Nglocha beot er a chad el melekoi el kmo a Satan el Diabelong a di okesiul a mekngit. Engdi tia ngmera el olisechakl er ngii a Biblia? A lsekum e nguaisei, e ngera uchul me a Biblia a mesaod el kmo a Satan a milengedecheduch er a Jesus Kristus me a dirrek el ngike el Dios el Olab a Bek el Klisiich? Me bo dosaod aika el eru el rolel a cheldecheduch.

Sera lomuchel er a omesiungel a Jesus, e a Satan a mlo edei el taem el longarm er ngii. A kot e ngmillasem el orrimel er a Jesus me lousbech er a klisichel el lebilsang a Dios el di mo meruul a tekoi el mo uchul a klungiolel. E sola e uleldurech er ngii el mo meruul a kdekudel el tekoi el di mo uchul e ngmeruul a chisel. E a ulebongel er ngii e ngdilu er ngii el kmo ngmo omsang a rokui el renged er a beluulechad a lsekum ngmo terrob e mengull er ngii. Engdi a Jesus a ultngeklii er a bek el taem el okiu sel lousbech a Bades.​—Mateus 4:1-11; Lukas 4:1–13.

Me a Jesus ngmilengedecheduch er techang? Ngmilengedecheduch er sel mekngit el uldesuel? A doltirakl a Bades e a Jesus a “mlor ngii a rokui el ongarm el ua ikid, e ngdi dimlak le bor a klengit.” (Hebru 4:15) A Biblia a dirrek el dmu el kmo: “Ng dimlak a tal le bor a klengit, ma dimlak a blulak el tuobed er a ngerel.” (1 Petrus 2:22) A Jesus a mle cherrungel e millemolem el blak a rengul. Ngdimlak a ta el lebecherei a mekngit el uldasu me lemukeroul  er a chelsel a rengul. Me ngbleketakl el kmo ngdimlak longedecheduch er a mekngit el uldesuel e ngbai milengedecheduch er a mera el chad.

A lmuut el bebil er a tekoi el ngar tia el cheldecheduch a meketeklii el kmo a Satan a mera el ngar er ngii.

• Ka molatk er sel omengarm er a Diabelong er a ledu er a Jesus el kmo ngmo msang a rokui el renged er a beluulechad a lsekum ngmo terrob e mengull er ngii. (Mateus 4:8, 9) Tia el tekoi a mo diak a belkul a lsekum a Satan a di okesiu. Me a lmuut el tang, a Jesus a dimlak loumededenger er a klisichel a Satan er a lomsang aika el renged.

• Me a uriul er a lotngakl a rokui el ongarm a Jesus, e a Diabelong a “milecherei e merael el mengiil er a kuk tar a techall.” (Lukas 4:13) Me a doltirakl er tia el bades, e a Diabelong ngdi okesiul a mekngit me a lechub e ngmera el cheraro el diak lemeterob el mengetikaik er a rechad?

• Momtab el kmo, “a re anghel a mlong me tolengeseu er a Jesus.” (Mateus 4:11) Me tirkang, te mera el anghel el millisiich e olengeseu er a Jesus? Ochoi. Me ngera uchul me kede mo omdasu el kmo a Satan a di okesiu?

A ongeru el cheldecheduch a ouchais el kirel a Job el milluu er a Dios. Tia el cheldecheduch a mesaod a eru el taem el Diabelong a milengedecheduch er a Dios. Me ngar er aika el eru el taem e a Dios a chilat er a blakerreng er a Job. Engdi a Satan a uleltelechakl er a Job el kmo ngmesiou er a Dios el di kirel a klungiolel, e oltelechakl er a Dios el kmo ngomechar er a blakerreng er a Job. Me a Diabelong a ua ledu el kmo ngii a ungil el medengelii a Job, e a Dios a diak. Me a Jehovah a kilengei er a Satan me ngmlo omekcharm er a Job el rirechorech a kloklel, e ulemekoad er a rengelekel, e dirrek el milekrengelii a bedengel. * Engdi a cherengel a taem e ngulebeketakl el kmo, a Dios a melemalt e a Satan a bulak. Me a Dios a ulemekngeltengat er a Job e le ngmle blak a rengul.​—Job 1:6-12; 2:1-7.

