1, 2. (a) Te milekerang tirke el 24,000 el chad er a Israel e oriid aike el klengeltengetir? (b) E ngera uchul me tia el cheldecheduch a klou a ultutelel el kired?

 TELKIB el taem er a uchei er a bo lesiseb er a Beluu er a Nglat a rechad er a Israel, e a rebetok el telael el sechal er tir “a mlo obengterir a ruteruul redil er a Moab.” Me tiang a mlo uchul me a 24,000 el chad er a Israel a mlad. Tirkang a kmal mlo meketeket el longiil e dirrek el kmal di kmedu el mo ngmai a dikesir! Engdi ngklengiterreng e le te urriid aika el klengeltengat e le tir el milekesuseu el mo er a deleboes el omeruul.​—Ule. 25:1-5, 9.

² Tia el klou el chelebuul a milluches “me kede mo mela klubeled er ngii, kid el chad er chelechang el bocha lolekeed a ulebengelel a beluulchad.” (1 Ko. 10:6-11) Kid a kiei er a taem er a ulebongel me ngdi kmedung e kede mo soiseb er a beches el beluulechad. (2 Ti. 3:1; 2 Pe. 3:13) Engdi ngklengiterreng e le rebebil el chedal a Jehovah a mlo diak el kerekikl me te mla ruebet er a ongetikaik el mo er a deleboes. Me chelechang e te chuarm el mekngit el omerellir a uchul, e a lsekum ngdiak lobult er a kngterir e te dirrek el oridii a techellir el mo kiei er a Baradis el chutem el mo cherechar.

3. Ngera uchul me a rubekel a ousbech a ulekrael me a ulekerreuil a Jehovah? (Momes er a siasing er a uchelel a suobel.)

 ³ A rubekel a kmal ousbech a ulekrael er a Jehovah me a ulekerreuil el mo omekerreu er a chebechiielir, e le tia el beluulechad a kmal mla mechetikaik er a ngibes er a deleboes. (Monguiu er a Psalm 127:1.) Ngar er tia el suobel e kede mo mesaod a rolel e ngsebechir a rubekel el omekerreu er a chebechiielir. Ngkirir el kerekikl el mengkar a rengrir, e olekeed er tir er a Dios, e choitii sel dimla klechad er tir, e mo ungil el chadecheduch, e remuul a ngerechelir er a chelsel a chebechiielir.

4. Te milekerang a rebebil el Kristiano e mekesuseu el mo er a deleboes?

⁴ Ngmekerang e sebechel a Kristiano el mekesuseu el mo meruul a deleboes? Ngblechoel el omuchel el okiu a tekoi el lomes. A Jesus a dilu el kmo: “A chad el omes er a redil e mo nguibes er ngii a mla mor a laokreng er a chelsel a rengul.” (Mt. 5:27, 28; 2 Pe. 2:14) A rebetok a mlo mechitechut e rirebet er a deleboes el omeruul e le tir el ulemuchel el omes a siasing er a remeau, e menguiu a babier el melisiich a tekoi er a deleboes, me a lechub e te omes a mekikiongel el omeruul el ngar er a Internet. A rekuk bebil a mlo omes a mubi, sibai, me a show er a TV, el olecholt a tekoi er a deleboes. E a relmuut el bebil a mlo er a nightclub, me aike el blil a omelim el ngar er ngii a rechad el meloik e omedobed a bilir, me a blil a omesumech el ngar er ngii a ruteruul el redil er ngii.

5. Ngera uchul me ngkired el mengkar a rengud?

⁵ A lebebil e a chad a mo ruebet er a klengit e le ngii el mlo oltak er a rengul er a diak el bechil. Kid a kiei er a chelsel a beluulechad el rechad er ngii a diak lultebechel a rengrir e dirrek el di melamet a rengrir el meruul a bek el bedengel a deleboes el omeruul. Me tia el rengud a dirrek el diak lecherrungel e cheblad a uchul me ngbeot er kid el mo soad a chad el ngii a diak el bechid. (Monguiu er a Jeremia 17:9, 10.) A Jesus a dilu el kmo: “Ele mekngit el uldasu a ngar a reng el mei el choteklii a chad el mo omekoad, e mor a laokreng, e mo meruul a kuk bebil er a mekngit el tekoi.”​—Mt. 15:19.

6, 7. (a) Ngera sebechel el mo duubech a lsekum ngmo nguibes a rengud er a ta er a chad? (b) Kede mekerang e mo diak domtok a llechul a Jehovah?

