A Rolel a Omomekerreu er a Rengelekem

Ngdiak a ta er kid el soal el omdasu a tekoi el kirel a mekngit el deleboes el omeruul el mo er a rengalek. A ruungalek a mo suebek a rengrir sel lomdasu el kirel. A chouaitia el mekngit el omeruul a kmal kdekudel e ngar er ngii er a beluulechad er chelechang, e a telemellel el mo er a rengalek a kmal klou. Me tia el tekoi ngar er ngii a ultutelel a bo dodengelii a omesodel? Ka di momdasu, ngua ngera klungel a ultutelel a ulekerreuil a ngelekem? A omsubii a telemellel tia el mekngit el omeruul e ngmo uchul a klungiaol, e le klemedengei er kau a kmal klou a lengesuir el mo omekerreu er a ngelekem.

Me alta tia el tekoi a rullau el mo suebek a rengum engdi ngdiak el kirem el mo medakt er ngii. Nglocha kmal meringel er kau engdi moutekangel. A klemedengei er kau a diak er a ngelekem, e kmal sebechem el osisecheklii me bo el sebechel el mo uchul a klungiolel el kemanget el taem. A cherengel a taem e ngmla mukeroul a klemedengei me a llomeserreng er kau. Ke dirrek el mla chobangel a betok el tekoi. Me ngklou a ultutelel a mousbech aika el duch el mo omekerreu er a ngelekem. Chelechang e kede mo mesaod a edei el tekoi el sebechir a ruungalek el meruul. Aikang a: (1) Bo mngike el kot el chad el ngelekem a mo er ngii el kirel a osebechakl er tia el mekngit el omeruul, (2) mosisecheklii a ngelekem er a tekoi el kirel el mo medengei, e a (3) mosisecheklii a ngelekem er a bebil el rolel a osebechakl.

Kau Ke Ngike el Kot el Rolel a Osebechakl?

A ruungalek a obang a kot el klou el ngerachel el kirel a ulekerreu er tia el mekngit el omeruul, el diak el rengalek. Me a leuaisei, e a ruungalek a kirir el kot el mosisechakl el kirel tia el omeruul er a uchei er a rengalek. A lsekum ke oungalek, e ngar er ngii a bebil el tekoi el kirem el mo medengei el kirel tia el mekngit el omeruul el mo er a rengalek. Ngkirem el mo medengei el kmo ngtechang a meruul er tia el omeruul me a rolel a loruul er ngii. A ruungalek a blechoel el omdasu el kmo a chad el meruul er tia el mekngit el tekoi a chad el tir a diak lodengelii e omart er ngii er a milkolk e osiik a rolel el omdechem e olterebek er a rengalek. A chouaitirka el kdekudel el chad a mera el ngar er ngii. A chais er a beluu a blechoel el ouchais el kirir a reuaisei el chad. Me nguaisei, engdi aika el chais a di dertang. Ngbekord el 90 el basent er a mekngit el deleboes el omeruul el mo er a rengalek a lurruul a mekngit el chad el ngalek a medengelii e oumerang er ngii.

Ngdi blekerdeled a rechad el diak el soad el mo oumerang el kmo a ungil a omerellel el tonari, sensei, chad er a ukeruul, oungerachel er a klekool, me a lechub e ngchedad a sebechel el mo nguibes a rengul er a ngeleked. Ngklemerang, a ruumesingd el chad a diak el uaisei. Me ngdiak a ultutelel el doltelechakl er a ngii di el chad el meliuekl er kid. Engdi ngsebechem el omekerreu er a ngelekem sel bo modengei a omerellel a chad el meruul er tia el mekngit el omeruul.​—Momes er a baks er a 6 el llel.

