SECTION 9
Families—Deenet Jehova Mitt-Nannah
Deenet “deah vo da Himmel un di eaht . . . gmacht hott.”—Di Offenbarung 14:7
Du hosht gland in deah brochure, es di Bivvel hott feel gebodda es dich un dei family helfa zayld. Jehova vill havva es du haebbi bisht. Eah fashprecht es vann du een seahsht haldsht in dei layva, no zaylsht du “aw awl dee anri sacha havva.” (Matthäus 6:33) Eah vill reeli havva es du sei friend bisht. Mach shuah es du zeit nemsht fa dei friendship mitt Jehova bessah macha. Dess is’s besht ding es ebbah havva kann.—Matthäus 22:37, 38.
1 MACH DEI RELATIONSHIP MITT JEHOVA BESSAH
VASS DI BIVVEL SAWKT: “Ich zayl en Faddah sei zu eich, un diah zaylet mei boova un mayt sei,” sawkt Jehova. (2 Korinther 6:18) Gott vill havva es du sei klohsah friend vadda dusht. Ay vayk es ma dess du kann is bei bayda. Jehova vill havva es du baytsht “unni nohch lossa.” (1 Thessalonicher 5:17) Eah vill heahra vass in dei hatz is un vass dich baddaht. (Philipper 4:6) Vann du baytsht mitt dei family zayla see sayna vi real es Gott is zu dich.
’S nemd may es yusht shvetza zu Gott, avvah ma muss aw ab heicha zu een. Du kansht dess du bei di Bivvel shtodya un aw publications es gebayst sinn uf di Bivvel. (Psalm 1:1, 2) Denk deef ivvah di sacha es du lansht. (Psalm 77:11, 12) Ab heicha zu Gott maynd aw es du reklah zu di fasamling gaysht.—Psalm 122:1-4.
Shvetza zu anri veyyich Jehova is noch en importandah vayk fa dei relationship bessah macha mitt een. Di may es dess dusht, di naychah es du shpiahra zaylsht zu een.—Matthäus 28:19, 20.
VASS DU KANSHT:
-
Nemm zeit fa bayda un di Bivvel laysa alli dawk
-
Di family sett spiritual sacha seahsht du eb anri sacha, so vi fann havva adda’s eesi nemma
2 MACHET’S FAMILY-ZEIT FA JEHOVA FANN
VASS DI BIVVEL SAWKT: “Kummet nayksht zu Gott un eah kumd nayksht zu eich.” (Jakobus 4:8) Machet en sketshel un boviahret dibei bleiva fa reklah family-zeit havva fa Jehova. (1 Mosi 18:19) Avvah’s nemd noch may. Gott muss part funn dei layva sei alli dawk. Machet di family iahra relationship mitt Gott shteikah bei shvetza veyyich een “vann diah in eiyah haus hokket, vann diah uf em vayk lawfet, vann diah eich anna layyet un vann diah uf shtaynd.” (5 Mosi 6:6, 7) Machet’s eiyah goal fa sei vi da Joshua vo eah ksawt hott: “so veit es es mich un mei family ohgayt, miah zayla” Jehova deena.—Joshua 24:15.
VASS DU KANSHT:
-
Machet so’s alli ebbah in di family grikt vass si braucha in eiyah reklah family-zeit fa Jehova