⁶ Sel ta el lemukeroul a mekngit el ngelbesel a rengrir a reteru el chad, e te omuchel el chadecheduch el mesaod a tekoi el di kirir el mesaod el mo er a rebecherir. E di telkib e te mo mengoit er a klou el temir el dmak, e osiik a techall el mo kasoues el ua lemlak lekaodengei e mo kebetech. Me sel loleketek a urungulir el mengal mo sorir el dmak, e tiang a mo uchul e ngmerengela er tir el meruul a melemalt el tekoi. Me a cherengel a taem el loleketek tia el deleuill er tir e ngmengal merengela er tir el mo chacheroid alta e te ungil medengei el kmo a tekoi el loruul er ngii a kmal mekngit.​—Osi. 7:21, 22.

⁷ Ngar tiaikid el taem e te obesong a llechul a Jehovah e a mekngit el urungulir me a cheldechedecherir a obeltang el rulleterir me te mocha kaiuereked chim, ketungel mad, ketaiu e mocha kaiuechull me ngkmal mocha sorir el meruul a deleboes. Me ngklengiterreng e le te mocha meruul a tekoi el di kirir el meruul el mo er a rebecherir. Me nguchul e te “mekesuseu e lobedikl” el di ngelbesel a rengrir a uchul. Me sel bocha lemesisiich tia el ngelbesel a rengrir e te robetang er a deleboes el omeruul. (Jak. 1:14, 15) Ngkmal chelebuul el tekoi e le tirka el terung a mle sebechir el olechib er tir me lak bo lomtok a llechul a Jehovah oleko te milecherei me ngmelisiich er tir me lak lemetemall a chebechiielir. Me ngmekerang a loruul el uaisei?

8. Ngmekerang a klausechelei er kid me a Dios e omekerreu er kid er a deleboes el omeruul?

⁸ Monguiu er a Psalm 97:10. A klausechelei er kid me a Jehovah a sebechel el omekerreu er kid er a deleboes el omeruul. Me sel dosuub el kirel aike el ungil el blekerdelel a Dios e ngkired el “melasem el mo ua ingii” me a klengar er kid a kirel “el mo cheldereder er a bltikerreng.” Me sel bo deuaisei, e ngmo er ngii a klisiched el oltngakl “a ngii di le teletelel a deleboes ma lechub e ng mengelengalek el omeruul.” (Efe. 5:1-4) Me a rubekel el medengei el kmo a “Dios a mo oukerrekeriil a deleboes ma laokreng,” a blak a rengrir el meruul er a chebechiielir me ngmelemolem el klikiid.​—Heb. 13:4.

9. (a) Ngmilekerang a Josef e melemolem el blak a rengul alta bechil a merredelel a milengesuseu er ngii? (b) Ngera kede suubii er a kerebil a Josef?

⁹ A rebebil el Kristiano a mlo mechitechut a blakerreng er tir e le tir el mlo mengoit a klou el temir el teloi er a rediak el Sioning el milil er a uriul er a ureor. E a rekuk bebil a longesuseu er tir er a taem el loureor. Tiaikid el tekoi a dilubech el mo er a kekerei el chad el Josef. Ngar er a urerel e ngmlo medengei el kmo ngike el bechil a merredelel a kmal mle soal ngii. Me ngmle bek el sils el ngika el redil a milengesuseu er ngii el mo bad el obengkel. Me a ta er a taem e “ngiil redil a urrekedii a ikrel a bilel a Josef e dilu er ngii el kmo, ‘Mei me bo bad el obengkek.’” Engdi a Josef a chiliis er ngii. Ngmilekerang a Josef e mlo sebechel el melemolem el blak a rengul? E le ngii el kmal mle soal el mengeluolu er a klausechelei er ngii me a Dios. Ngmlo diak loureor e milengai el mo kelebus, engdi a Jehovah a ulemekngeltengat er ngii. (Gen. 39:1-12; 41:38-43) Me ngkmal kired el mo mengeroid er kid er a ngii di el tekoi el sebechel el mengesuseu er kid, alta e kede ngar er a ureor me a lechub a ngii di el basio.

10. Ngmekerang a beches el klechad e omekerreu er a rubekel?

¹⁰ A “beches el klechad” el ulebeob “el ua teletelel a Dios” a mo omekerreu er a rubekel me ngdiak lebo lerebet er a deleboes el omeruul. (Efe. 4:24) Me a lsekum kede “loia beches el klechad” er kid, e kede mo ‘omekoad’ a ngelbesel a rengud e oltngakl a “deleboes el delengerenger, ma olechotel a deleboes, ma klekad, ma ngibes er a deleboes, ma nglemokel.” (Monguiu er a Kolose 3:5, 6.) A tekoi el ‘omekoad’ a belkul a kmo ngkired el mo mesisiich el oltngakl a ngii di el urunguled el sebechel el mengesuseu er kid el mo er a deleboes. Me ngsoad el mengeroid er kid er aike el tekoi el sebechel el rullid el mo nguibes a rengud. (Job 31:1) Me sel dekiei el oltirakl a llechul a Dios e kede mo ouketui a mekngit, e ‘mo chemau a ungil tekoi.’​—Rom 12:2, 9.