Sel obo modengei aike el tekoi el loruul tirka el mekngit el chad, e kau el oungalek a mo ungil el kltmokl el mo ngike el kot el chad el  mesebechakl er a ngelekem. El ua tiang, a lsekum ngngar er ngii a chad el kmal semeriar er a rengalek er a bai lesemeriar er a remeklou el chad, e eklii a ngelekem e omsa sengk me a lechub e ngkongei el omes er ngii sel obo mechesang el diak locheraol, me a lechub e ngsoal el oba ngelekem el mo milil er a ta er a basio el di tir el terung, e ke mo mekerang? Ke mo omdasu el kmo ngii el chad a ta er tirke el meruul a mekngit el omeruul el mo er a rengalek? Ngdiak. Lako mereched el mo omdasu el uaisei. A chouaitia el tekoi a diak a mekngit er ngii. Engdi ngulterekokl el rullau el mo kerekikl er a bek el tekoi. A Biblia a kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.”​—Osisechakl 14:15.

Molatk el kmo, a lsekum a omeruul a ua lsal kora ungil el tekoi, e kau a omes er ngii el kora ngodech, e ngkirem el mo kerekikl. Bo mkerekikl el merriter er a ngii di el chad el kongei el chemoit a taem el di ngii el tang el obengkel a ngelekem. Mouchais er ngii el chad me bo lodengei el kmo, ke lmuut el mei e omes er ngii me a ngelekem er a ngii di el taem. A Melissa me a Brad, el mekekerei el chad el oungalek er a retedei el buik a kmal kerekikl sel lomechei er a ta er a rengelekir el obengkel a ta er a klou el chad. A ta er a rengelekir a milsuub a chelitakl er a blai e a Melissa a millekoi er a sensei er a chelitakl el kmo: “Ak me tmuu e tuobed er tia el delmerab er chelecha el mngar er tiang.” Tiang a locha telkib el oberaod el tekoi, engdi tirka el obekel a bai diak el sorir el mo ouuchel a rengrir er a uriul.

Bo msemeriar er aike el tekoi el loruul a ngelekem, me a resechelil, me a subelel er a skuul. Bo modengei a rokui el omesodel a omilil el lolatk el mo er ngii. A ta el toktang er a uldasu el chiloit a 33 el rak er a ureor el kirel aike el mekngit el deleboes el omeruul el mo er a rengalek a miltebengii el kmo, ngkmal betok er aika el dilubech el tekoi a mle sebechel el mokebai el okiu sel bo lebiusech a mederir a rechedam me a rechedil. Ngmelekoi a tekingel a ta el mlekelebus el mirruul aika el mekngit el omeruul el kmo: “A ruungalek a kmal di milskemam a rengelekir. . . . Te kmal rirellii el mo beot er ngak.” Lak mobes, a ruumesingd el chad el meruul aika el tekoi a melilt er a rengalek el beot el bo lolemall er tir. Me a ruungalek el blechoel el teloi er aike el tekoi el loruul a rengelekir a sebechir el omekerreu er a rengelekir er tirka el mekngit el chad.

A ta er a rolel e ke mo ngike el kot el chad el mesebechakl er a ngelekem a sel bo mungil el orrenges er ngii. A rengalek a diak el blechoel el ouchais el kirel a chad el meruul a mekngit el omeruul el mo er tir e le te kmal merur e bekikl el kirel a uldesuir a rechad el kirir. Me bo mkerekikl el orrenges, el mo lmuut er aike el dertelkib el olengchelel tia el mekngit el omeruul. * A lsekum a ngelekem a dulii a tekoi el mo rrau a rengum er ngii, e mokekokau el ousbech a ker el  rullii me bo longedecheduch. * A lsekum e ngkmo ngdiak el soal a ta el chad a be longelim er ngii, e moker el kmo ngera uchul. E a lsekum e ngkmo a klou el chad a kora ngodech a klokolel e moker er ngii el kmo: “Ngua ngera klokolel? Ngmekerang a lousekool?” Me a lsekum ngmelekoi el kmo a chad a menglikl er ngii, e moker el kmo, “Ngmenglikl er a keskelel a bedengem?” Lak di mereched el oumededenger er a nger er a ngelekem. Tirke el melemall er a rengalek a melekoi er a ngalek el kmo ngdiak a chad el mo oumerang er ngii, e tia blechoel el klemerang el tekoi. Me a lsekum a ngalek a mla mo chelebangel er tia el mekngit el omeruul, e a demal me a delal sel loumerang e lolengeseu er ngii, e tiang a klou el uchul e ngsebechel mo ungil er a telemellel tia el tekoi.

