1, 2. (a) Mosaod er a meringel el blekeradel el lechillebangel er ngii a Moses. (Momes er a siasing er a uchelel a suobel.) (b) Ngera uchul me ngdimlak lemedakt er a ngesechel a rengul a king?

 A FARAO a kmal mle mesisiich el merreder me a rechad er a Ekipten a ulemes er ngii el ua le chelid er tir. A doltirakl er a babier el When Egypt Ruled the East, e a rechad er a Ekipten a ulemdasu el kmo a Farao a mle lmuut el klou “a llemesel a rengul me a klisichel” er a ngii di el bleob er tia el chutem. A Farao a mle soal a rechad er a Ekipten a bo lemedakt er ngii me ngrirellii a krone er ngii el mla er ngii a siasing er a bersoech el di kltmokl el mo oldechelakl. Me tiang a mle ua uleklatk el kmo ngkltmokl el mo omekoad er a recherrouel. Me ka di molatk er a uldesuel a Moses er sera ledu er ngii a Jehovah el kmo: “Ak uderchau el mor a Farao el mo melai er a re chedak el Israel el oltobed er tir er a Ekipten.”​—Exo. 3:10.

² A Moses a mlo er a Ekipten e subedii a Farao er a klemechel a Dios, me ngkmal ngilasech a rengul a Farao. Me a uriul er a etiu er aike el ringel el mlo er a beluu er a Ekipten, e a Farao a kmal mlo kesib a rengul me ngdilu er a Moses el kmo: “Kele mluut el me omes er ngak, ele sel sils el cho mei e ke mo mad.” (Exo. 10:28) Me a Moses a mirrael, engdi uchei er a lorael e ngulemlaoch el kmo a ketengel a Farao el sechal a mo mad. (Exo. 11:4-8) E sola, e ngmlo melekoi er a rederta el telungalek er a  Israel me bo lokodir a sechal el sib me a lechub e ngkaming e lousbech a rsechel el meliim a tuangel er a blirir. A sechal el sib a mle chedaol er a osengel a Ra el ngii a ta er a chelid er a rechad er a Ekipten. (Exo. 12:5-7) Me ngmo mekerang a Farao? A Moses a dimlak el medakt er ngii. E ngera uchul? E le nguluumerang er a Jehovah e ullengesenges er ngii me ngdimlak “le medakt er a ngesechel a rengul a king.” Ngbai “mle meduch a rengul el outekangel el ua lulemes er a Dios el ngikel diak le moues.”​—Monguiu er a Hebru 11:27, 28.

3. Kede mo mesaod a ngera el ker el kirel a klaumerang er a Moses?

³ Me a klaumerang er kau, ngkmal mesisiich me ngdi ua lsebechem el “mesa Dios”? (Mt. 5:8) Ngar tia el suobel e kede mo mesaod er a kerebil a Moses me bo lolisiich er a klaumerang er kid me bo el sebeched el omes er a “Dios el ngikel diak le moues.” Ngmilekerang a klaumerang er ngii e smisichii me ngdiak bo lemedakt er a rechad? Ngmilekerang e ochotii el kmo ngmera el uluumerang a telbilel a Dios? E milekerang e sel osengel el ulemes er a “Dios el ngikel diak le moues” e smisichii er sel taem el ngii me a rechedal a mle chelebangel a kdekudel el blekeradel?

4. Nglocha mle ua ngera uldesuir tirke el diak a klaumerang er tir er sel taem el lebo er a medal a Farao a Moses?

⁴ A rechad el dimlak a klaumerang er tir a locha ulemdasu el kmo a Moses a dimlak a klisichel el mo omtok er a Farao. A klengar er a Moses a mle ua lultuil er a Farao. Me ngdirrek el mle ta el loker er a Jehovah el kmo: “Ngak ak techang me ng kirek el mor a Farao el mo oltobed er a re chad er a Israel er a Ekipten?” (Exo. 3:11) A bekord el 40 el rak er a uchei, e a Moses a chiliis er a Ekipten el millasem el olsobel er a klengar er ngii. Me ngmle sebechel el omdasu el kmo, ‘Ngdiak a rolel e kluut el mo er a Ekipten e le kungesechii a rengul a king.’