11. Ngmekerang a beches el klechad e smisichii a chebechiil?

¹¹ Sel doubail er a beches el klechad, e kede mo oukerebai er a Jehovah. (Kol. 3:10) A lsekum a rubekel a dul kaiuecholt “a klechubechub, ma blekokuiirreng, ma klengariourreng, ma delemedemekerreng, ma kllourreng,” e ngmo mesisiich a chebechiielir e a Jehovah a dirrek el mo omekngeltengat er tir. (Kol. 3:12) Ngdirrek el lmuut el mo klou a kltarreng er a delongelir a lsekum te mecherei a “budech er a Kristus” me ngomtebechel a rengrir. (Kol. 3:15) Me sel ‘bo lungil kaubltikerreng’ a rubekel e ngmo ‘blak a rengrir el kakull’ e mo kerekikl er a tang me a tang.​—Rom 12:10.

12. Ngera el blekeradel a omomdasu e ngmeklou a ultutelel el mo uchul a deurreng er a chebechiil?

¹² Sera loker er a ta el obekel er aike el tekoi el mla ngosuterir el mo dmeu a rengrir er a chebechiielir, e a Sid el bechiil el sechal a dilu el kmo: “A bltikerreng a kot el ngaruchei el tekoi  el ki moureor er ngii. Aki dirrek el mla metik el kmo a delemedemek a kmal klou a ultutelel er a chelsel a chebechiielam.” Me a bechil el Sonja a dirrek el kmal kongei aika el tekoi me ngdilu el kmo: “A blekokuii a dirrek el kmal klou a ultutelel el blekeradel. Aki dirrek el melasem el olecholt er a klengariourreng, alta tiang a diak lebeot el tekoi.”

13. Ngera el blekeradel a meklou a ultutelel el kirel a mesisiich el chebechiil, e ngera uchul?

¹³ A ta er a kot el ungil el rolel e kede melisiich er a chebechiieled a sel dungil el mengedecheduch er a bechid. Engdi ngklengiterreng e le rebebil a bai sebechir el oba omengull sel longedecheduch er a ngodech el chad e diak lolecholt er ngii el mo er a rebecherir! Me sel lebo er ngii a ‘cheldechuderreng, ma ngasecherreng, klaiuediu, ma otuub, ma bek el teletelel a klauketui’ e ngsebechel el mekekokil el mengitechut er a chebechiielir. (Efe. 4:31) Me a rubekel a kmal kirir el melisiich er a chebechiielir sel lungil el chadecheduch el olecholt a delemedemek me a klechubechub.​—Efe. 4:32.

14. Ngera el blekeradel a kired el mengeroid er kid er ngii?

¹⁴ A Biblia a kmo ngar er ngii a “belsechel el di deluk.” (Oli. 3:7) Engdi tiang a diak lebelkul a kmo me ngmo diak dongedecheduch er a bechid. A ta el bechiil el redil er a beluu er a Dois a kmo: “Ngar er a chouaitia el blekeradel, e a lsekum a chad a di lmuk e ngsebechel el mo uchul a kngtil a rengul a tang.” E dilechelii el kmo: “Me alta ngmeringel er kid el kilmeklii a ngesechel a rengud, engdi ngbai diak a ngera el lerellii a di demereched el olecholt er a ngasecherreng. Sel bo deuaisei, e kede mo dmu tekoi me a lechub e kede remuul a tekoi el mo uchul a kngtil a rengul a tang el di mo uchul e ngmengal mo mekngit a rokui el tekoi.” Me a rubekel a diak el sebechir el mo ungil el sumechokl a tekoi a lsekum e te di kaiuediu me a lechub e te di keluk el diak lechadecheduch. Te bai sebechir el smisichii a chebechiielir a lsekum te kongei el mo dmak e smaod a mondai er tir e diak lomechei me lolemolem el mukeroul el mo uchul a klautoketok er a delongelir.

