A Biblia a kmo: “Sel lorreder a dengerenger e ng olengerool a rengrir a re chad.”​—Osisechakl 29:2.

A reksi a mui er a remechebirukel el merredel el omerredelir a mlo uchul a diak lobasech el ringel el mo er a rechad. Nguaisei, engdi tiang a diak el mera el tekoi el kirir a rokui el merreder. A rebebil a mla er ngii a kmal ungil moktek er tir. Me nguaisei, engdi sel lenguu a dereder, e te blechoel el metik el kmo a urerir a diak lemeketmokl e le ngklautok er a delongelir me a klaiueribech er a omengedereder a uchul. Me a lechub e te mekngit el ousbech er a klisichir el di kirel a klungiolir e mo uchul a ringel el mo er a rechad. A Henry Kissinger el mle U.S. Secretary of State a melekoi el kmo: “A reksi a cheldecheduch el kirel a omelasem el dimlak lemeketmokl, me a urungulir a rechad el dimlak lemutaut.”

A Biblia a melekoi el kmo: “E diak a chad el sebechel el chodereder a blekeklel.” (Jeremia 10:23) A rediak el mecherrungel chad a diak a llomeserreng me a klemedengei er tir el mo sumechokl a rokui el urerir el mo er a klungiolel. A lsekum a rechad a diak el sebechir el di tir el omekrael a blekeklir, e te mekerang e omekrael a blekeklel a chimo el beluu? Me kau ngsebechem el mesa uchul me a remengedereder a diak a duch er tir el torob a ringel? Nguaisei a mekngit el kabelment me a lechub e ngomengedereder a blechoel el uchul a ringel!

A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.”​—Johanes 13:35.

A remengeteklel a kakerous el klechelid a olisechakl el kirel a bltikerreng me a kltarreng. Engdi a klemerang a kmo ngdimlak el sebechir el mo dolemii er a chelsir a rechederir a bltikerreng el mesisiich el sebechel torebengii a omengetukel. A klechelid a diak lolengeseu el omekeroul er a bltikerreng, e ngbai blechoel el ta er a uchul a klekakeakl, omengetukel, me a klautok er a delongelir a rechad. Ngar er a orokiolel a babilengel el Christianity and the World Religions, e a chad el mesuub a klechelid el Hans Küng a milluches el kmo: “Aike el kot el mekngit el klaiueribech er a tekoi er a balatiks a lullisiich e lulengedaol e lulemeklemalt a klechelid.”

 A remengeteklel a betok el klechelid a di bleketakl el kongei a deleboes er a uchei er a chebechiil me a ikrel a chebechiil me a remengolchotaor. Tiang a mlo uchul me a rakt a oberk, omelecheb er a rengalek, diak er a reng el kldiull, me a tellemall er a chebechiil me a telungalek, el mlo uchul a diak lobasech el ringel er a bedenged me a uldesued.

“Ngdi chad a di ngii el mor ongarm sel le mekesuseu e lobedikl er a ikel mekngit el soal a rengul. E a ikel mekngit el soal a rengul a be le dubech e ng mo mechellii a klengit.”​—Jakobus 1:14, 15.

Kid el rokui a diak demecherrungel a uchul me kede blechoel el mo meruul a cheleuid me ngkired el oldechelakl el omtok er a ngibes el mo ‘meruul a ikel rokui el mlo soal a bedenged el meruul.’ (Efesus 2:3) Ngkmal meringel a doltngakl a ngelbesel a tech sel sekum e ngmo er ngii a techelled el oltaut er ngii. A lsekum e kede mo mechitechut er tia el ngelbesel a tech, e ngmo uchul a klou el tellemall.

A chad er a omeluches el P. D. Mehta a milluches el kmo: “Ngbetok el ringel a mo er ngii el okiu a ngelbesed, diak el ultebechel el sked el kirel a tametereng, me aike el doureng el tekoi.” Aike el doureng me aike el bla bo desau er ngii el kakerous el omeruul el ua usbechel a rrom, mekngit el kar, bakutsi, deleboes, me a lmuut el bebil a mla tomelleterir a rebetok el “kuoll el chad er a beluu” e mlo uchul a ringel el mo er a telungalek er tir, resechelirir me a rebebil. A klechad el diak lecherrungel a uchul me ngkired el kongei er a lolekoi er ngii a Biblia el kmo: “Ele kede medengei el kmo a rokir el bleob a ongingd er a ringel el me lmuut er chelechang, el di ua ia le ngar a ringel er a cheroll.”​—Rom 8:22.

A Biblia a ochotii el kmo a Satan a “mekngit el chelid er tial beluulchad” e ngii a obengterir a remesisiich el mekngit el anghel el domekedong er tir el mekngit el chelid.​—2 Korinth 4:4; Ocholt 12:9.

A remekngit el anghel a di ua Satan el oureor el omtebechel e mengeuid er a rechad. A apostol el Paulus a kilengei er tiang er a losaod el kirir a remekngit el anghel el kmo: “Kid a diak doumekemad el omtok er a re di chad; kede bai omtok a ikel mekngit el chelid el ngar a melidiul, ma ikel mengetikaik, ma mengedereder, ma rokui el klisiich er a chelsel tial mekngit eltel el beluulchad er tial milkolk el taem.”​—Efesus 6:12.

A remekngit el anghel a sorir el orrouk er a rechad engdi tiang a diak el kot el moktek er tir. Te oureng el omult er a rechad el mo cheroid er a Kot el Ngarbab el Dios el Jehovah. (Psalm 83:18) A omeruul el uai a omes a btuch, olai, omengelil, me a omes a tekoi er a ngar er a medad a di bebil er a tekoi el lousbech el mengeblad e omtebechel er a rechad. Sei a uchul me a Jehovah a omeklatk er kid el kirel aika el kdekudel el omeruul e omesterir a ulekerreu el mo er tirke el rokui el omtok er a Satan me a remekngit el anghel.​—Jakobus 4:7.

A bekord el eru el telael el rak er a mla me mong, e a Biblia a ulemlaoch el kmo: “Di bo modengelii tia el kmo, a ikel uriul sils ra belulechad a morngii er ngii a blsechel a ringel.”

A Biblia sel losaod el kirel aike el tekoi el rullii tia el taem el mo meringel, e ngmelemolem el kmo: “Isei e ar chad a mo betik a rengrir ra di tir, e nguibes a udoud, e chemat ra di tir, e kididai a rengrir, . . . e diak le chubechub, e diak le mesumech a rengrir, e melaes, e diak le delodau, e teleberechel, e chetirir a ungil, e keikr, e di olab a rengrir, e blkuuk, e betik a rengrir ra tametereng el kuk ngaruchei ra le betik a rengrir ra Dios.” Me sel uchul a rokui el ringel el domes er chelechang a kid el kiei er a “uriul sils.”​—2 Timothy 3:1-4, BT.

Me a domes aike el tekoi el bla desaod, e ngkmal bleketakl a uchul me a rechad a diak el sebechir el torob a ringel, alta e ngar er ngii a ungil el moktek er tir. A leuaisei, e kede mo er ker el kirel a ngeso? Ngkired el omes el bedul a Ulemeob er kid, el ngii a tilbir el mo “melemall a urerel a Diabelong” me tirke el oltirakl er ngii. (1 Johanes 3:8) Sel ongingil el suobel a mo mesaod el kirel aike el bo loruul a Dios el mo torob a rokui el uchul a ringel.