A Jehovah a Mo Smisichau

“A RUBAK a mo smisichii a le secher el ngar a dukllel.”​—PSA. 41:3.

CHELITAKL: 23, 138

NGMEKERANG A OMONGER?

Ngmekerang a Psalm 41:3 a lolisiich er kid sel desecher?

Ngera me ngdiak el kired el omdasu el kmo a Dios a ousbech a ongasireng el omekungil er kid er chelechang?

Ngera me ngkired el mo kerekikl a ulekrael el lomeskid a rechad el kirel a ukeruul?

1, 2. Ngera ngmirruul a Dios er a taem er a Biblia, e ngmo ua ngera uldesuir a rebebil er chelechang sel bo el secher?

 OLEKO ngmla ta el bo msecher er a oberaod el rakt e ke locha mo melatk el kmo: ‘Ngak, ngsebechek el mo ungil er a rektek?’ Me a lechub e a ta er a chad er a blim me a lechub e ngsechelim a mo smecher e ke locha dirrek el oureng me ngmo ungil. Kid el rokui a mo uaisei a uldesued sel ledubech a chouaika el tekoi. Ngar er a Biblia e kede menguiu el kirir a rechad el dirrek el uluureng el mo mesisiich er a secherir. El ua King el Ahasia el ngelekel a Ahab me a Jesebel, el uluureng el mo mesisiich er a lemetemall. E a uriul e a King el Benhadad er a beluu er a Siria a mlo smecher e uleker el kmo: “Ngak ak mo ungil er tial rektek?”​—2 Ki. 1:2; 8:7, 8.

² A Biblia a dirrek el ouchais el kmo, a irechar e a Jehovah a ulemekungil er a rechad a lebebil er a taem el okiu a ongasireng e dirrek el uluusbech er a reprofet er ngii el olekiis er a rebebil el mlad. (1 Ki. 17:17-24; 2 Ki. 4:17-20, 32-35) Me chelechang e a rebebil el mo smecher a mo melatk el kmo a Dios a locha dirrek el sebechel el omekungil er tir.

3-5. Ngera sebechel a Jehovah me a Jesus el meruul er ngii, e ngera el ker a bo dosaod?

 ³ Me ngbleketakl el kmo, a Jehovah a kmal mesisiich el sebechel el omekungil me a lechub e ngomals er a rechad. Ngulelsecher er a rebebil el ua Farao er a taem er a Abraham, e a uriul e ngulsecherii a ochedal a Moses el Miriam. (Gen. 12:17; Ule. 12:9, 10; 2 Sa. 24:15) Ngdirrek el ulemals er a rechad er a Israel el ullab a “bek el rakt” er sera bo lak lolengesenges er ngii. (Dut. 28:58-61) A lebebil er a taem e a Jehovah a ulemekerreu er a rechedal me ngdiak bo lsecher. (Exo. 23:25; Dut. 7:15) Ngdirrek el ulemekungil er a rebebil er tir, el di ua sera lesal mlo smecher a Job me luluureng el mad, e ngulemekungil er ngii.​—Job 2:7; 3:11-13; 42:10, 16.

⁴ Me ngulterekokl a rengud el kmo a Jehovah a ngar er ngii a klisichel el omekungil a secher. A Jesus me ngdirrek el sebechel el omekungil er a resmecher. Sera dirk lengar er a chutem e ngulemekungil er tirke el mle chebedes me a lechub e te smecher el mo kakar. Ngulemekungil er a remeiko me tirke el mle chitechut. (Monguiu er a Mateus 4:23, 24; Jn. 9:1-7) Me aika el mengasireng el tekoi a rullid me kede semeriar el omes el beduluchei el kirel aike el ungil el tekoi el bo loruul a Jesus er a chelsel a beches el beluulechad. Seikid el taem e ngmo diak a chad el “mengeremrum el kmo ng smecher.”​—Isa. 33:24.

⁵ Engdi a lsekum kede kmal mo smecher, ngsebechel a Jehovah me a lechub a Jesus el omekungil er kid el okiu a ongasireng er chelechang? E ngera kired el melatk er ngii er a uchei er a dolilt a ukeruul el bo dolai er ngii?