Mosisecheklii a Ngelekem er a Tekoi el Kirel el Mo Medengei

A ta el babier el mesaod er tia el mekngit el omeruul el mo er a rengalek a melekoi a tekingel a ta el mlekelebus el chad el kmo: “Beskak a ngalek el diak a ngera el lodengei el kirel a tekoi er a durs, e ke mla meskak a ngalek el sebechek el mo tomellii.” Aika el kdekudel el tekoi a ungil el uleklatk el mo er a ruungalek. A rengalek el diak a klemedengei er tir el kirel a tekoi er a durs a mereched el mecheblad er a rechad el melemall er a rengalek. A Biblia a kmo a klemedengei me a llomeserreng a sebechel sobecheklau er a “re chad el omelekingir a omuchel a uldikel.” (Osisechakl 2:10-12) Ngulterekokl el soam a rengelekem a bo loba klemedengei el kirel tia el tekoi. Me a ongeru el rolel a bo mosebechakl er a ngelekem a okiu sel molisechakl er ngii el kirel a tekoi er a durs.

Engdi ngmekerang a omoruul er ngii? A rebetok el oungalek a kora merur el mesaod el kirel a tekoi er a durs el mo er a rengelekir. A ngelekem me nglocha dirrek el omes er tia el tekoi el kora omekrur me ngdiak bo lomuchel el mesaod er ngii el obengkem. Me kau a kirem el omuchel el mesaod er ngii. A Melissa a kmo: “Aki ulemuchel el omngakl a klekedellel a bedengir er sera dirk lemekekerei. Aki uluusbech a mera el tekoi, el diak el ike el tekoi el lousbech a rengalek, el olecholt el kmo ngdiak a oltobedechur me a lechub e ngomekrur el tekoi el kirel aike el klekedall er a bedengir.” A uriul er a omosaod er tiang, e ngmo beot er kemiu el mesaod el kirel a mekngit el  tekoi el meketmokl el mo er a rengalek. A rebetok el oungalek a ouchais er a rengelekir el kmo aike el klekedall er a bedenged el blart er a biled er a omengedub a ileakl el di klokled.

A Heather el dulsaod er ngii er sel mlo merek el suobel a kmo: “Ngak me a Scott a dilu er a ngelekam el sechal el kmo a kersel a di kloklel el diak el kora omotsia. Ngdiak el kirel a ngii di el chad el ousekool er ngii, el diak el Mommy, el diak el Papa, el diak el toktang. Me sel ki bo momes er a toktang, e a kuuchais er ngii el kmo a toktang a mo omes el kmo a rokui el tekoi a di ungilbesul ngdiak a uchul me ngsebechel el rutechii a kersem.” Me a ruungalek a kirir el mesaod aika el tekoi el mo er a ngelekir a lebebil er a taem, e dirrek el oterekeklii el mo er a ngelekir el kmo ngsebechel el ouchais er tir a lsekum a chad a merutech er ngii el ngar er a mekngit el rolel me a lechub e ngrullii el mo metacherbesul. Tirke el mesuub el kirel a ulekerreu el mo er a rengalek me a terebengel a mekngit el omeruul el mo er a rengalek a melisiich er a rokui el oungalek el mo mengedecheduch er a rengelekir el kirel aika el tekoi el dulsaod.

A rebetok a mla mesa el kmo a babier el Learn From the Great Teacher * a kmal sebechel ngosuterir el mesaod er tia el mekngit el omeruul. A 32 el bliongel el kmo “How Jesus Was Protected” a ngar er ngii a bleketakl e ungil klumech el mo er a rengalek el kirel a telemellel tia el mekngit el omeruul me a klungel a ultutelel a lomekerreu er tir. A Melissa a kmo: “Tia el babier a mla meskemam a kmal ungil el rolel e ngsebecham el melisiich aike el tekoi el ki bla mosisecheklterir a rengelekam.”

