DENK MOLL VEYYICH DESS: Du bisht inna shtoah foll mitt antiques. Mensht funn si gukka ausgvoahra. Un samm funna henn parts missing. Avvah aynah, is noch alles zammah un gukt reeli shay. Du frohksht ebbah, “Is deah neiyah es di anri?” Si sawwa “Nay, ’sis eldah es’s mensht funn di anri antiques, un hott nee nett kfixt sei missa.” Du frohksht, “Voah deah may protekt es di anri?” Da person sawkt, “Nay, deah is aekshli deich may ganga es en latt funn di anri. Un feel leit henn boviaht’s fadauva.” Du vunnahsht fleicht, ‘Vass is dess gmacht difunn?’

Inna vayk, di Bivvel is vi sellah shay antique. Es is en reeli ald buch, eldah es’s mensht funna. Es sinn aw anri aldi bichah. Avvah yusht vi en antique es fadauva is, ’s mensht funn di aldi bichah sinn reeli fadauva vadda mitt zeit. Fa’n example, di sacha es kshrivva voahra in di aldi bichah voahra letz geprooft bei neiy research es gedu vadda is. Un’s medical information es si katt henn hott oft may shawda gedu es goot. Un feel parts funn di aldi shreivinga sinn missing, faloahra, adda fadauva vadda.

Avvah di Bivvel is nett vi sell. Si henn kshteaht di Bivvel shreiva ivvah 3,500 yoah zrikk, avvah ’sis nee nett fadauva adda faloahra vadda. Even vann leit di Bivvel kast henn un boviaht henn’s fabrenna, adda boviaht anri halda funn’s laysa, vass kshrivva is drinn hott nett getshaynsht. Even vann di Bivvel en ald buch is, es kann nee nett letz geprooft sei mitt neiyi sacha es leit lanna. Di Bivvel helft em yusht so feel nau es vann si seahsht kshrivva voah.​—Gukket aw di box “Outdated or Ahead of Its Time?”

Du mechsht fleicht vunra, ‘Dutt di Bivvel aekshli uns helfa heit?’ Fa da ensah finna, frohk dich selvaht: ‘Vass sinn samm funn di shlimshti problems es mensha deela mitt heit? Vels funna is’s shlimsht zu dich?’ Fleicht denksht du funn war, pollution, leit es veesht sinn un nett honest. Nau gukk an samm funn di sacha es di Bivvel teetsht. Veil’s du dess dusht, frohk dich selvaht, ‘Vann leit layva dayda bei vass di Bivvel sawkt, veah di veld nett en bessahrah blatz?’

FRIDDA MACHA

Haebbi “sinn selli vo fridda shaffa. Si zayla Gott sei kinnah kaysa vadda.” (Matthäus 5:9) “Vann’s meeklich is, un so feel es diah kennet, layvet in fridda mitt awl mensha.”​—Römer 12:18.

GOOT DU ZU ANRI UN GEAHN FAGEVVA

Haebbi “sinn selli vo bamhatzich sinn. Si zayla bamhatzichkeit greeya.” (Matthäus 5:7) “Doond uf mitt-nannah, un fagevvet nannah vann ebbah ebbes hott geyyich en anra. Vi da Hah eich fagevva hott, so missa diah fagevva.”​—Kolosser 3:13.

NETT PREJUDICE SEI

Gott “hott funn ay bloot awl di sadda leit un kshlechtah gmacht es uf di gans eaht voona.” (Apostelgeschichte 17:26) “Gott dutt nett dayl leit haychah hayva es anri, avvah alli sadda leit vo Gottes-furcht in sich henn un recht doon, sinn ohgnumma bei eem.”​—Apostelgeschichte 10:34, 35.

RESPEKT FA DI EAHT

“No hott Gott da HAH da mann gnumma un hott een in da Goahra-Ayden gedu fa en uf halda un acht gevva uf en.” (1 Mosi 2:15) Gott zayld “selli doht macha es di eaht fadauva.”​—Offenbarung 11:18.