BO MULTUIL ER A JEHOVAH SEL BO MSECHER

6. Ngerang dmu Biblia el kirel a ongasireng el lurruul a rekot el Kristiano?

⁶ A irechar e a Jehovah a uluusbech er a chedaol reng er ngii el mesterir a rebebil el ngellitel el Kristiano a klisichir el meruul a mengasireng el tekoi. (Rel. 3:2-7; 9:36-42) Me ngmle sebechir el omekungil er a rechad e dirrek el millekoi a kakerous el bedengel a omelekoi. (1 Ko. 12:4-11) Me nguaisei, engdi ngmlo er ngii a taem e ngmlo diak aika el tekoi el ua losaod er ngii a Biblia. (1 Ko. 13:8) Me chelecha el taem e ngdiak el sebeched el omdasu el kmo a Dios a ousbech a ongasireng el omekungil er kid me a rebetik er a rengud.

7. Ngmekerang a Psalm 41:3 a lolisiich er kid?

⁷ Engdi a lsekum ke smecher e a Jehovah a mo chemolodau e ngosukau el ua lurruul el mo er a remesiungel er a irechar. A King el David a milluches el kmo: “Ngeltengat ngikel melatk er a re mechebuul! A RUBAK a mo osebelii sel bo le chebuul. A RUBAK a mesebechakl er ngii e omekedelad er a klengar er ngii.” (Psa. 41:1, 2) A tekingel a David a dimlak lebelkul a kmo a chad el kiliei er sel taem el mle ungil a omerellel el mo er a remechebuul a diak lemad. Me ngmekerang a Jehovah e ngosuir ngika el ungil a omerellel el chad? A David a dilu el kmo: “A RUBAK a mo smisichii a le secher el ngar a dukllel; ng mo omekungil er ngii er a rokui el rektel.” (Psa. 41:3) A Jehovah a kmal ungil el medengei a ringel el lechelebangel a remesiungel. Ngdirrek el diak lobes er tir, e sebechel el mesterir a blekeu me a llomeserreng. Ngdirrek el milebii a bedengel a chad el sebechel el di ngii el omekungil er ngii.

8. A doltirakl er a Psalm 41:4, e ngera ngullengit er ngii a David er sera lesal kmal smecher?

⁸ Ngar er a Psalm 41 e a David a ouchais el kirel a taem el ngii a kmal mlo smecher e di mechitechut a bedengel e suebek a rengul. Tia locha sel taem el ngelekel er a Absalom a millasem el orribech er a kleking er ngii. Seikid e a David a kmal mle smecher me ngdimlak el sebechel el torebengii a Absalom. Ngmle medengei  el kmo ngchilarm el klengit el lerirellii el obengkel a Bathseba a uchul. (2 Sa. 12:7-14) Me ngmilekerang a David? Ngmilluluuch el kmo: “RUBAK, beskak a krasia, momekungil er ngak, e ak mlor a klengit el omtok er kau!” (Psa. 41:4) Ngmle ungil el medengei el kmo a Jehovah a mla ousubes a kngtil, me ngdi mle ultuil er a Dios el kirel a ngeso er a taem el lsecher. Me a David, ngmilengerechir er a Jehovah el mo meruul er a ongasireng?

9. (a) Ngera ngrirellii a Jehovah el mo er a King el Hesekia? (b) Ngera ngmilengerechir er ngii a David er a Jehovah?

⁹ Ngmera el tekoi, a lebebil er a taem e a Dios a ulemekungil er a rechad. El ua sel taem er a lemedkung a King el Hesekia e a Jehovah a ulemekungil er ngii me ngliluut el kiei el 15 el rak. (2 Ki. 20:1-6) Engdi a David a dimlak longerechir er a mengasireng el omeruul, ngbai mle soal a Dios a lolengeseu er ngii el di ua sel lolengeseu er a chad el “melatk er a re mechebuul!” A David a mle ungil a deleuill er ngii me a Jehovah, me ngmle sebechel el olengit er Ngii me longelaod er ngii e lomekerreu er ngii er a taem el lsecher. Ngdirrek el ullengit me bo el sebechel el lmuut el mo ungil e lemesisiich a bedengel. Kid me ngdirrek el sebeched el olengit er a Jehovah me lolengeseu er kid el ngar er a osisiu el rolel.​—Psa. 103:3.