Chelecha el taem, e a rengalek a kirir el mo medengei el kmo ngar er ngii a rebebil el chad el sorir el merutech er tir me a lechub e ngsorir a rengalek a lorutech er tir el ngar er a mekngit el rolel. Aika el uleklatk a diak el kirel el omekdakt er a rengalek me a lechub e lerelleterir el mo diak loumerang er a rokui el meklou el chad. A Heather a kmo: “Tiang a di uleklatk el omekerreu er tir er a tellemall. E tia el uleklatk a di ta er aike el betok el uleklatk el oumesingd er ngii a diak losaod el kirel a mekngit el omeruul. Ngdirkak el rellii a ngelekek el mo medakt.”

A osisecheklel a ngelekem a dirrek el uldimukl er ngii a tabesul el osengel el kirel a blekongesenges. A omolisechakl er a ngalek el mo olengesenges a diak lebeot el tekoi engdi ngkmal klou a ultutelel. (Kolose 3:20) Engdi tia el tekoi a sebechel mo diak el tabesul. A lsekum a ngalek a mosisechakl el kmo ngkirel blechoel el olengesenges er a ngii di el klou el chad er a bek el taem, e ngbeot er ngii a mo chelebangel er tia el mekngit el omeruul. Tirke el melemall er a rengalek a di mereched el mtebengii a ngalek el kmal bekongesenges. A rungil el oungalek a olisechakl er a rengelekir el kmo ngar er ngii a taem el mo kirir el diak lekengei a rokui el tekoi. Tiang a diak lemeringel el kirir a Rekristiano. Ngdi ua dedu er a ngalek el kmo: “A lsekum a ngii di el chad a dmu er kau el mo rullii a tekoi el Jehovah el Dios a melekoi el kmo ngmekngit, e ngdiak el kirem el mo rullii. Ngmo lmuut er a Mommy me a Papa me ngdiak el kirir el melekoi er kau el mo rullii a tekoi el Jehovah a kmo ngmekngit. E sebechem el blechoel el ouchais er a Mommy me a lechub e ng Papa a lsekum a chad a melasem el meruul er kau el mo rullii a mekngit el tekoi.”

E a orekil, mouchais er a ngelekem el kmo ngdiak a chad el kirel melekoi er ngii me lomart a tekoi er kau. Msbedii el kmo a lsekum a ngii di el chad a olengit er ngii me lomart a tekoi er kau, e ngkirel el blechoel el louchais er kau. Me a ngii di el ngera el tekoi el medung el mo er ngii el omekdakt er ngii me a  lechub e ngii el ngalek a mla rullii a mekngit el tekoi, e ngdi ungil a louchais er a Mommy me a Papa el kirel. A chouaika el ulekrael a diak el kirel el omekdakt er a ngelekem. Ngsebechem el oterekeklii el mo er ngii el kmo a ruumesingd el chad a kmal diak bo loruul a chouaika el tekoi, el rutechii a klekedall er a bedengel el diak el kirir el rutechii, e olengit er ngii el mo diak lolengesenges er a Dios, me a lechub e te olengit er ngii el mo omart a tekoi. Me ngdi ua tekoi el mla meketmokl el kirel a chiis sel lebo er ngii a seseb, e aika el ulekrael el kirel a mekngit el omeruul a di uleklatk e locha diak bo lousbech.

Mosisecheklii a Ngelekem er a Bebil el Rolel a Osebechakl

A ongedei el rolel el bo dosaod er ngii a osisecheklii a ngelekem a bebil el beot el tekoi el sebechel el meruul a lsekum a chad a melasem el melemall er ngii sel di lengii el tang. A ta er aika el tekoi el leblechoel el lousbech er ngii a rechad a kora ua klekool. A ruungalek a oker er a ngalek el kmo “Ke mo mekerang . . . ?” e a ngalek a onger. Ngsebechem el kmo, “Ke mo mekerang a lsekum e kede ngar er a stoang e mo chacheroid? Ngmekerang a bo mosiik er ngak?” Me alta nger er a ngelekem a diak loltirakl er sel uldesuem, engdi ngsebechem el omekrael er ngii el lousbech a bebil el ker el ua tiang, “Ngsebechem el lotkii a tekoi el bo moruul er ngii el sebechel mesebechakl er kau?”

