Mosiik er a Ungil el Rolel a Klengar
Mosiik er a Ungil el Rolel a Klengar
“Isei e ng di mo ungilbesul a ikel rokui el moruul.”—JOSUA 1:8.
NGMEKERANG A OMONGER?
Ngmle ua ngerang a klengar er a Salomon?
Ngokiu a ngera el rolel e ngmle ungil a klengar er a Paulus?
Ngmekerang e mo ungil a klengar er kau?
1, 2. (a) Ngua ngera osengir a rebetok el kirel a ungil el klengar? (b) E kuk ua ngerang a osengem el kirel tia el tekoi?
NGERA belkul a ungil el klengar? Ngkakerous a uldesuir a rechad el kirel tia el ker. A oumesingd er tir a omdasu el kmo a ungil el rolel a klengar a sel bo el betok a ududed, e detobed er a ngarbab el skuul me a lechub e lebo er ngii a ileakl el duch er kid. E a rebebil a kuk omes er ngii el kmo ngsel ungil a deleuill er tir me a rechad er a blirir, sechelirir me a rechad er a urerir. Me a chad el mesiou er a Dios a sebechel el mo omes a techall er a ngerachel er a chelsel a ongdibel me a lechub a ungil el tekoi el duubech er a omesiungel el ua lechetengakl el mo er ngii.
2 Ngsebechem el lmuches a ngklir a rebebil er a rechad el momdasu el kmo ngungilbesul a klengar er tir me bo modengelii a osengem el kirel a ungil el rolel a klengar. Ngera el blekeradel a losisiu er ngii? Te merau e merael a chisir me a lechub e te chetengakl? A nger er kau a ochotii a mera el uldesuem el ngii a sebechel el mengesuseu er kau el mo meruul me a lechub e ke melib a turrekong er kau.—Lukas 6:45.
3. (a) Ngmilekerang a Josua e mo ungil a klengar er ngii? (b) Ngera kede mo mesaod?
3 A klou a ultutelel el tekoi a sel osengel a Jehovah el bedulkid e le klengar er kid a ultuil er a kengei er ngii. Sera ltetkii a Josua el mo mengeteklir a rechad er a Israel el mo soiseb er a Beluu er a Nglat, e ngdilu er ngii me longuiu e lolengesenges a Llach er a Moses er a “llomes ma klebesei.” Ngdirrek el dilu er ngii el kmo: “Isei e ng di mo ungilbesul a ikel rokui el moruul.” (Josua 1:7, 8) Me kid a medengei el kmo a Josua a mle ungil a klengar er ngii. E kid a mekerang? Kede mekerang e mo oba osengel a Dios el kirel a ungil el klengar? Me bo dosaod er a rolel a klengar er a reteru el chad el ngar er a Biblia.
NGMLE UNGIL A KLENGAR ER A SALOMON?
4. Ngera uchul me ngsebeched el melekoi el kmo a Salomon a mle ungil a klengar er ngii?
4 A Salomon a kmal mle ungil a klengar er ngii. E ngera uchul? E le ngmle kemanget el taem el uleba dakt me a omeluu el mo er a Jehovah el ngii a ulemekngeltengat er ngii. Ka molatk er sel taem el ngii el Salomon a ullengit er a llomeserreng er a Jehovah el mo omekrael er a rechad. Misei e a Dios a ulemekngeltengat er ngii el milsang a llomeserreng me a ilteet. (Monguiu er a 1 King 3:10-14.) A llemesel a rengul “a ulechit a llemesir a rokui el chad er ongos ma rokui el llomeserreng er a Ekipten.” Me a chisel a “uleberk er a bek el beluu el meliuekl er ngii.” (1 King 4:30, 31) Ngkmal mlo merau e le kolt el lulsiseb er a bek el rak a mle kuk betok er a 25 el tol! (2 Kronika 9:13) Ngmle meduch el chad er a desachel, okedecherul a blai, me a tekoi er a siobai e dirrek el mle meduch el mengedecheduch el omudech a beluu. A Salomon a mle ungil a klengar er ngii e le omerellel a mle melemalt er a osengel a Dios.—2 Kronika 9:22-24.
5. Ngera ngdilung a Salomon el kirir a rechad el oba kengei er a Dios?
5 A tekoi el lulluches a Salomon er a babier er a Olisechakl a ochotii el kmo a deurreng me a ungil el tekoi a diak el di lebo er a remerau me a rengarbab el chad. Ngdilu el kmo: “Misei e ak mo medengei el kmo a di tal sebechel a chad el rullii a sel bo lungil a rengul e loruul er sel tkurrebab el sebechel rullii sel dirk le chad. Kede rokui el kired el mengang e melim, e oldeu a rengud er a ikel bla doureor el kirel. Ng sengk er a Dios.” (Olisechakl 3:12, 13) Ngmle medengei el kmo a chouaika el ungil el tekoi a mo er a chad el oba kengei er a Dios, me ngdilu el kmo: “Ng mla medung a rokui el tekoi ma ulebongel el tekoi a kmo: Moluu er a Dios e moltaut a llechul; tiaikid ia ngerechelel a chad.”—Olisechakl 12:13.