HASSA VASS GOTT HAST

“Gevvet acht un vatshet eich veyyich lusht fa nadiahlichi sacha; en mann sei layva is nett uf gmacht mitt vi feel es eah aykend.” (Lukas 12:15) “Losset nett huahrahrei un ennichi unreinichkeit, adda lusht fa sacha even gnohmd sei unnich eich, fa dess is nett shiklich unnich heilichi leit.”​—Epheser 5:3.

HONEST SEI UN HATT SHAFFA

“Vella en goot layves-lawf fiahra in alli sacha.” (Hebräer 13:18) “Loss deah vo kshtohla hott nimmi shtayla, avvah loss een shaffa.”​—Epheser 4:28.

’SIS IMPORTAND FA SELLI HELFA ES HILF BRAUCHA

“Drayshtet selli vo vennich moot henn, drawwet di shvacha, un seind geduldich mitt alli-ebbah.” (1 Thessalonicher 5:14) “Ma dutt di kinnah unni eldra un di vitt-veivah psucha in iahra dreebsawl.”​—Jakobus 1:27.

Di Bivvel sawkt uns nett yusht vass fa du, avvah es sawkt uns vi fa’s apleiya in unsah layva. Vann may leit aekshli layva dayda bei vass di Bivvel sawkt, veah’s nett reasonable fa denka es’s vennichah problems veahra in di veld? Vass di Bivvel sawkt dutt uns nau may bennafida es selayva difoah! Vi kann di Bivvel dich helfa grawt nau?

En mann mitt feel veisheit hott ay moll ksawt: “Di veisheit veist sich recht bei vass see dutt.” (Matthäus 11:19) Daytsht du nett agreeya es da besht vayk fa ausfinna eb di Bivvel em helfa kann is bei’s apleiya in em sei layva un no gukka vi’s ausshaft? So du mechsht denka: ‘Vann di Bivvel em helfa kann, sett’s nett mich helfa goot du in mei layva? Vi kann’s mich helfa mitt di problems es ich deel mitt grawt nau?’ Do’s en example.

Di Dorothy * voah immah bissi un hott en haebbi layva katt. Avvah, yusht vi sell, hott iahra layva getshaynsht. Iahra yung maydel is kshtauva, iahra mann hott see falossa, un’s voah hatt fa see financially. See hott ksawt: “Ich habb yusht nimmi gvist vi fa on​—kenn maydel, kenn mann, un kenn blatz fa voona. Ich habb kshpiaht es vann mei layva kenn mayning may katt hott.”

Mitt vass kaebbend hott, hott di Dorothy ksenna vi voah es di vadda an Psalm 90:10 sinn: “Di leng funn unsah dawwa sinn sivvatzich yoah, adda achtzich, vann miah shteik sinn; avvah di besht funna bringa yusht eahvet un druvvel, si sinn glei ivvah un miah sinn nimmi do.”

Di Dorothy hott hilf grikt funn di Bivvel deich selli haddi zeida in iahra layva. Es hott si reeli kolfa. En latt anri leit henn aw auskfunna es di Bivvel kann si helfa mitt iahra problems vann si doon vass’s sawkt. Si henn kfeeld es di Bivvel is vi sellah antique es kshvetzt voah diveyya an da shteaht funn deah article. ’Sis goah nett vi anri bichah es ald vadda un nimmi apleiya zu unsah dawk. Is’s because di Bivvel iahra message kumd funn Gott? Kend’s aekshli sei es’s Gott sei gedanka sinn un nett yusht mensha iahrani?​—1 Thessalonicher 2:13.

Du hosht aw andem auskfunna es layva is katz un foll mitt problems. Vann du overwhelmed bisht mitt problems, vo guksht du fa kamfirt, support, un goot advice?

Do sinn drei vayya es di Bivvel dich helfa kann in dei layva. Es kann dich helfa fa

1. problems avoiyda vann’s possible is.

2. problems ausshaffa es uf kumma.

3. able sei fa deela mitt situations es ma nett tshaynsha kann.