Mkiei el Oltirakl er a Nglunguchel a Jesus​—Kot el Suobel

“Bo le modanges a chedaol ngklem.”​—MT. 6:9.

KE DIRK MELATK?

Ngera kede suubii er a tekoi el “Demmam”?

Ngera uchul me kede meluluuch me lemechedaol a ngklel a Dios?

Kede mekerang e kiei el oltirakl er a ongtid el soad a lemotaut a soal a Dios er tia el chutem?

1. Ngmekerang a domerk er a klumech el ousbech er a nglunguchel a Jesus el ngar er a Mateus 6:9-13?

 TE BETOK el chad a medengelii a nglunguuch el medung er a Mateus 6:9-13. Me sel domerk er a klumech e kede ousbech er tia el nglunguuch el olisechakl er a rechad el kmo a Rengedel a Dios a mera el kabelment el mo meltii a beluulechad el mo baradis. Kede dirrek el ousbech er a tekoi el “bo le modanges a chedaol ngklem” el ochotii el kmo, a Dios a ngar er ngii a ngklel el kirel el modanges me a lechub e ngmechedaol.​—Mt. 6:9.

2. Kede mekerang e medengei el kmo a Jesus a dimlak lolisiich er a redisaiplo er ngii me lomelekl er tia el nglunguchel?

² A Jesus, ngmle soal a di domelekl a tekoi el lullekoi er a bek el taem el doluluuch el ua loruul er ngii a rebetok el chad? Ngdiak, ngbai dilu el kmo: “Sel moluluuch e lak molekoi a betok el diak a ultutelel tekoi.” (Mt. 6:7) A ta er a taem e ngullisechakl er a redisaiplo er ngii e ulemelekl er a nglunguchel, engdi ngdimlak lousbech a osisiu el tekoi. (Lk. 11:1-4) Me a  nglunguchel a Jesus a osisecheklid er a rolel a doluluuch.

3. Ngera el ker a sebechem el di kau el oker sel mosuub el kirel tia el nglunguuch?

³ Ngar tia el suobel me sel ongingil e kede lmuut el mo dmolech el mesuub el kirel tia el nglunguchel a Jesus. Me ngsebeched el di kid el oker el kmo: ‘Ngmekera tia el nglunguuch e ngosukak el mo meduch el meluluuch?’ E a klou a ultutelel el ker a kmo, ‘Ngak ak kiei el oltirakl er a nglunguchel a Jesus?’

“DEMMAM EL NGAR A EANGED”

4. A tekoi el “Demmam” ngomeklatk er kid er a ngerang, e okiu a ngera el rolel e a Jehovah a Demad?

⁴ A Jesus a ulemuchel er a nglunguchel el dilu el kmo, “Demmam.” Me tiang a omeklatk er kid el kmo a Jehovah a Demad kid el rokui el rudam me a rudos er a beluulechad el rokir. (1 Pe. 2:17) Me tirke el bla lolilt er tir a Jehovah el mo kiei er a eanged a mla merodel el mo ngelekel, me ngii a mla mo Demerir el okiu a kuk ta er a rolel. (Rom 8:15-17) E tirke el mo kiei er tia el chutem el mo cherechar me ngdirrek el sebechir el omekedong er ngii el “Chedam,” e le Jehovah a mesterir a klengar er tir e dirrek el oba bltikerreng e omesterir aike el rokui el lousbech. Te dirrek el mo okedongall el “re ngelekel a Dios” er sel taem el bo lemecherrungel e lolemolem el blak a rengrir el mo er a Jehovah er a temel a ulebongel el omelsemai.​—Rom 8:21; Och. 20:7, 8.

5, 6. Ngera kot el ungil el sengk el sebechir a ruungalek el mesterir a rengelekir, e ngera kirel a derta el ngalek el meruul er ngii? (Momes er a siasing er a uchelel a suobel.)