Ngoeak sel cheldecheduch er a delongelel a Dios me a Satan, e a Jehovah ngdi mle ngii el mengedecheduch er a mekngit el uldesuel? A Biblia a kmo: “Ngikal Dios a meral melemalt a omerellel.” (2 Samuel 22:31) Ngdirrek el melekoi el kmo: “Ng chedaol, ng chedaol, ng chedaol, a Rubak el Dios el Olab a Bek el Klisiich.” (Ocholt 4:8) A chedaol el tekoi a belkul a kmo ngklikiid, e ileakl el diak a mekngit er ngii. Me a Jehovah a cherrungel e diak a kngtil. Ngmera el diak a mekngit el blekerdelel.

Me nguaisei, engdi a rebebil a melekoi el kmo a Job a dimlak el mera el chad, me tia el cheldecheduch el mla er ngii a di okesiu. Engdi tia el uldasu ngmelemalt? A bebil el bades er a Biblia a meketeklii el kmo a Job a mle mera el chad. El ua tiang, ngar er a Jakobus 5:7-11, e a Job a ulebasech el ungil el kerebai el melisiich er a Rekristiano el mo outekangel a meringel el taem e dirrek el meketeklii el kmo a Jehovah a mo omekngeltengat er tirke el outekangel. Me omko a Job me a odelecheklel a Satan a di okesiu, e a kerebai er ngii ngsebechel el melisiich er tir? Me a lmuut el tang, ngar er a Esekiel 14:14, 20, e a Job me a Noah, me a Daniel a beldukl a ngklir el kmo tir el tedei a mle melemalt el chad. Me a Job a mera el chad el ua Noah me a Daniel el mle mesisiich a klaumerang er ngii. Me a lsekum a Job a mle mera el chad, e ngulterekokl ngike el uleldechelakl er ngii el dirrek el mera el mla er ngii.

Me ngbleketakl a Biblia el mesaod er a Satan el kmo ngmera el ngar er ngii. Me ke locha mo omdasu el kmo, ‘Me ngikang, ngsebechel el tomellak ngak me a telungalek er ngak er chelecha el taem?’

Ka di molatk, oleko ngar er ngii a delebechel er a remekngit el chad el soiseb er a beluam, e ngulterekokl el mo klou a uldikel me a delengerenger er a chelsel a beluu. E ka kuk molatk er a Satan me a remekngit el anghel el tir a dirrek el omtok er a Dios, a lsekum te ngar tia el chutem e dikea el sebechir el tuobed er ngii, e ngmo ua ngerang a blekeradel er a chelsel? Ka di molatk a chais el kau a mla remenges el ngar er a beluam me a meliuekl er a beluulechad.

• Ngsebechem el mesang el kmo a delengerenger me a uldikel el diak a ungil el uchul a di meleketek alta e kede melasem el merrob?

• Ngsebechem el mesang el kmo ngmla mo betok a show er a TV me a mubi el melisiich a tekoi er a olai, alta e a rebetok el oungalek a chetirir a rengelekir a lomes aika el tekoi?

•   Ngsebechem el mesang el kmo a eltel me a debel a beluu a di metemellang alta e ngmerael a ureor el melasem el omekerreu er ngii?

• Ngsebechem el mtebengii el kmo ngar er ngii a kmal mekngit el tekoi el dubechang er a beluu el ua lengar er ngii a mesisiich el ngmors el omerius er a rechad el mo er a tellemall?

Ka momtab er ngike el losaod er ngii a Biblia el kmo nguchul aika el mekngit el tekoi: “Ngikal kmal klou el drakon a mlodik, ngikel bersoech er a rechuodel, el ngklel a Diabelong, ma lechub e ng Satan, el mengeblad er a beluulchad el rokir. Ng mlechoit el mer a beluulchad ngii ma rokui el anghel er ngii. . . . Ng kmal chebuul e beluulchad ma daob! Ele Diabelong a mla metengel el ekor kemiu e blekall er a klsiberreng, ele ng medengei el kmo ng di kedeb ku temel.” (Ocholt 12:9, 12) Me a uriul er a bo lungil el omtab aika el tekoi, e a rebetok el chad a mo medengei el kmo a Satan a mera el ngar er ngii e kmal kdekudel e le ngblak a rengul el mengesuseu er a rechad er a beluulechad el rokir.

Ke locha mo melatk el kmo ak mo metik a ulekerreu er ker, e tiang a klou a ultutelel el ker. A ongingil el suobel a mo meskau a ungil el ngeso er a uldasu.