OMESODEL A SUOBEL ER A MEDAL TIA EL BABIER | A SCIENCE NGMLA RULLII A BIBLIA EL MO DIAK A BELKUL?

Ngar er Ngii a Telkelel a Science

Ngar er aika el mereko el rak e a rechad el diak loumerang er a Dios a mla meluches a betok el babier. E a rebetok el chad a sorir aika el babier engdi ngdirrek el mla mo uchul a klautok me a klaititekangel. Me a neuroscientist el David Eagleman a milluches el kmo: “A rebebil a menguiu aika el babier e mo omdasu el kmo a re scientist a kmal medengei a rokui el tekoi.” Engdi ngdirrek el dilu el kmo, a rungil el scientist a kongei a beches el uldasu, e a lebebil er a taem e te mo mechas a rengrir sel lesubii a beches el tekoi.

Ngar er a reksi er a klechad e a remeduch el scientist el merriter er a beluulechad me a melidiul a kmal mlo mechas a rengrir sel lebetik a beches el tekoi el dimlak lodengei. Me nguaisei, engdi a rebebil er tir a dirrek el mle cheleuid a uldesuir. A Isaac Newton el ta er a kot el merael a chisel el scientist, a silodii a rolel e a gravity a sebechel el oldak aika el planet, me a btuch me a galaxy el ngar er a melidiul. Ngmiluchelii a calculus, el ta er a bedengel a mathematics el lousbech er ngii el meruul a computer, me a space travel, me a nuclear physics. Me nguaisei, engdi ngika el Newton a dirrek el mle blak a rengul el mesuub a alchemy, el ngii a diak lemera el rolel a science el ousbech a olai me a astrology el melasem el omult a kakerous el bedengel a deel el mo kolt.

A betok er a 1,500 el rak er a uchei er a Newton, e a chad er a Grik el Ptolemy a mle blak a rengul el mesuub a btuch me a planet a leklebesei. Ngdirrek el kmal mle meduch el meruul a map. Engdi nguluumerang el kmo a rokui el btuch me a planet er a melidiul a merael el meliuekl er a beluulechad. Me a Carl Sagan el astrophysicist a milsaod el kirel tia el uldesuel a Ptolemy el kmo, a rechad a “mle 1,500 el rak el oumerang er ngii. E tiang a ochotii el kmo, alta e a chad a kmal mellomes a rengul, engdi ngsebechel el kmal mo cheleuid a uldesuel.”

Me a urerir a re scientist a di osisiu er chelecha el taem. Tirkang ngsebechir el mo medengei a rokui el tekoi el kirel a beluulechad me a melidiul? Kid a medengei el kmo a science a di merael el olengeriakl e dirrek el uchul a klungioled, engdi ngdiak el kired el obes el kmo ngar er ngii a telkelel. A Paul Davies el physicist a kmo: “Ngkmal meringel el bo dodengei a bleketakl el omesodel a rokui el tekoi, e lak leketouch a tekoi el kirel.” Aika el tekingel a kmal klemerang, e le rechad a diak el sebechir el mo cherrungel el medengei a rokui el tekoi. Me sel lolekoi a rechad el kmo a re scientist a mla mo medengei a cherrungel el omesodel a rokui el tekoi el ngar er ngii, e ngkired el kerekikl me lak di demereched el mo oumerang aika el tekoi.

A Biblia a mesaod el kirel a beluulechad me a melidiul el kmo: “Ngdi ika di dertelkib el olechotel a klisichel [a Dios]. Ng di omengelulau er ngii el de rirenges.” (Job 26:14) Me ngdirk ngar er ngii a lmuut el betok el tekoi el diak el sebechir a rechad el mo medengei. Me ngbleketakl el kmo a tekingel a Paulus el milluches er a bekord el 2,000 el rak er a uchei a kmal klemerang. Ngdilu el kmo: “Kele ng kol meral klou a klungiolel a Dios! E kmal dmolech a llemesel a rengul ma lodengei!”​—Rom 11:33.

 [Blurb el ngar er a 7 el llel]

A Biblia a meskid a ulekrael el diak el sebechel a science el meskid

[Baks el ngar er a 7 el llel]

A Ulekrael el Diak el Sebechel a Science el Meskid

Alta e a science a meskid a klou el klemedengei el kirel a beluulechad me a melidiul, engdi a Biblia a meskid a omellach me a ulekrael el mo uchul a ungil el deleuill me a deurreng er a rechad me a dirrek el ungil el rolel a klengar. El ua tiang:

Torob a Delengerenger

Lak meterekakl a klengar

“Lak bo momekoad.”​—Exodus 20:13.

“Ngikel ouketui er a tar ngii a omekoad er a re chad.”​—1 Johanes 3:15.

Meleketek a budech

“Mobult el mo cheroid er a mekngit . . . e mrellii sel tkul er bab el sebechem el nguu a budech.”​—Psalm 34:14.

“Ma re chad er a budech sel lolalem a tane er a budech e te mo meridm er a llemalt.”​—Jakobus 3:18.

Moltngakl a koadelchad

“A RUBAK a omes er a melemalt ma dengerenger a rengul e ouketui er ngikel soal el meruul a delengerenger.”​—Psalm 11:5.

“Lak mechechei er a chad el meruul a delengerenger, e lak molib er a rengum el mo oltirakl omerellel. Le RUBAK a ouketui er a re chad el meruul a mekngit.”​—Osisechakl 3:31, 32.

Deurreng er a Telungalek

Blekongesenges er a rengalek

“Re ngalek, ng ngercheliu er a klekristiano el olengesenges er a re demmiu ma re delemiu, . . . ‘Mongull er a demam ma delam’ a kot el llach el uldak er a telbiil, ‘me bo lungilbesul a rokui el tekoi er kau, me bo mchad el meketeket er tial beluulchad.’”​—Efesus 6:1-3.

Bo mungil el osisecheklterir a rengelekiu

“Lak molengasech a rengrir a re ngelekiu. E bai momekeroul er tir el oba omellach ma osisechakl er a Rubak.”​—Efesus 6:4.

“Lak molengasech a rengrir a re ngelekiu, ele ng mo uchul e ng di chelemuul a rengrir.”​—Kolose 3:21.

Moubltikerreng e mongull er a bechim

“A re bek el sechal a kirir el betik a rengrir er a re becherir el di ua le tir, ma re bek el redil a kmal kirir el mengull er a re becherir.”​—Efesus 5:33.

Ulekerreuil a beluulechad

A Biblia a mesaod er a rechad er a Israel el mle meterekakl er a beluu el kmo: “A re chad a mla kikingelii a beluulchad . . . ma re chad el kiei er ngii a chormang el kirel a kngterir.” (Isaia 24:5, 6) A Dios a mo omals er tirke el durengrir el melemall er a beluulechad. A Biblia a kmo, ngmo ‘melemall er tirkel melemall er a beluulchad!’ (Ocholt 11:18) Me ngkmal diak el sebechir el chemiis er a belsel a mekngit el omerellir.