5, 6. Ngerang a ngilsuir a Moses el mo meluu er a Jehovah e mo diak lemedakt er a Farao?

⁵ Me a uchei er a lluut el mo er a Ekipten a Moses, e a Dios a ullisechakl er ngii er a klou a ultutelel el suobel. A Moses a milsaod er tia el suobel el ngar er a babier er a Job el kmo: “Omeluu er a Rubak a llomeserreng.” (Job 2828) A Jehovah a mle soal a Moses a bo lemellomes a rengul e bo loluu er ngii me ngulemekesiu er a klisichel el mo er a klisichir a redi chad. Me nguleker el kmo: “Ng techa msa ngerel a chad? E techa rullii el mo mechad ma lechub e ng bengong? Ng techa msa osengel ma lechub e ng rullii el mo meiko? Ng ngak el RUBAK.”​—Exo. 4:11.

⁶ Me ngerang silubii a Moses? Ngmlo medengei el kmo a Jehovah a oldurech er ngii, me ngdiak el kirel el mo medakt. Me a Dios a mo smisichii me ngmo sebechel el ouchais a klemechel el mo er a Farao. E tiang a dimlak el ketengir a remesiungel a Jehovah el mo chelebangel a kdekudel el blekeradel el ngar er a Ekipten. A Moses a locha mlo melatk er a taem el Jehovah a ulemekerreu er ngii, Abraham me a Josef er tirke el mle Farao er a uchei. Me a Farao a dimlak a klisichel er a Jehovah. (Gen. 12:17-19; 41:14, 39-41; Exo. 1:22–2:10) A Moses a mle sebechel el omes er a “Dios el ngikel diak le moues” me nguleba blekeu el mo ouchais er a Farao a rokui el tekingel a Jehovah.

7. Ngmilekerang a klaumerang er a ta el odos e omekerreu er ngii?

⁷ A klaumerang er a ta el odos el Ella a silisichii me ngdimlak bo lemedakt er a rechad. Sera rak er a 1949 e a rechad er a KGB el tir a secret police er a Soviet Union a mildechemii. Te mildobed a bilel el rokui e a rebebil er a remekekerei el chad el bulis a di ullengeng er ngii. Ngdilu el kmo, “Ak kmal mlo merur. Engdi uriul er a kululuuch el mo er a Jehovah e ak mlo melechesuar a budech e kmal mlo chelellakl a renguk.” E sola e te ngiluu el sukur er a milkolk el kekerei el delemerab el edei el klebesei. Ngdilechelii el kmo: “A rebebil er tir a uleldiu el kmo: ‘Aki mo okngemedii tia el ngakl el Jehovah me ngmo diak a rechad er a Estonia el melatk er ngii! Aki mo odureklau el mo er a kiamp, e tirke el bebil a mo er a Siberia!’ Te millenguul er ngak el kmo, ‘Me ngar er ker a Dios er kau el Jehovah?’” Me a Ella ngmlo medakt er a rechad me a lechub e nguluumerang er a Jehovah? Sera longetiit er ngii e ngdimlak bo lemedakt e bai dilu er tir el kmo:  “Ak kmal mla mo ungil melatk er tia el tekoi, e bai kongei el mo kelebus me lak temellii a deleuill er ngak me a Jehovah er a bai bo kmimokl e kuridii a kengei er ngii.” A Ella a ulemes er a Jehovah el ua lemera el chad el di ua osengel sel lomes er tirke el dilechor er medal. Me a klaumerang er ngii a ngilsuir el mo melemolem el blak a rengul.

8, 9. (a) Ngmekerang e mo diak omedakt er a rechad? (b) Ngera kirem el melatk er ngii sel momelechesiu er kau el mocha omuchel el medakt er a rechad?