6. Ngera el tekoi a ledillii a Salomon el kirel a ungil el klengar?
6 A Salomon a uleba omeluu el mo er a Dios el kemanget el taem. Kede suubii el kmo ng “mle betik a rengul er a RUBAK, e uleltirakl osisecheklel a demal David.” (1 King 3:3) Tiaikid a ungil el rolel a klengar. Me ngulekiu a ulekrael er a Dios, e ngmlo sebechel el toketekii a kmal klebokel el templo er a mera el omengull e lmuches a edei el babier er a Biblia. Me alta e ngdiak doruul a chouaika el tekoi, engdi a blakerreng er a Salomon el mo er a Dios a osisecheklid el mo meduch el merriter a tekoi e ngiltii a ungil rolel a klengar. Me ngokiu a ulekrael er a Dios, e a Salomon a milluches el kmo a osengir a rechad el kirel a ilteet, llomeserreng, chetengakl me a klisiich a diak a ultutelel el di “ua doltoir er a eolt.” A rebetok el chad el sorir el mo meteet a di blechoel el suebek a rengrir er aike el ngar er ngii er tir, e aike el iltetir a ulterekokl el mo iltetel a ta er a chad er a ta er a klebesei.—Monguiu er a Olisechakl 2:8-11, 17; 5:10-12.
7, 8. Ngmilekerang a Salomon e oridii a blakerreng er ngii, e ngera dilubech?
7 Kede dirrek el medengei el kmo a Salomon a urridii a blakerreng er ngii. A Tekingel a Dios a kmo: “Ser a le chudelang, e a re bechil a mla meltii a rengul el mo oltirakl a ngodech el chelid. Ng mlo diak le blak a rengul er a RUBAK el Dios er ngii. Ng dimlak le ua demal el David el mle blak a rengul. . . . A Salomon a mlor a klengit el omtok er a RUBAK.”—1 King 11:4-6.
8 A Jehovah a mlo kesib a rengul me ngdilu er a Salomon el kmo: “Chelechang el ble le ua isei a uldesuem, el dimlak moltaut a telbilek ma llechuk el kchildereder er kau, e ng diak kukor el mo choridii a rengedel a king er kau, e nguu el msa tar a re mesiungem.” (1 King 11:11) Ngkmal chelebuul el tekoi! Alta e ngmle ungil a klengar er a Salomon engdi uriul e nguridii a blakerreng er ngii e dirrek el tilemellii a rengul a Jehovah. Me ngsebeched el di kid el oker el kmo, ‘Ngak ak kerekikl a omerellek me ngdiak bo kurruul a tekoi el uai a Salomon?’
A UNGIL EL ROLEL A KLENGAR
9. Ngua ngerang a osengel a klechad el kirel a klengar er a Paulus? Mosaod.
9 A klengar er a Paulus a kmal mle ngodech er a klengar er a King el Salomon e le ngdimlak el lolab a deruchall er a kleking me a lechub e lulemengur el teloi er a reking. Ngbai mla er ngii a taem el blo lesengerenger, e meched a rengul, e mekerasem, e di meau. (2 Korinth 11:24-27) Me sera lekengei el kmo a Jesus a Messias, e ngdi chiloit a rokui el tekoi el kirel a klechelid er a Rechijudea me a remengeteklel ngii el klechelid a mlo ouketui er ngii. Ngmlekelebus, e mlodechelakl, e mlechelebed, e dirrek el ulebetech er a bad. Nguluuchais el kmo ngii me a rekldemel el Kristiano a mluketui e mlukcharm e mlotuub. “Aki di cheitel kung er a rengrir a re chad er tial beluulchad, e di mengelengalek er a rengrir el rokui el me lmuut er chelechang.”—1 Korinth 4:11-13.
10. Ngera uchul me a rechad a ulemes er a Paulus el ua luleltngakl a tekoi er tia el beluulechad?
10 Me sel rolel a klengar er a Saulus a milsang a klou el techellel el meruul a betok el tekoi. Ngmlukeroul el ngelekir a rechetengakl el chad, e milsuub el obengkel a Gamaliel, el mle ungil el sensei, e a uriul e ngmelluches el kmo: “Ngak a mlar uchei er a ruumesingd el chad er a Judea el kim klebekoll.” (Galatia 1:14) Ngmle meduch el melekoi a tekoi er a Hebru me a Grik e dirrek el mle chad er a Rom el uchul me ngmla er ngii a techellel me a llemeltel el meruul a tekoi. Oleko ngmillemolem el meruul a tekoi er tia el beluulechad, e ngmla er ngii a techellel el mo chetengakl e merau el chad. Me nguaisei, engdi ngii a ngileltii a rolel a klengar el lulemes er ngii a redi chad me a rechedal el ua lak a ultutelel. E ngera uchul?
