Ke locha mo oker el kmo: ‘A lsekum a Dios a medengei a rokui el tekoi, el mo lmuut er a uldesuek me aike el kuusbech, e ngera me ngkirek el meluluuch?’ Tiang a kmal ungil el ker, e le Jesus me ngdirrek el millekoi el kmo a Dios a “medengei a ikel mousbech er uchei er cho molengit er ngii.” (Mateus 6:8) A King el David er a irechar me ngdirrek el mlo medengelii tiang me ngmilluches el kmo: “E dirrek el uchei er a kungedecheduch e ke medengei a bo kulekoi.” (Psalm 139:4) Me a leuaisei e ngera me ngkired el mo er a Jehovah el oeak a nglunguuch? A bo donger er tiang, e bo dosaod el kmo ngera ngmelekoi a Biblia el kirel a nglunguchir a remesiungel a Dios. *

A Biblia a melekoi el kmo a Jehovah * el Dios a medengei a rokui el tekoi, e dirrek el ochotii el kmo ngdiak di longudel a rokui el tekoi el kirir a remengull er ngii e lemerekong. (Psalm 139:6; Rom 11:33) Me a cherrungel el klemedengei er ngii a diak el ua rolel a loureor a computer el di melai e mengudel a tekoi el kirir a rechad. A Dios a bai semeriar el mo medengei aike el mera el ngar er a rengrir a rechad e le ngsoal a bo dekeed er ngii. (Psalm 139:23, 24; Jakobus 4:8) Sei a uchul me a Jesus a millisiich er a rultirakl er ngii el mo meluluuch alta e a Demal a kmal ungil el medengei aike el dousbech. (Mateus 6:6-8) Me sel dolemolem el ouchais aike el ngar er a uldesued el mo er Ngike el Ulemeob er kid, e kede mengal mo kmeed er ngii.

A lebebil er a taem e ngmo meringel er kid el lmatk aike el tekoi el soad el olengit sel doluluuch. Ngar er aikaikid el taem, e a Dios a sebechel el mes aike el mera el ngar er a rengud, e ousbech er a cherrungel el klemedengei er ngii el kirel a tekoi el dechelebangel er ngii e mo meskid aike el dousbech. (Rom 8:26, 27; Efesus 3:20) Me sel bo dodengei el kmo a Dios a ngar er ngii a bla el lerellii er a klengar er kid, el mo lmuut er aike el mekekerei el tekoi, e kede mo omelechesiu er kid el kmeed er ngii.

A Biblia a meketeklii el kmo Ngike el Kot el Ngarbab el Dios a onger a nglunguchir a reblak a rengrir el mesiungel, engdi ngdirrek el meskid a uchul me ngdiak lorrenges a bebil el nglunguuch. El uai tiang, sel taem er a lesal klou a delengerenger er a beluu er a Israel, e a Dios a ulemekrael er a profet el Isaia el mo melekoi er a rechad el kmo: “Cho msal kmal meluluuch, me ngak a di diak bo kurrenges, ele chimomiu a chelsechusem er a klengit.” (Isaia 1:15) Me ngbleketakl el kmo, tirke el ouketui a llechul a Dios me a lechub e te meluluuch el diak el ungil a moktek er tir a diak el sebechir el omdasu el kmo a Dios a mo orrenges a nglunguchir.​—Osisechakl 28:9; Jakobus 4:3.

Engdi a Biblia a dirrek el melekoi el kmo: “Ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.” (1 Johanes 5:14) Me tiang belkul a kmo a Dios a di mereched el kongei aike el rokui el ongterir a remengull er ngii? Ngdiak leuaisei. Ka molatk el kirel a apostol el Paulus, el ullengit er a Dios el edei el taem  me lecheridii a “toched” el ngar er a bedengel. (2 Korinth 12:7, 8) A Paulus a locha chilarm er a meringel el rakt el mla er a medal, me nglocha kmal mle uchul a ringel el mo er ngii. Ngdirrek el ngiluu a sengk el mo omekungil er a rechad e dirrek el ulekisii a chad er a kodall, engdi ngmle kirel el di outekangel er tia el secherel. (Rellir 19:11, 12; 20:9, 10) Me alta e a nglunguchel a dimlak lemonger el oltirakl er sel mle soal, engdi nguleba omereng el saul e kilengei a ngelseuil a Dios.​—2 Korinth 12:9, 10.