10. Ngera kede suubii er a tekoi el dilubech el mo er a Trofimus me a Epafroditus?

¹⁰ Sera irechar e ngdimlak el rokui el Kristiano a mlo ungil er a rektir el okiu a ongasireng, alta e a apostol el Paulus me a rebebil a mla er ngii a klisichir el omekungil a secher. (Monguiu er a Rellir 14:8-10.) A apostol el Paulus a ulemekungil er a demal a Publius el silecher el mekeald e omachediil, me ngmilluluuch “e mor a chimal er ngii, me ng mlo ungil.” (Rel. 28:8) Engdi a Paulus a dimlak lomekungil er a rokui el chad el ble lodengelterir. A ta er a sechelil el Trofimus a ulebengkel er a omerolel. (Rel. 20:3-5, 22; 21:29) E sera bo lsecher, e a Paulus a dimlak lomekungil er ngii. Me a Trofimus a di kiliei er a Miletus el mo lmuut er a bo lungil, e dimlekea lobengkel a Paulus el merael. (2 Ti. 4:20) Me a ta er a sechelil a Paulus el Epafroditus a dirrek el mlo smecher el kilo ngmad, engdi ngdiak a omesodel a Biblia el kmo a Paulus a ulemekungil er ngii.​—Fil. 2:25-27, 30.

NGERA EL ULEKRAEL A KIREM EL OLTIRAKL?

11, 12. Ngtecha Lukas, e ngmilekerang e ngosuir a Paulus?

¹¹ A Lukas a mle toktang e mirrael a beluu el obengkel a Paulus. (Rel. 16:10-12; 20:5, 6; Kol. 4:14) Me nglocha ullengeseu er a Paulus me a rebebil sel lengar er a omerollir e bo lsecher. (Gal. 4:13) Me ngua ledilu Jesus el kmo: “A re smecher ousbech er a toktang.”​—Lk. 5:31.

¹² A Lukas a mle toktang el dimlak di lechad el di semeriar el mesaod a tekoi er a ukeruul. A Biblia a diak a omesodel el kirel a taem me a basio el lulsuub er a kltoktang er ngii a Lukas. Engdi ngbai mesaod er a Paulus er a loldurokl a yorosku er a Lukas el mo er a rechad er a Kolose. Me ngsebeched el melatk el kmo, nglocha mlo er a skuul er a kltoktang er a beluu er a Laodisea el kmeed er a Kolose. Ngdirrek sel taem er a loluches er a Ebangkelio me a babier er a Rellir e ngii el Lukas a uluusbech aike el tekoi el lousbech a retoktang sel losaod el kirel a ukeruul. Me ngii el mle toktang a uchul me ngmilsaod a betok el cheldecheduch el kirel a Jesus er a lomekungil er a rechad.

13. Ngkired el melatk er a ngerang er a uchei er a dekengei a ulekrael el kirel a ukeruul?

¹³ Chelecha el taem e ngdiak a odam el sebechel el meruul a ongasireng e lomekungil er  kid. Engdi tir el sorir el ngosukid a uchul me a rebebil a omeskid a ulekrael alta ngdimlak dolengit er tir. Me ngar er ngii a bebil el ulekrael el diak a telemellel. El ua tiang, a Paulus a dilu er a Timothy me bo lolim a sesei el bilong, e le Timothy a mle meringel a delel e le nglocha ngilelmii a kikiongel el ralm. * (Monguiu er a 1 Timothy 5:23.) Engdi kid a kired el mo kerekikl. Ngsebechel a odam el melasem el meruul er kid el mo melim er a ta er a bedengel a kar me a lechub e ngmesaod a diak el kired el mengang me aike el sebeched el mengang. Nglocha ouchais el kmo ngmlo sebechel a chedal el mo ungil er tia el osisiu el rakt el okiu aika el tekoi. Engdi tiang a diak lebelkul a kmo me ngsebechel el ngosukid. Me lak dobes el kmo alta e tia el kar a mlo sebechel el ngosuterir a rebetok, engdi ngklou a techellel el mo uchul a telemall el kirir a rebebil.​—Monguiu er a Osisechakl 27:12.

BO MUNGIL EL OMTAB A TEKOI

14, 15. (a) Ngkired el kerekikl er kid er a rua techang? (b) Ngera kede suubii er a Osisechakl 14:15?

¹⁴ Kid el rokui a soad el mo mesisiich a bedenged me bo lsebeched el dmeu a rengud er a klengar er kid e leblak a rengud el mesiou er a Jehovah. Engdi ngdiak demecherrungel me ngdiak el sebeched el oleiub er kid er a secher. Me sel bo desecher e ngbetok a rolel a ukeruul el ngar er ngii, me ngmo kired el ungil el omtab el kmo kede mo mekerang. Chelechang e te betok a rechad me a dirrek el kombalii el mesaod el kmo, te mla metik er a kar el sebechel el mkerur a rekted. Te meruul el uaisei e le ngdi sorir el mengereker er kid. Te locha mo dmu el kmo, a rebetok a mla ousbech er ngii el kar e mo ungil er a rektir. Me a lsekum kede smecher, e nglocha mo soad el melasem a ngii di lengerang el rullid el mo mesisiich me ngsebeched el kiei el kemanget el taem. Engdi ngkmal diak el kired el obes er a uleklatk el ngar er a Tekingel a Dios el kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.”​—Osi. 14:15.