⁸ A klaumerang er kau er a Jehovah a sebechel el smisichau me ngmo diak omedakt er a rechad. Me a lsekum a rullab a dereder a melasem el merrob er kau me bo lak mosiou er a Dios, e ke locha mo omdasu el kmo a klengar er kau a ultuil er tir. Me a lechub e ke omdasu el kmo, ‘Ngkmal diak a rolel a kulemolem el mesiou er a Jehovah e le kungasech a rengrir a rullab a dereder.’ Me a lsekum ngmo uaisei a uldesuem, e lak mobes el kmo a klaumerang a sebechel el ngosukau me ngmo diak omedakt er a rechad. (Monguiu er a Osisechakl 29:25.) A Jehovah a kmo: “Ng ngera me kom medakt er a di chad el di ua chudel el mo mad.”​—Isa. 51:12, 13.

⁹ Bo blechoel el melatk er a Demam el ngar er a eanged el Ngii a olab a bek el klisiich. Ngomes er tirke el rokui el chuarm er a chelebirukel el omeruul e chubteterir me ngolengeseu er tir. (Exo. 3:7-10) Me a lsekum e ngkirem el mo mesaod er a klaumerang er kau el mo er a rengarbab el chad er a beluu, e a Biblia a kmo: “Lak bo le sebek a rengmiu er a ikel bo molekoi ma lechub e le sebek a rengmiu el kmo ng mekera cho bo mongedecheduch; ele sel bo le belsechel, e ng ekor kemiu a ikel bo molekoi.” (Mt. 10:18-20) A remerreder er a beluu a di chad e diak a klisichir el omtok er a Jehovah. Me a lsekum e ke melemolem el melisiich er a klaumerang er kau er chelechang, e ngmo sebechem el omes er a Jehovah el ua lemera el Chad el semeriar el mo ngosukau.

10. (a) Sera Nisan 1513 er a uchei er a Kristus e ngerang dilung a Jehovah el mo er a rechad er a Israel? (b) Ngera uchul me a Moses a uleltirakl a tekingel a Dios?

¹⁰ Sera Nisan 1513 er a uchei er a Kristus, e a Jehovah a dilu er a Moses me a Aron me bo ledu er a rechad er a Israel el kmo ngkirir el mekodir a sechal el sib me a lechub e ngkaming e ousbech a rsechel el meliim a tuangel er a blirir. (Exo. 12:3-7) Me alta tirka el chad a dirkak a ta el loruul er tiang, engdi a Paulus a milluches el kmo, a Moses a “uluumerang a uchul me ng mirruul er a Baskua e ultebedii a tekoi el mor a re chad er a Israel me lediim a rasech, ma Anghel er a Kodall lak bo lokodeterir a re kot el ngelekir el sechal.” (Heb. 11:28) A Moses a mle medengei el kmo a telbilel a Jehovah a ulterekokl el mo tmaut, e uluumerang el kmo a rokui el ketengir a rechad er a Ekipten el sechal a mo mad.

11. Ngera uchul me a Moses a uluuchais a tekingel a Jehovah el mo er a rechad?

¹¹ A Moses a ullengesenges e mlo mesubed er a derta el telungalek er a Israel me lak lemad a ketengir el sechal, alta e a rengelekel a locha mla er a beluu er a Midian me ngdiak el sebechel a “Anghel er a Kodall” el mekodeterir. (Exo. 18:1-6) * A Moses a kmal mle betik a rengul er a rechad er a Israel a uchul me ngdi mle mereched el omekedong “er a rokui el merreder er a Israel, e dilu er tir el kmo, . . . ‘Mokodir ngikel mor a Baskua el charm.’”​—Exo. 12:21.

12. Ngera el klumech a soal a Jehovah a domerk er ngii?

¹² A rechanghel a olengeseu er a rechedal a Jehovah el mo ouchais er a klou a ultutelel el klumech el kmo: “Mkebkellii a Dios e modengesii, ele ng merma belsechel el bo loukerrekeriil er a rokuil chad. Mongull el meluluuch er ngii el ulemeob er a eanged, ma chutem, ma daob, ma madedok el ralm!” (Och. 14:7) Me chelechang e ngtaem el kired el merkii tia el klumech. Ngkired el mengelechel er a retonari er kid me lemereched el tuobed er a Kloul Babilon el ngii a omtechei a klsuul el klechelid, me lak bo el “obals el obengkel.” (Och. 18:4) Me a ‘re kuk bebil sib’ a oureor el olengeseu er a rengellitel el Kristiano el melisiich er a rechad el mo sechelil a Dios.​—Jn. 10:16; 2 Ko. 5:20.