Ngklemerang el kmo a rebebil el chad el ngar er a Biblia a mlonger a nglunguchir el ngar er a mengasireng el rolel. (2 King 20:1-7) Engdi a chouaika el tekoi a dimlak leblechoel el duubech er a irechar. A rebebil el uluumerang a mlo mekngit a rengrir sel sekum e te mo melatk el kmo a Dios a dimlak longer a nglunguchir. A King el David a uleker el kmo: “RUBAK, ng mo oingerang? Kau ke di bles er ngak el mo cherechar?” (Psalm 13:1) Engdi ngika el blak a rengul el chad er a bo lolatk er a ildisel a taem el Jehovah a ulsebelii, e ngliluut el smisichii a klaumerang er ngii er a Dios. Ngar er a osisiu el nglunguuch, e a David a dilu el kmo: “Ngak a oumeral ulsirs er a diak le mengodech el bltkil a rengum.” (Psalm 13:⁠5) Me ngdi uai a David, a remengull er a Dios er chelechang a locha kirir el mo blak a rengrir el meluluuch el dimerekmo bo lodengei el kmo a Dios a mla onger a nglunguchir.​—Rom 12:12.

A Dios a onger a ongtid el kirel aike el mera el dousbech.

Ngar er ngii a ungil el uchul e a ruungalek a diak el blechoel el omesterir a rengelekir aike el tekoi el lolengit er sel taem el lolengit er ngii. Me ngdi osisiu, a Dios a locha diak bo longer er a ongtid el ngar er sel rolel me a taem el soad. Engdi ngsebechel el ulterekokl a rengud el kmo Ngike el Ulemeob er kid, el ngii a betik a rengul el chedam, a mo onger a ongtid el kirel aike el mera el dousbech el ngar er sel ungil taem el ngar er a melemalt el rolel.​—Lukas 11:11-13.

A Dios a locha mo onger engdi ngdiak demereched el mtebengii.

Engdi ngkuk mekerang a lsekum e kede osiik a ongelaod el kirel a mondai el blechoel el ngar er ngii? Me kid ngkired el mo omdasu el kmo ngdiak a mengasireng el nger er a nglunguuch me ngbelkul a kmo a Jehovah a dirkak longer er a nglunguched? A Jehovah a locha mla onger er kid el ngar er a rolel el dimlak dodengelii. El uai tiang, a kmal kmeed el sechelid a locha riruul aike el sebechel el olengeseu er kid er sel taem el duluusbech a ngeso. (Osisechakl 17:17) A Jehovah nglocha mle sebechel el rullii ngika el sechelid el me olengeseu er kid? Me a lmuut el tang, a nger er a Dios el kirel a ongtil a chad el kirel a ngeso a sebechel el mei el okiu a Biblia. Ngar er a chelsel e ngsebeched el metik a ngeso el dousbech el mo outekangel er a meringel el tekoi el dechelebangel er ngii.​—2 Timothy 3:16, 17.

A Dios a blechoel el omesterir a rechedal a klisiich el mo outekangel er a mondai er tir er a bai longeroid er ngii el mondai. (2 Korinth 4:7) El uai tiang, a Jesus er a lolengit er a Demal me lecheridii a ringel el lechelebangel er ngii, e le ngmle bekikl el kmo ngmo uchul a otuub er a ngklel a Dios, e a Jehovah a ulderchii a anghel el mo melisiich er a Ngelekel. (Lukas 22:42, 43) Me ngdi osisiu, a Dios a sebechel el ousbech er a kmeed el sechelid el me melisiich er kid er sel taem el desal ousbech er ngii. (Osisechakl 12:25) Me a chouaitia el nger a diak el bleketakl, me ngkired el mengal mo kerekikl el omtab er a rolel a Dios a longer a nglunguched.