¹⁵ A lsekum kede kerekikl el omtab a tekoi e ngmo ungil a omelilt el doruul el ileakl er sel taem el chad el omeskid a ulekrael a diak el toktang. Me ngungil a di lekid el melatk el kmo: ‘Ngdmu el kmo tia el vitamin me a lechub a herb me a lechub e ng diet a mla ngosuterir a rechad, engdi ngak ak ungil el medengei el kmo ngmera el mla ngosuterir? Me a lsekum ngmla ngosuterir, e ak medengei el kmo ngsebechel el ngosukak? Nglocha ungil ak lluut el mo merriter er tia el tekoi e kungedecheduch er a retoktang el kirel a rektek?’​—Dut. 17:6.

16. Ngkired el melatk a ngerang er a uchei er a dolilt a ukeruul el dolai?

¹⁶ Sel dolatk el kmo ngera el rolel a ukeruul a kired el mo er ngii e ngungil a bo el “ultebechel a rengud.” (Tit. 2:12) E tiang a kmal klou a ultutelel a lsekum a rolel a ukeruul a kora kmal ngodech. Ngika el chad el omkar er kid, ngsebechel el ungil el smodii a rolel a loureor tia el ukeruul? Ngkora ngodech a omesodel? Te betok a retoktang el kongei el kmo tia el ukeruul a sebechel el omekungil er a rechad? (Osi. 22:29) Alta e a chad a subedid el kmo ngar er ngii a ungil el ukeruul el bla lebetik er ngii er a cheroid el beluu e dirkak a toktang el mo medengelii. Me a leuaisei, e ngar er ngii a olechotel el kmo ngmera el sebechel el omkar er a secher? A rebebil a kuk omkar el ousbech a berrotel el tekoi me a lechub e ngklisiich, e aikang a kmal kdekudel el tekoi. Lak mobes, a Dios a mengelechel er kid el kmo: “Lak moruul a ngii di le blekeradel el olai.”​—Lev. 19:26; Dut. 18:10-12.

 “MONGETMOKL A BEDENGIU!”

17. Kede oureng el mekerang?

¹⁷ A chelechad er a ruungerachel er a irechar a liluches a babilengir el mo er a betok el ongdibel el omeklatk er tir er a tekoi el kirir el mengeroid er tir er ngii. Me ngar er a ulebengelel a babilengir e ngellechukl el kmo: “A lsekum kom mo omekiai aikang e kom mo ungil. Mada mongetmokl a bedengiu!” (Rel. 15:29, NW) Me alta e aike el ulebongel el tekoi a di mle omelmesumech, engdi ngomeklatk er kid el kmo, kid el rokui a soad a bo lemesisiich a bedenged.

18, 19. Kede omes el beduluchei el kirel a ngerang er a chelsel a beches el beluulechad?

¹⁸ Me kid el diak demecherrungel a uchul me ngdiak el sebeched el oibngid er a rokui el secher. Me sel bo desecher e ngdiak el kired el omdasu el kmo a Jehovah a mo meruul a ongasireng el omekungil er kid. Engdi ngsebeched el omes el beduluchei el kirel sel taem el Dios a mo omekungil er kid er a rokui el secher. Ngar er a Ocholt 22:1, 2, e a apostol el Johanes a milsaod el kirel a “ralm er a klengar” me a “kerrekar er a klengar” el mo omekungil er a rokui el chad. Aikang a diak losaod el kirel a kar el sebeched el melim e ngomekungil er kid er chelechang me a lechub e ngchelsel a beches el beluulechad. Ngbai mesaod el kirel aike el rokui el bo loruul a Jehovah me a Jesus me bo el sebeched el kiei el mo cherechar.​—Isa. 35:5, 6.

¹⁹ Me kede omes el beduluchei el kirel seikid el taem. Engdi ngulterekokl a rengud el kmo a Jehovah a kmal betik a rengul er a derta er kid e medengei a ringel el dechelebangel er chelechang. Me kede di ua David el sel bo desecher e kede ungil el medengei el kmo ngdiak el sebechel a Jehovah el di choitid. Ngdi blechoel el omekerreu er tirke el blak a rengrir el mo er ngii.​—Psa. 41:12.

[Aike el footnote]

[Aike el Ker er a Suobel]