A ta el chedam el ngar er a Brazil a melekoi el kmo: “Aki kmal mo semeriar el mesaod a suobel sel letemel a Omengull el Telungalek, me a lsekum e ngdiak terebengii e aki di melemolem el mo metuda klebesei.” A kuk ta er a chedam el ngar er a Siabal a melekoi el kmo a teruich a rekil el ngelekel el sechal a mo diak lodengei el kmo ngmla mo ua klteketel a ngera el taem el losuub e soal el dirk melemolem. E ngera uchul? Ngika el chedam a mesaod el kmo a ngelekel a “kmal blak a rengul, e tiang a uchul a deuil a rengul.”

Me nguaisei, engdi ngdiak el rokui el ngalek a semeriar el kirel a temel a omengull el telungalek er tir. A rebebil er tir a diak el ledeu a rengrir el meruul er ngii. E ngera uchul? A ta el odam el ngar er a Togo a melekoi el kmo: “A omengull er kid el mo er a Jehovah a diak el kirel el checherd a rengud er ngii.” A lsekum e ngchecherd a rengud er a omengull el telungalek, e ngbelkul a kmo ngkirel el mo er ngii a omelodech er a rolel a doruul er ngii. A rebetok el telungalek a miltik el kmo a temel a omengull el telungalek a sebeched el “mo metik er a deurreng” er ngii, el di uai a rechad er a Israel el kmal uleldeu a rengrir el kirel a Ulengull el Sils.​—Isa. 58:13, 14.

A rechedam el Kristiano a kirir el kerekikl me a telungalek er tir a ungil a rengrir er a temel a omengull el telungalek er tir. Sel loruul er tiang a rechedam, e ngmo uchul e a telungalek me te mengal mo dmeu a rengrir. A Ralf, el ngar er ngii a retedei el ngelekel el redil me a chimo el sechal, a melekoi el kmo a temel a omengull el telungalek er tir a di ua lechadecheduch er a bai losuub. El oeak a ngera el rolel? A rokui el chad a dmak el mesaod a tekoi. A lebebil er a taem e ngmo meringel el rulleterir a rebek el chad el mo semeriar e mo teloi er tia el omesuub. A ta el chedil a kmo, “Ngdiak leblechoel el ngar er ngii a klisichel a bedengek el rullii a omengull el telungalek er kemam el mo uchul a klou el deurreng el uai sel mle soak.” Ngsebechem el rullii a temel a omengull el telungalek er kau el mo uchul a klou el deurreng?

A ta el chedam el ngar er a Germany a melekoi el kmo: “Ngkired el mo meduch el ousbech a kakerous el rolel a osisechakl.” A Natalia el terung a rengelekel a melekoi el kmo, “Sel kot el klou a ultutelel el tekoi el kirel a telungalek er kemam aike el kakerous el tekoi el sebeched el remuul.” A  rebetok el telungalek a omii er a temel a omengull el telungalek. A Cleiton el chad er a Brazil, el terung a rengeasek el ngelekel a mesaod el kmo sel loruul el uaisei e ngrulleterir me te mengal mo semeriar el mesuub “e a rokui el chad a mo sebechir el teloi er ngii.” A lsekum e a rengalek a kmal chacheroid a rekrir, e a ruungalek a sebechir el mesterir aike el lousbech a derta me a derta er tir el oeak sel lomii er a temel a omesubir. Ngdirrek el sebechir el melilt a kakerous el rolel a osisechakl sel lolilt a babier el bo losuub el telungalek me a rolel a bo lousbech el mesuub.

A rebebil el telungalek ngera te meruul el mo uchul e ngmo sebechel el ngar er ngii a kakerous el rolel a loruul er a omengull el telungalek er tir? A rebebil a omuchel er a temel a omengull el telungalek er tir el oeak sel longitakl a chelitakl el mo er a Jehovah. A Juan el ngar er a Mexico a kmo: “Nguchul e ngmo ungil a rengrir a rechad e kutmeklemam el kirel a suobel el ki bo mosaod.” A telungalek er ngii a melilt a chelitakl el mesaod a osisiu el suobel el bo losuub er ngii er seikid el kesus.

A rebetok el telungalek a dmak el menguiu er a Biblia. E a derta el chedal a telungalek a menguiu a tekingir a rekakerous el chad el ngar er a bades. A ta el chedam el ngar er a Siabal a melekoi el kmo sera uchelel e ngulemdasu el kmo tiang a “kora mle ngodech el rolel a donguiu” er a Biblia. Engdi tirka el teru el ngelekel el sechal a mle dmeu a rengrir el omes er a demerir me a derrir el oldeu a rengrir el obengterir er a temel a omengull el telungalek. Te ngar er ngii a rekuk bebil el telungalek el meruul er tir el leko te tirke el chad el ngar er a Biblia. A Roger, el kiei er a South Africa el ngar er ngii a reteru el ngelekel el sechal a melekoi el kmo a rengalek “a blechoel el mes a tekoi el ngar er a cheldecheduch er a Biblia el kid a ruungalek a dirkak deues.”