⁵ A ruungalek a mesterir a rengelekir a sengk sel lengesuterir el mo medengei el kmo a Jehovah a Demerir el ngar er a eanged me a dirrek el sel losisecheklterir el mo meluluuch. A odam el oldingel a ongdibel er a South Africa a kmo: “Sera lebo er ngii a rengelekek el redil e ak meluluuch el obengterir er a bek el klebesei, engdi sel taem el kdibus e ngmo diak el sebechek. A rengelekek a melekoi el kmo ngdiak lodengei a tekoi el kdilung er aike el taem. Engdi ngkmal diak lobes a blekeradel er sel taem el mle sebechir el melechesuar a ungil eltel a blai me sel mekreos el deleuill er tir me a Demerir el Jehovah. Me sera bo el sebechir el di tir el meluluuch e ak millisiich er tir me te meluluuch el klou a ngerir me ak mo medengei a uldesuir el bedul a Jehovah. Tiang a kmal mle ileakl el techall el mo sebechek el medengei a ngar er a rengrir. Me ngmlo sebechek el mekekokak el olisechakl er tir er aike el meklou a ultutelel el tekoi el ngar er a nglunguchel a Jesus me lebo er ngii a mera el belkul a nglunguchir.”

⁶ Me tirka el ngelekel a millemolem el olekeed er tir er a Jehovah el mo lmuut er a lemeklungang. Chelechang e te mla mo bechiil e mesiou er a Jehovah el mui el taem el obengterir a rebecherir. Me a kot el ungil el sengk el sebechir a ruungalek el mesterir a rengelekir a sel losisecheklterir el mo omes er a Jehovah el mera el Dios me ngsebechir el mo kmeed el sechelil. Engdi a derta el ngalek a kirel el di ngii el olekes er a deleuill er ngii me a Jehovah.​—Psa. 5:11, 12; 91:14.

“BO LE MODANGES A CHEDAOL NGKLEM”

7. Ngera el techall a dobang, me ngkired el mekerang?

⁷ Kede kmal ngeltengat el ngar er ngii a techelled el mo medengelii a ngklel a Dios e mo ‘chad el kirel a ngklel.’ (Rel. 15:14, BT; Isa. 43:10) Kede dirrek el meluluuch el kmo: “Bo le modanges a chedaol ngklem.” Osisiu el taem e kede olengit er a Jehovah me lengesukid me lak doruul me a lechub e dolekoi a tekoi el mo oltuub er ngii. Ngkmal diak el soad el mo  ua rebebil er a Rekristiano er a irechar el dimlak loltaut aike el tekoi el lolisechakl, a uchul me a Paulus a dilu er tir el kmo: “Ng kemiu el chad er a Judea uchul, e a re Chisentael a melekoi a mekngit el kirel a Dios.”​—Rom 2:21-24.

8, 9. Mosaod er a kerebai el ochotii a rolel e a Jehovah a olengeseu er tirke el sorir el mengedaol er a ngklel.

⁸ Me kede mo er aike el sebeched el mengedaol er a ngklel a Jehovah. A odos er a Norway el mlad a bechil er a taem er a dirk el eru rekil a ngelekel el sechal a dilu el kmo: “Tiang a kot el meringel el taem er a klengar er ngak. Me ngmle bek el sils el bekord el ta el sikang a delongelel e ak di meluluuch el olengit er a klisichel a renguk me a tabesul el uldesuek me lak becherei a Satan me bo loltuub er a Jehovah, el mekngit el omelilt er ngak me a lechub e ngomerellek a uchul. Ngkmal soak el mengedaol er a ngklel a Jehovah e dirrek el soak a ngelekek a lluut el mo mesang a demal er a chelsel a Baradis.”​—Osi. 27:11.

⁹ Me a Jehovah ngulenger a nglunguchel? Ochoi. Ngmlo sebechel el outekangel el okiu sel le blechoel el teloi er a rudam me a rudos er ngii. Eim el rak er a uriul e ngmlo bechil a ta er a remechuodel. Me a ngelekel er chelechang a 20 a rekil e mla metecholb el odam. Me ngdmu el kmo: “Ngkmal ungil a renguk e le bechik a ngilsukak el omekeroul er ngika el ngelekek.”