13. Ngera rullau el mo soam el omerk er a ungil chais?

 ¹³ Ngulterekokl a rengud el kmo a Dios a mla mo “belsechel el bo loukerrekeriil er a rokui el chad.” Kede dirrek el oumerang el kmo tia el ureor er a berkel a klumech a kmal orechudel el ua ledilu Jehovah. A apostol el Johanes a milsa ues el kirir “a re teual anghel el dechor er a eual uchul a eolt er a beluulchad, el merers a ikel eual eolt er ngii me ng diak lolokou er a beluulchad.” (Och. 7:1) Me a klaumerang er kau, ngrullau me ngmo sebechem el ua omomes er tirke el anghel el di kltmokl el mengedoked a semesemel a kloul ringel? Sel bo lulterekokl a rengum el kmo a telbilel a Jehovah a mo tmaut, e ngmengal mo soam el omerk er a ungil chais.

14. Ngera uchul me ngsoad el ‘mengelechel er a mekngit el chad me lobult er a ikel rolel me le sobel’?

¹⁴ Me alta ngmla mo er ngii a ungil deleuill er kid me a Jehovah e dirrek el oba omelatk el mo kiei el mo cherechar, engdi kede ungil medengei el kmo ngngerecheled el mo ‘mengelechel er a mekngit el chad me lobult er a ikel rolel me le sobel.’ (Monguiu er a Esekiel 3:17-19.) Engdi ngdiak di el tiakid a uchul e kede omerk er a klumech. Kede bai omerk er a klumech e le ngbetik a rengud er a Jehovah me a rengar bita er kid. Ngokiu sel cheldechedechal el kirel ngike el chad er a Samaria, e a Jesus a ulemeketakl er a belkul a klechubechub me a bltikerreng. Me di lekau el oker el kmo: ‘Ngak ak ua ngike el chad er a Samaria, me a lechub e ak ua ngike el prist me ngike el chad er a Levait? Ak blechoel el mengedecheduch er a rechad el kirel a klaumerang er ngak, me a lechub e ngbetok a omesodek el rullak me ngdiak kumerk er a klumech el mo er tir?’ (Lk. 10:25-37) A lsekum ngbetik a rengud er a retonari er kid e oumerang el kmo a telbilel a Dios a mo tmaut, e kede mo er aike el sebeched el omerk er a klumech er a uchei er a lemei a ulebongel.

15. Ngera uchul me a rechad er a Israel a mlo medakt el ua lekea rolel e lechiis?

¹⁵ A klaumerang er a Moses el bedul a “Dios el ngikel diak le moues” a mle klou a ultutelel er sel taem el rechad er a Israel a chillebangel a meringel el blekeradel er a uriul er a letobed er a Ekipten. A Biblia a ouchais el kmo: “A re chad er a Israel a milseterir a re chad er a Ekipten el merma oldechelakl er tir; me te kmal mlo medakt, me tuleldiu el mor a RUBAK.” (Exo. 14:10-12) Ngmle kirir el medengei el kmo tiang a mo duubech e le Jehovah a ulemlaoch er a uchei el kmo: “Ak mo rullii a Farao el mo medecherecher a rengul, me ng mo oltoir er tir, ma klisichek er a Farao ma rokui el soldau er ngii a mo odengesak. Ma re chad er a Ekipten a mo medengei el kmo ngak a RUBAK.” (Exo. 14:4) Me alta e a Jehovah a di mla subedeterir er a uchei, engdi a rechad er a Israel a dimlak loumerang el kmo ngmo olsobel er tir. Te merema er a tkul a Bekerkard el Daob e omes a kuruma er a Farao el di merael el olekedang, e dirrek el omes er ngika el 80 a rekil el klekerengel a sib el mengetakl er tir. Me ngkmal sobeka rengrir el ua lekea rolel e lechiis.

