Di Bivvel teetsht es vann ma reeli bays vatt kann’s shawda du zu da person es bays is un zu selli rumm een. (Shpricha 29:22) Daylmohls hott ma fleicht en goodah reesin fa bays sei, avvah di Bivvel sawkt selli es ohhalda nei gevva zu “zann” zayla nett ayvich layva greeya. (Galater 5:19-21) Di Bivvel kann ebbah helfa es en problem hott mitt bays vadda.

•  Is es immah letz fa bays vadda?

•  Vann is’s letz fa bays sei?

•  Vi kansht du deela mitt zann?

•  Verses in di Bivvel es shvetza veyyich bays sei

 Nay. In samm situations is es nett letz fa bays vadda. Fa’n example, da faythfel mann Nehemia, is “oahrich bays” vadda vann eah keaht hott es sei breedah un shveshtra letz gyoost vadda sinn.​—Nehemia 5:6.

 Es sinn zeida vann Gott bays vatt. Fa’n example, Jehova sei zann hott “hays gebrend” vann di Israeliddah iahra promise nett kalda henn fa yusht een deena un henn kshteaht falshi gettah ohbayda. (Richtah 2:13, 14) Jehova dutt nett kshvind bays vadda, avvah vann eah dutt is’s fa’n goodah reesin, un eah dutt’s kantrohla.​—2 Mosi 34:6; Jesoiya 48:9.

 ’Sis letz fa bays sei vann ma’s nett kantrohla kann adda vann ma nett en goodah reesin hott. Un, sell is vass ma oft saynd mitt mensha. Fa’n example:

•   Da Koin is “oahrich fazand” vadda vann Gott sei sacrifice nett eksept hott. Da Koin hott sei zann glost so shlimm vadda es eah sei broodah doht gmacht hott.​—1 Mosi 4:3-8.

•   Da prophet Jona is reeli “bays” vadda vann Gott goot-maynich voah zu di Ninevites. Gott hott da Jona ksawt, eah hott nett’s “recht fa bays sei” un eah hett sorry feela sedda fa di leit es repent henn funn iahra sinda.​—Jona 3:10–4:1, 4, 11. a

 Dee examples veisa es “da zann funn mensha shaft di gerechtichkeit funn Gott nett aus.”​—Jakobus 1:20.

•   Fashtay vass haebna kann vann zann nett kantrohld is. Samm leit denka’s gebt si may power vann si iahra zann veisa. Avvah, vann ebbah nett sei zann kantrohla kann, is’s en sign funn weakness. “En mann es sei zann nett zrikk hayva kann, is vi en uffeni shtatt unni mavvahra.” (Shpricha 25:28; 29:11) Di voahret is, ma veist em sei power bei lanna em sei zann unnich kantrohl halda un sell veist es ma ufshtay kann fa vass goot is. (Shpricha 14:29) Di Bivvel sawk: “Es is bessah fa nett kshvind bays vadda es vi fa mechtich sei.”​—Shpricha 16:32.

•   Kantrohl dei zann eb du ebbes dusht es dich shpeida zayld. Psalm 37:8 sawkt, “Sei nett bays; dray vekk funn deim zann, . . veil’s dich yusht zumm evila fiaht.” So vann miah bays sinn henn miah en choice fa macha​—miah kenna tshoosa fa gay lossa eb miah ebbes doon es nett recht is. Epheser 4:26 sawkt: “In eiyahm zann doond nett sindicha.”

•   Lawf vekk vann du shteahsht bays vadda. Di Bivvel sawkt “Da ohfang funn shtreit is vi en damm am rinna [adda lohs gevva], so shtobbet’s [adda lawfet vekk] eb’s graysah vatt.” (Shpricha 17:14) Es is goot fa sacha fashvetza mitt anri so kshvind es ma kann, avvah diah misset fleicht awl zvay abkeela eb diah’s fashvetza kennet inna shaynah vayk.

•   Grikk di facts. Shpricha 19:11 sawkt: “En mann sei veisheit gebt eem geduld.” ’Sis goot fa awl di facts greeya eb ma zu’n conclusion tshumbt. Vann ma abheicha zu awl seits funn di shtoahri, dann kann’s em helfa fa nett bays vadda unni en goodah reesin.​—Jakobus 1:19.

•   Bayt fa peace havva. Bei bayda, greeya miah “da fridda funn Gott, vo haychah is es alles es miah fashtay kenna.” (Philipper 4:7) Bayda is ayns funn di mayni vayya es miah Gott sei heilich geisht greeya. Sell kann uns helfa qualities havva so vi peace, patience, un self-control.​—Lukas 11:13; Galater 5:22, 23.

•   Tshoos goodi friends. Di habits funn leit es miah zeit shpenda mitt kenna abreiva uf uns. (Shpricha 13:20; 1 Korinther 15:33) Di Bivvel sawkt em: “Mach dich nett en freind mitt en zannichah mann, hald dich nett uf mitt aynah es kshvind bays vatt.” Favass? “Du mechsht sei vayya lanna un dei aykni sayl in en fall greeya.”​—Shpricha 22:24, 25.