A Estelle * a mle blechoel el mo er a ikelesia ngii me a rengelekel. Ngdilu el kmo: “Ak dilu er a minister er ngak el kmo ngsoak el mesuub el kirel a Biblia.” Engdi ngika el chad a dimlak bo lolisechakl er ngii. Misei e ngmlo diak lebo er a ikelesia. Ngliluut el melekoi el kmo: “A remengeteklel a klechelid a milluches el mei er ngak el kmo, a lak bo er a ikelesia e ngsebechek el di odurokl a udoud el mo er tir. Me ak ulemdasu el kmo, ‘Tirka diak lomekerreu ak bong me a lak, ngdi sorir a ududek.’”

A Angelina, el ngii a kmal oumerang er a Dios, a melekoi el kmo: “Ngar er a ikelesia er ngak, e te orrael er a blil a tenget el edei el taem er a bek el temel a omengull, e mle kiram el blechoel el omelechang a ududam. Te mle blechoel el olengit a udoud. Me ngdi mle ngak el omdasu el kmo, ‘A Dios a diak lobengterir tirka el chad.’”

Aike el klechelid el ngar er a basio el omkiei er ngii, ngousbech a kakerous el rolel el orrimel er a rechad el mo omesterir a udoud? Tiang ngoltirakl er a Biblia?

A Jesus el ngii a uchelel a Klekristiano a dilu el kmo: “Ng dimlak momechar a ikel ilekor kemiu, me lak bo locheraol a cho momesterir a re chad.” (Mateus 10:8) A klumech el ngar er a Biblia a kmal diak lemuchar e kirel el meketmokl el mo er tirke el rokui el sorir.

Te milekerang a Rekristiano er a irechar e mengetmokl el kirel aike el ocheraol el mo er a ongdibel?

A derta el chad a millenget el “oltirakl er a telbilel a rengul, e lak lomai er a rengul el ua ia le mlorimel; ele Dios a soal ngikel ungil a rengul e olengeseu.” (2 Korinth 9:7) A apostol el Paulus a dilu el kmo: “Aki uluureor er a llomes ma klebesei me lak bo kimongesang er kemiu er a kirel a siungam.” (1 Thesalonika 2:9) A Paulus a uluureor el meruul a tento me bo el sebechel el omerk er a klumech.​—Rellir 18:2, 3.

A Resioning er a Jehovah a blechoel el mo dmak el ngar er a basio el lomekedong er ngii el kmo Blil a Ongdibel. Ngmekerang e meketmokl aike el lousbech a ongdibel? Te kmal diak lorrael a belatong el kirel a udoud, me a ka loldurokl a babier el olengit a udoud. Engdi tirke el oba omereng el saul el kirel aike el bla lerenges, a sebechir el di tir el mo locha tengetengir er a blil a tenget el ngar er a Blil a Ongdibel.

Tia el babier a ousbech a udoud me bo el sebechel el meketmokl e lemodurokl. Engdi ngkmal diak bo mesa ta el ongit el ngar er a babier el kirel a udoud. A moktek er tia el babier a mo ouchais a klemerang er a Biblia.

Ngera uldesuem: A rolel a loruul aika el tekoi, ngoltirakl a tekingel a Jesus me a kerebai el lullecholt a Rekristiano er a irechar?