Ngsebechem el ousbech a osisiu el ker el oker er a ngalek el kmo ngerang a kot el ungil el tekoi el bo loruul er ngii a lsekum a chad a melasem el merutech er ngii el ngar er a mekngit el rolel. A lsekum a ngalek a kora chetil aika el ker, e ngsebechem el ouchais er ngii a cheldecheduch el kirel a kuk ta er a ngalek. El ua tiang: “A ngalek el redil a obengkel a kmal soal el chedal, e ngii el chad a melasem el merutech er a klekedellel a bedengel el diak el kirel el merutech er ngii. Omomdasu e ngera kirel ngika el ngalek el meruul er ngii el mo mesebechakl er ngii?”

Ngera kirem el osisecheklii a ngelekem el mo meruul er ngii er a chelsel a chouaisei el blekeradel el dulsaod er ngii er bab? A ta el chad el meluches a babier a kmo: “A bo lemesisiich a ngerem el kmo ‘Ngdiak!’ me a lechub ‘Lak muaisei!’ me a lechub ‘Bo mcheroid er ngak!’ a kmal sebechel el mekdektii ngika el mekngit el chad el mo cheroid e rullii el mo omdasu er a kuk ngodech el chad el bo lolemall er ngii.” Mngesuir a ngelekem el okiu a omoruul a mekedeb el olechotel a blekeradel el sebechel duubech me bo el sebechel mesisiich e klou a ngerel el onger, e mereched el chemiis, e ouchais er kau aike el tekoi el dilubech. A ngalek el kora mereched el mo medengei aika el osisechakl a sebechel el obes er ngii er a chelsel a sesei el sandei me a lechub e ngbuil. Me ngkirem el blechoel el omelekl aika el osisechakl.

Tirke el rokui el omekerreu er ngika el ngalek, el uldimukl er a resechal, el ua demal, chad el bechil a delal, me a kuk bebil el sechal el chedal, a kirir el mo teloi er aika el cheldecheduch. E ngera uchul? E le tirke el rokui el uldimukl er tia el osisechakl a ua letibir el mo er a ngalek el kmo ngkmal diak bo loruul a chouaika el mekngit el omeruul. Ngklengiterreng, e le betok er aika el mekngit el deleboes el omeruul a duubech er a chelsel a telungalek. A ongingil el suobel a mo mesaod er a rolel e ngsebechem el rullii a delengcheklem el mo basio er a ulekerreu er a chelsel tia el mekngit el beluulechad.

[Aike el Footnote]

[Siasing el ngar er a 5 el llel]

Bo mkot el rolel a osebechakl el kirel a ngelekem

[Siasing el ngar er a 7 el llel]

Mosisecheklii a ngelekem er a tekoi el kirel el mo medengei

[Siasing el ngar er a 8 el llel]

Mosisecheklii a ngelekem er a bebil el rolel a osebechakl

[Baks el ngar er a 4 el llel]

Mekngit El Deleboes El Omeruul ​—A Mondai Er A Beluulechad El Rokir

Sera 2006 e a melechesel a United Nations a ultebedii a chais el mo er a UN General Assembly el kirel a mekngit el omeruul el meketmokl el mo er a rengalek el meliuekl er a beluulechad el rokir, el lekiltmeklii a mellomes a rengul el chad el oureor el mo er a UN. A doltirakl er tia el chais, e ngar er a chelsel aika el mereko el rak, e a bekord el 150 el miliol el ngalek el redil me a 73 el miliol el ngalek el sechal, el ngariou er a 18 a rekrir a mla chobengelii a “oketmeklel a durs el okiu a orimel me a lechub e ngkuk ta er a bedengel a mekngit el deleboes el omeruul.” Aika el ochur a kmal mechas a rengud er ngii engdi tia el chais a kmo “aika el ochur a lmuut el mekesai er sel mera el ochur.” A ungil el omesubel a 21 el beluu a ochotii el kmo ngar er a bebil el beluu e a betok er a 36 el basent er a redil me a 29 el basent er a resechal a mla chobengelii a ta er a bedengel a mekngit el rolel a deleboes el omeruul er sera lengalek. A klou el ildois er a rechad el mirruul aika el mekngit el omeruul a kmal chederir tirka el ngalek.