10. Ngmekerang a Dios e mo cherrungel el kobkellii a ngklel?

¹⁰ A Jehovah a mo cherrungel el kobkellii a ngklel er sel taem el bo lokngemedeterir a rokui el oltuub er ngii e oltngakl er a omengederederel. (Monguiu er a Esekiel 38:22, 23.) Sel taem e a rokui el chad a mo cherrungel me tirke el rokui el ngar er a eanged me a dirrek el chutem a dul mo mengull er a Jehovah e mengebkall er a chedaol ngklel. E sola e ngika el betik a rengul el Demad a mo “rokui el tekoi er a chelsir a re chad.”​—1 Ko. 15:28.

“A RENGEDEM LE MEI”

11, 12. Ngera el tekoi a mlo kloadel er a rengrir a rechedal a Jehovah er sera rak er a 1876?

¹¹ A redisaiplo er a Jesus a uleker er ngii er a uchei er a lebo er eanged el kmo: “Rubak, ng chelecha e ke mo rullii a Israel el mo oba omengedereder?” Me a Jesus a dilu el kmo ngdirkak lebo el temir el mo medengei el kmo ngoingerang e ngomuchel el mengedereder a Rengedel a Dios. Ngbai milengelechel er tir me bo leblak a rengrir el meruul er a klou a ultutelel el ureor er a berkel a klumech. (Monguiu er a Rellir 1:6-8.) Engdi ngdirrek el ulsisecheklterir el mo meluluuch el olengit er a Rengedel a Dios me lemei e lomes el bedul uchei el kirel ngii el Renged. Tiaikid a uchul me chelechang e kede dirk meluluuch el olengit me lemei ngii el Renged.

¹² Sel taem er a bocha le kirel a Jesus el mengedereder el ngar er a eanged, e a Jehovah a ngilsuterir a rechedal el mo medengelii a rak el lomuchel tia el tekoi. Ngar er a rak er a 1876, e a Charles Taze Russell a lilechesii a suobel el “Ngoingerang a Ulebengelel a Taem er a Rechisentael?” Ngsilodii a “euid el rak” el ngar er a ulochel a Daniel el kmo ngdi osisiu ngii me a temel a ‘omerrederir a re diak loumera er a Dios’ el ngar er a ulochel a Jesus. Me tia el suobel a milsaod el kmo a temel a mo tmurk er a rak er a 1914. *​—Dan. 4:16; Lk. 21:24.

13. Ngera dilubech er a rak er a 1914, e ngolechotel a ngerang a tekoi el dilubech er seikid el taem el mei?

 ¹³ Me ngar er a rak er a 1914, e a mekemad a ulemuchel er a Europe e di mle mereched el oberk er a beluulechad. Me ngmlo er ngii a meklou el bosech er a kall el mekemad a uchul. E ngar er a mochu ulebongel er a rak er a 1918, e a omekodall el rakt a mla mekodeterir a rebetok el chad el kuk betok er a rechad el mlad er a mekemad. Me aikang a kakerous el telengtengil a olangch el lulsaod er ngii a Jesus, el ochotii el kmo ngii a mlo King el ngar er a eanged er a rak er a 1914. (Mt. 24:3-8; Lk. 21:10, 11) Seikid el taem e “ng mlar a uos el tuobed el ua teletelel a chad el mo oumekemad el mo melabeluu.” (Och. 6:2) Me nguldikii a Satan me a rechanghel er ngii el mei er a chutem. Me a uriul er tiang e ngtilaut a ulaoch el kmo: “Ng kmal chebuul e beluulchad ma daob! Ele Diabelong a mla metengel el ekor kemiu e blekall er a klsiberreng, ele ng medengei el kmo ng di kedeb ku temel.”​—Och. 12:7-12.

14. (a) Ngera uchul me kede meluluuch me lemei a Rengedel a Dios? (b) Ngera el klou a ultutelel el ureor a kired el meruul er ngii er chelechang?