15. Ngmekerang a ungil el cheldecheduch e smisichii a chebechiil?

¹⁵ Ngsebechiu el smisichii a chebechiieliu  sel bo blechoel el kauchais aike el ngar er a uldesuiu me a rengmiu. Sel rolel a cho molekoi a tekoi me a tekoi el molekoi a dul meklou a ultutelel. Me ngar er sel taem el kmal merengela blekeradel e bo mkerekikl er a rolel a cho molekoi me a dirrek el tekoi el molekoi. Seikid e ngmo beot er a tang el rongesii a tang. (Monguiu er a Kolose 4:6.) A rubekel a sebechir el smisichii a chebechiielir el oeak sel lungil el chadecheduch el ousbech a ungil el tekoi el sebechel el melisiich.​—Efe. 4:29.

16, 17. Ngera uchul me ngklou a ultutelel el kirir a rubekel el mo dul kelatk aike el ousbech er a bedengir me a uldesuir?

¹⁶ A rubekel a sebechir el smisichii a chebechiielir a lsekum a tang a diak di lomdasu er a di ngii e bai kerekikl el melatk aike el lousbech a bechil. (Fil. 2:3, 4) Tir el terung a kirir el dul mo kerekikl aike el tekoi el lousbech er a bedengir me a uldesuir.​—Monguiu er a 1 Korinth 7:3, 4.

¹⁷ Ngklengiterreng e le ngar er a chelsel a bebil el chebechiil e a rubekel a diak lolecholt a klemeriarreng er a delongelir. E a rebebil el sechal a omdasu el kmo a lsekum ngmo medemedemek a omerellir el mo er a rebecherir e ngua lolechotel a kmo te mechitechut. Engdi a Biblia a kmo: “Kemiul sechal, . . . mdak el kiei kemiu mar bechemiu el oltirakl ra klemedengei.” (1 Pe. 3:7, BT) Me a rebechiil el sechal a kirir el mo medengei el kmo a ngerachel er a chebechiil a diak di el tekoi er a cheliuaiu e lemerekong. Ngkirel el mo oubltikerreng e ungil a omerellel el mo er a bechil er a bek el taem. Seikid e a bechil a dirrek el mo sebechel el dmeu a rengul el obengkel. Me sel le dul kaiuecholt a bltikerreng me a ungil el omeruul er a delongelir e ngmo beot er tir el kaiuedeu a rengrir.

18. Te mekerang a rubekel e smisichii a chebechiielir?

¹⁸ Me alta ngdiak a ungil el uchul me a chad a mo ruebet er a laokreng, engdi sel bo lak a klemeriarreng er a delongelir a rubekel e tiaikid a sebechel el mo uchul me a tang a mo osiik a deuil a rengul el obengkel a ta er a chad. (Osi. 5:18; Oli. 9:9) Tiaikid a uchul me a Biblia a mengelechel er a rubekel el kmo: “Kele mongreos er a tekoi er a chebechiil er a delongeliu. E ngdi cho mtilbir er a delongeliu el diak bo mdak el telkib . . . e ng di ungil.” E ngera uchul? “Me lak kom mechetakl er a Satan a bo lak le mekelmekl a rengmiu.” (1 Ko. 7:5) Ngmo uchul a klou el chelebuul a lsekum a rubekel a mechetakl er a Satan e mo ruebet er a laokreng e le ngdimlak el ‘kilmekl a rengrir.’ Me a rubekel el dul kerekikl aike el lousbech a bedengir a ochotii el kmo ngdiak ‘lomdasu er a di ungil er tir, e bai omdasu er a ungil’ er a rebecherir. Me sel loruul er tia el tekoi el bltkil a rengrir a uchul, e diak lomes er ngii el ua ngerachel, e ngsmisichii a chebechiielir.​—1 Ko. 10:24.

19. Ngkired el melib er a rengud el mo mekerang, e ngera uchul?

¹⁹ Ngkmal di kmedung e kede mo soiseb er a beches el beluulechad! Me ngkmal diak el soad el mo mechitechut er a ngelbesel a rengud el ua tirke el 24,000 el chad er a Israel er a lengar er a beluu er a Moab. A Biblia a mesaod el kirel tia el cheldecheduch e dochelii el kmo: “Ngikel omdasu el kmo ng mesisiich el dechor, bo le kerekikl me lak bo lubuu.” (1 Ko. 10:12) Me ngkmal klou a ultutelel el kired el smisichii a chebechiieled el okiu sel bo leblak a rengud el mo er a Jehovah me a bechid. (Mt. 19:5, 6) Me chelechang e ngmengal mla mo kired el ‘mo blak a rengud el mengikiid er kid e lak a telemelled er medal a Dios e le chelellakl a rengud.’​—2 Pe. 3:13, 14.