16. Ngmilekerang a klaumerang er a Moses e smisichii er a lengar er a Bekerkard el Daob?

¹⁶ A Moses a dimlak el medakt e le klaumerang er ngii a rirellii me ngmlo sebechel el ua ‘lomes a ikel bo loruul a RUBAK’ el olsobel er tir. Ngmle medengei el kmo a Jehovah a kuk mesisiich er a daob me a urrurt er a resoldau. (Monguiu er a Exodus 14:13, 14.) Me a klaumerang er ngii a millisiich er a rechedal a Dios. Me tir el “uluumerang a uchul me te mlo imuul er a Bekerkard el Daob el ua luleak a medirt el chutem; e a re chad er a Ekipten er a losuub er tir el leko te mo imuul, e te di riros.” (Heb. 11:29) Me seikid, e a “re chad a mlo medakt e milluu er a RUBAK; tuluumerang er a RUBAK ma mesiungel er a Moses.”​—Exo. 14:31.

17. Ngera mo duubech el uchul me a klaumerang er kid a mo measem?

¹⁷ Ngdi kmedung e kede mo chelebangel a meringel el blekeradel. Sel taem el lomuchel a Armakedon e a kabelment er tia el beluulechad a mla okngemed aike el klechelid el betok a rechederir e klou a klisichir. (Och. 17:16) A Jehovah a ulemlaoch el kmo, seikid el taem e kede mo ua beluu el “mechitechut” e “diak loucheuatel.” (Ese. 38:10-12, 14-16) Me a lsekum ngmo mechitechut a klaumerang er kid er sel taem e ngsebeched el mo omdasu el kmo ngkmal diak a rolel e dechiis. Me kau ke mo mekerang er seikid el taem?

18. Ngera ngosukid me ngmo diak demedakt er a temel a kloul ringel?

¹⁸ Ngdiak el kired el mo medakt. E ngera uchul? E le alta e a Jehovah a ulemlaoch el kmo a rechedal a mo modechelakl, engdi ngdirrek el dilu el kmo ngmo osobelterir. A Jehovah a kmo: “Sel sils el kirel a Kok el me omtok er a beluu er a Israel, e ng mo kesib a renguk. Ng cherresek ma ngesechel a renguk.” (Ese. 38:18-23) Me ngmo okngemedeterir a tirke el sorir el omekcharm er a rechedal. Me a lsekum e ke oumerang el kmo a Jehovah a mo omekerreu er kau er sel “klou e kdekudel sils” er ngii, e ngmo sebechem el mesisiich el dechor e ‘omes a ikel bo loruul a RUBAK’ el olsobel er kau.​—Joel 2:31, 32.

19. (a) Ngmle ua ngera deleuill er a Moses me a Jehovah? (b) Ngera el klengeltengat a obo mnguu a lsekum e ke olengesenges er a Jehovah “er a ikel bek el moruul”?

¹⁹ Misei e molemolem el omes er a “Dios el ngikel diak le moues,” me bo mkltmokl el kirel aika el tekoi el kmedu el mo er ngii. Msisichii a deleuill er kau me a Jehovah el okiu sel oblechoel el mesuub e moluluuch. A Moses a kmal mle kmes a deleuill er ngii me a Jehovah, e a Jehovah a uluusbech er ngii el mo meruul a meklou el tekoi, a uchul me a Biblia a kmo, a Jehovah a ua “ble le chachuchau” ngii me a Moses el chadecheduch. (Dut. 34:10) A Moses a kmal mle ileakl el profet. Me a lsekum e ke melemolem el melisiich er a klaumerang er kau e ngdirrek el sebechel el mo kmes a deleuill er kau me a Jehovah el ua bo el sebechem el omes er ngii. Me a lsekum e ke mo olengesenges er ngii “er a ikel bek el moruul,” e a Tekingel a Dios a subedid el kmo, “ngii a mo ochotii er kau a melemalt el rael.”​—Osi. 3:6.