¹⁴ A ulaoch el ngar er a 12 el bliongel er a Ocholt a ngosukid el mo medengelii a uchul me a mekngit el tekoi a ulemuchel er a beluulechad er a bekord el osisiu el taem er a bo el King er a Rengedel a Dios a Jesus. Me alta e a Jesus a mla mo mengedereder el ngar er a eanged, engdi a Satan a dirk mengedereder er tia el chutem. Engdi ngkmal di  kmedung e a Jesus a mo “melabeluu” el okiu sel bo lokngemed a rokui el mekngit el ngar tia el chutem. Me chelechang el mo lmuut er seikid el taem e dolemolem el meluluuch me lemei a Rengedel a Dios e domerk er a klumech el kirel ngii el Renged. Me tia el urered a mo otutii a ulochel a Jesus el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.”​—Mt. 24:14.

“BO LE MOTAUT A SOAM ER A BELUULCHAD”

15, 16. Kede mekerang e kiei el oltirakl er a ongtid el soad a lemotaut a soal a Dios er tia el chutem?

¹⁵ Ngar er a bekord el 6,000 el rak er a uchei e a soal a Dios a mileketmokl er tia el chutem. Sei a uchul me “ng kmal mlo ungil a rengul.” (Gen. 1:31) Engdi a Satan a mlo omtok, me seikid el taem el mei e a ruumesingd el chad a diak loruul a soal a Dios. Engdi chelecha el taem e te ngar er ngii a bekord el 8 el miliol el chad el mesiou er a Jehovah. Te meluluuch me lemotaut a soal a Dios er tia el chutem, e te dirrek el meruul a soal. Te kiei el oldeu er a rengul e blak a rengrir el olisechakl er a rechad el kirel a Rengedel.

¹⁶ A ta el 80 a rekil el odos el miltecholb er a 1948 e milsiou el missionari el ngar er a Africa a kmo: “Ak blechoel el meluluuch me bo el sebechir tirke el ua sib el mongeseu el mo medengelii a Jehovah er a uchei er a lemei a ulebongel. Me a uchei er a kungedecheduch er a chad e ak dirrek el olengit er a llomeserreng me bo el sebechek el rutechii a rengul. Ak dirrek el olengit er a Jehovah me lomekngeltengat er kid sel dolengeseu er tirke el ua sib el kuk mla rongesii tia el klumech e kongei er ngii.” Me ngika el chudelang el odos a mla ngosuterir a rekmal betok el mo medengelii a Jehovah. Ngsebechem el melatk er a rebebil el mechudelang el blak a rengrir el meruul a soal a Jehovah?​—Monguiu er a Filipi 2:17.

17. Ngua ngera uldesuem el kirel a tekoi el bo leketmokl a Jehovah el kirir a rechad me tia el chutem?

¹⁷ Me kede melemolem el olengit me lemotaut a soal a Dios er tia el chutem el mo lmuut er sel taem el bo lokngemedeterir a recherrouel. Seikid e tia el chutem a mo baradis e a rebetok el biliol a mo mekiis er a kodall. A Jesus a dilu el kmo: “A belsechel a mei el tirkel rokui el mla mad a mo rongesii a ngerel me te mo tuobed er a debellir.” (Jn. 5:28, 29) Ka di molatk er a taem el sal mo dmeu a rengum el mesterir a rebetik er a rengum el lmuut el me ngar! A Dios a mo “smuld a rokui el chiuosech” er a medad. (Och. 21:4) A ruumesingd er tirke el mo mekiis a mle “mekngit” el chad e le ngdimlak lodengelii a klemerang el kirel a Jehovah me a Jesus. Me ngkmal mo ungil a rengud el olisechakl er tir el mo meruul a soal a Dios me bo el sebechir el mo nguu a “diak a ulebengelel klengar.”​—Rel. 24:15; Jn. 17:3.

18. Ngerang aike el tekoi el klechad a kmal ousbech?

¹⁸ Me sel lemei a Rengedel a Dios e ngmo mechedaol a ngklel e a rechad el rokui a mo dmak el mengull er a Jehovah el ngar er a budech. Nguaisei, a Dios a mo mesterir a rechad aike el kmal ousbech sel bo longer aike el kot el edei el ongit el ngar er a nglunguchel a Jesus. Me a ongingil el suobel e kede mo mesaod a lmuut el bebil er a meklou a ultutelel el tekoi el dousbech el lulsaod a Jesus er a nglunguchel.

[Footnote]

[Aike el Ker er a Suobel]