie sent sea dankboa, wan aundre ons dee togoodhoolen, un krakjt soo wudd wie dan uk sellen reed sennen, aundre waut to vejäwen (Matäus 7:12).

4.   Jedult haben met aundre. Wan daut mau waut kjlienet wia, waut ons stieed, kjenn wie veleicht eefach disen Rot ut de Schreft nokomen: “Vedroacht eena dän aundren” (Kolossa 3:13, PB).

5.   Doo fuaz waut. Proow, daut du soo schwind aus mäajlich vejäwen kaust. Doo nich wachten, bat de Wutt emma jrata woat (Efeesa 4:26-27).