A bebil el nger a kirel el mengiil er sel taem el Dios a medengei el kmo ngungil.

A Biblia a melekoi el kmo Ngike el Kot el Ngarbab el Dios a olecholt a kengei er ngii el mo er tirke el ngariou a rengrir el chad “er sel ungil el belsechel er ngii.” (1 Petrus 5:6) Me sel sekum e kede omdasu el kmo ngmeoud el onger a nglunguched, e ngdiak el kired el omes er ngii el kmo a Jehovah a diak el semeriar er kid. E ngbai ngii el medengei a lmuut el betok a uchul, me Ngika el Ulemeob er kid a merriter a ongtid el oltirakl aike el lodengei el kmo ngungil el kired.

Me a bo domekesiu er ngii, e ka molatk el kmo ngar er ngii a kekerei el ngelekem el sechal el soal a obecherar a rrat er ngii. Kau ke di mereched el kongei er tia el ongtil? A lsekum e ke omdasu el kmo ngdirkak bo el sebechel el ourrat, e nglocha mo diak momechar er ngii er seikid el taem. Engdi ke locha mo kongei er tia el ongtil sel modengei el kmo ngmo uchul a klungiolel. Me ngdi osisiu, sel deblechoel el meluluuch e a Dios a sebechel el meskid aike el ‘desal oureng er ngii’ el ngar er sel ungil el temel.​—Psalm 37:4.

A Biblia a mengelechel er a remera el Kristiano me lak loridii sel uldesuir el kmo a nglunguuch a klou a ultutelel.  Engdi a rebebil a locha mo melekoi el kmo ‘tia beot a dosaod er ngii engdi ngmeringel a doruul er ngii.’ Ngklemerang el tekoi, e le a lsekum e ngmla mo kemanget el taem el doutekangel er a mondai me a lechub a chebirukel el tekoi el mei er kid, e kede mo metik er ngii el kmo ngmeringel a dongiil er a nger er a Dios. Me nguaisei, engdi ngklou a ultutelel a dolatk er sel lullisechakl er ngii a Jesus el kmo ngkired el blechoel el meluluuch.

A Jesus a milsaod er a okesiu el kirel a ta el chebuul el melakl el dil el mle blechoel el mo er a ta el diak el melemalt el chad er a kerrekeriil me bo lemuklemalt a tekoi el ble lechelebangel er ngii. (Lukas 18:1-3) Alta e ngika el chad er a kerrekeriil a dimlak el lolengeseu er ngii er a kot, engdi a uriul e ngdi mle ngii el melekoi el kmo: “Mak mochu oukerrekeriil el smodii me ng mengubet. Ele lak, e ng di omais el mei el mol oterkii a renguk.” (Lukas 18:4, 5) A doltirakl er a tekoi er a Grik, e ngika el chad er a kerrekeriil a mlo olengeseu er ngika el melakl el dil me lak “longesuar er a medal” el belkul a kmo ng “tomellii a chisel.” * Me a lsekum a diak el melemalt el chad er a kerrekeriil a mo olengeseu er a chebuul el melakl el dil e le ngmle medakt a uldesuir a rebebil, e ngike el Dios er a ulekerreu a ulterekokl el mo olengeseu er tirke el “olengit a ngesou er ngii er a llomes ma klebesei.” Me nguai aike el lullekoi a Jesus, a Dios a mo “mereched el mo ungil el ngosuterir.”​—Lukas 18:6-8.

Me alta lebebil er a taem e kede mo mesaik el olengit a ngeso, engdi ngdiak el kired el meterob. A dolemolem el meluluuch, e kede ochotii el kmo ngsoad a Jehovah a lomekrael er a klengar er kid. Kede dirrek el mo medengei el kmo ngmekerang a Dios a longer a ongtid, e tiang a mo uchul e kede mo kmeed er ngii. Ngmera el sebechel el ulterekokl a rengud el kmo a Jehovah a mo onger a nglunguched a lsekum e kede melemolem el olengit er ngii e diak doumededenger el kmo ngorrenges me a lechub e ngdiak.​—Lukas 11:9.