[Baks el ngar er a 6 el llel]

Rolel A Omengesuseu

A mekngit el chad a kmal mellomes a rengul me ngdiak lorrimel er tirke el bo lolemall er tir. Ngbai soal mekekokil el mengesuseu er a rengalek. Ngomuchel el lokiu a lolilt er a ngalek, el ngike el mereched el oumerang er a rechad me ngbeot er ngii a choderderii. E a uriul e ngolecholt el kmo ngkmal semeriar er ngika el ngalek. Nglocha dirrek el mo melasem el rullii a demal me a delal ngika el ngalek el mo oumerang er ngii. Tirka el melemall er a rengalek a kmal meduch el meruul er tir el leko te semeriar er a ngalek me a telungalek er ngii.

Cherengel a taem, e ngika el chad a mo omuchel el mengetmokl er ngika el ngalek el kirel a deleboes el omeruul. Ngmekekokil el ousekool el ua longelikl me a lechub e ngmengaibedechakl er ngii. Nglocha mo omsang a betok el bresent e meleakl er ngii er a resechelil, me a rebebil er ngii, me a demal me a delal, me bo el sebechir el di tir el terung el dmak. Ngmo er ngii a taem e ngolengit er ngika el ngalek me lak louchais a berrotel el tekoi el mo er a demal me a delal, el ua bresent me a lechub e ngtelbilir el kirel a bo loruul er ngii el tekoi. A chouaika el tekoi a kutmeklii a rolel a omengesuseu. Me a ngalek me a demal me a delal sel bla bo loumerang er ngika el chad, e ngii a mocha sebechel el rullii a deleboes el omeruul.

Nglocha dirrek el mo mekekokil el meruul er tiang er a bai lorrimel er a ngalek. Ngsebechel el lousbech er sel blekerdelel a ngalek el soal mo medengei a tekoi el kirel a durs, me ngmeruul er ngii el leko “ngsensei” me a lechub e ngsebechel el melekoi el kmo te ousekool a “ileakl el klekool” el di tir el terung a medengelii. Nglocha dirrek el mo olecholt a siasing er a remeau el mo er ngika el ngalek el rullii tia el tekoi el ua lungil.

Me a lsekum e ngmla tomellii a ngalek, e ngmocha osiik a rolel el rullii ngika el ngalek me lak louchais er tia el tekoi el mo er a ngii di el chad. Ngsebechel el omekdakt er ngii, me a lechub e ngouchais a mekngit el omerellel ngika el ngalek el mo er a ta er a chad, me a lechub e ngoltelechakl er ngii. El ua tiang, ngsebechel el melekoi el kmo: “Ngkau a uchul e le ngdimlak mdu er ngak me lak kurruul er ngii.” E sebechel el melekoi el kmo: “A lsekum e ke ouchais er a demam me a delam, e te omekedong er a rebulis me ak mo er a kelebus el mo cherechar.” Me a lechub e ngkmo: “Tia di berteled el terung. A lsekum e ke ouchais, e ngdiak a mo oumerang er kau. A lsekum a demam me a delam a mo medengei e ak mo tomelleterir.” A reuaisei el chad a mo melasem a bek el bedengel a cheleblad me a mekngit el omeruul el oltaut a ngelbesel a rengrir.

[Siasing el ngar er a 5 el llel]

Bo mteloi er aike el tekoi el loruul a ngelekem

[Siasing el ngar er a 7 el llel]

Lak momai er a rengum el olisechakl er a ngelekem el kirel a tekoi er a durs

[Siasing el ngar er a 8 el llel]

Mosisecheklii a ngelekem el mo mesisiich e ultebechel a uldesuel a lsekum e ngmo chelebangel er a mekngit el chad