A ta er a tekoi el sebechel a telungalek el meruul er ngii a sel ledak el meruul a tekoi el uai a lomekedechor er a kekerei el arhe er a Noah me a lechub e ngtemplo er a Salomon. Ngdirrek el sebechir el merriter a suobel el kirel aika el tekoi. El uai tiang, ngar er a Asia e a ta el eim a rekil el ngalek me a demal me a delal me a delal el mechas a millasem er tiang. Te dilak el rullii a ua teletelel a board game el kirel aike el beluu el leblo er ngii a Paulus er a lemissionari. A rebebil el telungalek a mla remuul a board game el mengai er aike el cheldecheduch el ngar er a babier er a Exodus. A 19 a rekil el chad el ngklel a Donald el ngar er a Togo a melekoi el kmo aike el kakerous el tekoi el lurruul “a mlo uchul a deurreng er a temel a omengull el telungalek er kemam e dirrek el mlo uchul a deuil rengmam.” Ngsebechem el mdesuii a tekoi el sebechem el rullii el mo uchul e ngmo er ngii a deurreng er a temel a omengull el telungalek er kau?

Me alta e kede mo semeriar sel lengar er ngii a kakerous el tekoi el doruul er a temel a omengull el telungalek, engdi ngusbechall a lmuut el betok me bo el sebechir a rokui el chad el ngmai a klungiolir. A rokui el chad a kirir el mengetmokl er tir er a uchei. Nglocha mo meringel er a rengalek el dengchokl e mesuub el kemanget el taem, me ngkirel a chedam el kerekikl el ngiltii a suobel el bo lesemeriar er ngii a rengalek. E a uriul e ngkirel el mo ungil el kutmeklii. A ta el chedam a kmo, “Sel sekum e ak kltmokl, e a rokui el chad a mo er ngii a lenguu er a temel a omesuub.” A kuk ta er a chedam el ngar er a Germany a ouchais er a telungalek er ngii el kmo ngera te mo mesuub er ngii er a temel a omengull el telungalek el kirel a ongingil el buil. A ta er a telungalek el ngar er a Benin el ngar er ngii a telolem el ngelekir a lebebil e te omes aike el DVD er a cheldebecheled el ua el ta er a telengtengil a omengull el telungalek er tir. Me te mekerang a longetmokl er tir? A demerir a di uchei e ngmesterir aike el ker el bo losaod. Me ngkmal klou a lerellii el kirel a omengull el telungalek er kid sel dongetmokl er kid er a uchei.

Sel sekum e a telungalek a medengei er a uchei el kmo ngera el suobel a mo soadel, e ngmo sebechir el mesaod er ngii er a uchei er a lebo er ngii a omengull el telungalek. Seikid e te mo ousemeriar el kirel a omesuub. E a lsekum a rokui el ngar er a chelsel a telungalek a ngar er ngii a tekoi el sebechir el meruul er ngii, e a derta el chad a mo melechesuar el kmo tiang a temel a omengull el telungalek er ngii.

A rebetok el telungalek a meringel er tir a blechoel el meruul er a temel a omengull el telungalek er tir. E ngera uchul?

A rebebil er a ruungalek a kirir el oureor el betok el sikang me bo el sebechir el omeka er a telungalek er tir. El uai tiang, a ta el chedam el ngar er a Mexico a tuobed er a blil er a elolem el klok er a tutau e diak el bo el rei el mo lmuut er a eai el klok er a klebesei. Ngdirrek el ngar er ngii a rebebil el kirir el melodech er a temel a omengull el telungalek er tir e le ngmo er ngii a odngelel a odam el oldingel a ongdibel me a lechub e ngmo er ngii a ta er aike el meklou el ongdibel.

Me alta e ngmo meringel, engdi ngkired el mo blechoel el meruul er tia el omengull el telungalek er kid. A Loïs el teruich me a tang a rekil el ngalek el kiei er a Togo a mesaod er a klungel a ultutelel a omengull el telungalek el kirel ngii me a telungalek er ngii el kmo: “Alta e ngmo er ngii a taem el ki bo meoud el omuchel er a omengull el telungalek er kemam e le ngmla er ngii a tekoi el dilubech er sei el sils, engdi aki blechoel el meruul er ngii.” Me a leuaisei, e ngklou a ultutelel a derellii a temel a omengull el telungalek er kid er a uchelel a bek el sandei. E ngera uchul? E le a lsekum e ngar er ngii a kmung ngera el duubech, e ngsebechem el ngodechii el mo er a kuk ta er a sils.

Ngera uchul me kede omekedong er ngii el omengull el telungalek? E le tiang a ta er a telengtengil a omengull er kid el mo er a Jehovah. Me ngsebeched el dmak el telungalek el oldanges er a ngklel a Jehovah er a bek el sandei. (Hos. 14:2) Me a leuaisei, e bo el sebechir a rebek el chad er a telungalek el mo oldeu a rengrir er a omengull el telungalek er tir, e le a “deurreng el le beskemiu a RUBAK a mo melisiich er kemiu.”​—Neh. 8:9, 10.