11. Ngera el tekoi a mle mekreos er a rengul a Paulus, e ngera uchul?
11 A Paulus a mle betik a rengul er a Jehovah e mle soal nguu a kengei er Ngii el kuk ngaruchei er a ilteet me a chetengakl er a klechad. Sera lokurulii a klemedengei er ngii er a klemerang, e ngmlo mengreos er a olubet el tenget me a techellel er a omesiungel me a omelatk el mo kiei er a eanged, e aikang a tekoi el diak a ultutelel er a osengir a rechad. Nglocha mle medengei el kmo ngmla er ngii a chetituokel el tekoi el mle kirel el mesmechokl. A Satan a millekoi el kmo ngsebechel el rulleterir a rechad el mo diak losiou er a Dios. (Job 1:9-11; 2:3-5) Me a Paulus a tilbir el mo blak a rengul el mo er a Dios e melemolem el ngar er a mera el omengull er a chelsel a ngii di el blekeradel. E tiang a omeruul el omes er ngii a rechad el ua lak a ultutelel.
12. Ngera uchul me ke millilt el mo ultuil a omeltkem er a Dios?
12 Kau ke ua uldesuel a Paulus? Ngmeringel er kid el mo cherrungel a blakerreng er kid el mo er a Jehovah engdi kede medengei el kmo ngmo omekngeltengat er kid, e meskid a kengei er ngii. E tiaikid a mera el rolel a ungil el klengar. (Osisechakl 10:22) Ngmo uchul a klungioled er chelechang me a klengeltengat er a ngar medad el klebesei. (Monguiu er a Markus 10:29, 30.) Tiaikid a uchul me ngkired el ultuil “er a Dios el bekerurau el omeskid a rokui el tekoi el kired el oldeu a rengud er ngii.” Me dolisiich er a klaumerang er kid el kirel a ngar medad el klebesei me bo el sebeched el nguu a mera el klengar. (1 Timothy 6:17-19) Me ngulterekokl a rengud el kmo a uriul er a betok el rak e ngsebeched el omes el beduluriul e dmu el kmo, “Ak ngileltii a mera el ungil el klengar!”
BASIO EL LENGAR ER NGII A MEKREOS EL KLOKLEM
13. Ngera el ulekrael a ledillii a Jesus?
13 A Jesus a milsaod el kirel a mekreos el klalo el kmo: “Lak mongudel a mekreos el klalo el kiriu er tial beluulchad el le ngar ngii e ng mo chemert e meka er a metmut ma re merechorech a mo soiseb el ruchorech. Bai mongudel er a eanged el sel le ngar ngii e ng diak le meka er a metmut ma diak le chert, el ka remerechorech el mo soiseb el ruchorech. A rengum a di mo blechoel el ngar sel le ngar ngii a mekreos el kloklem.”—Mateus 6:19-21.
14. Ngera me ngdiak a ultutelel a dongudel a mekreos el klalo er tia el beluulechad?
14 Ngdiak di el udoud a mekreos el kloklel a chad. Ngsebechel el uldimukl er aike el tekoi el ledilung a Salomon el kmo ngmekreos er a osengir a rechad el ngii a chetengakl, merael a chisel me a lechub e ngklisiich. A Jesus a dillii a osisiu el tekoi el ledillii a Salomon el ngar er a Olisechakl el kmo, a kerruul er tia el beluulechad a di tedeb. El ua tekoi el domes el meliuekl er kid, a mekreos el klalo a di mereched el mo nguemed me a lechub e ngremiid. A Brobesong el F. Dale Bruner a mesaod a chouaika el mekreos el klalo el kmo: “A chetengakl a di mereched el mo diak. Ngike el merael a chisel er chelii a bo dobes er ngii er chelecha el mei el rak. Me a ungil el rolel a udoud er chelechang a mo uchul a chelebuul er sel mei el rak. . . . [A Jesus] a betik a rengul er a rechad. Me ngmengelechel er tir me lak lultuil a omeltkir er a chetengakl el di mereched el mo nguemed. Ngmle soal a redisaiplo [er ngii] a lolemolem el dmeu a rengrir. ‘Me ngdi mengedengodech a tekoi er tia el beluulechad er a bek el sils.’ ” Me alta e a rebetok a kongei el kmo aika el tekoi a klemerang, engdi te tela er tir a osiik er a mera el ungil el klengar? Kau ke ta er tir?
15. Ngkired el osiik er a ua ngera el rolel a klengar?
15 A rebebil el mengeteklel a klechelid a olisechakl el kmo ngdiak lungil a demechesang el di osiik a kerruul, me tirke el uaisei a kirir el mo melodech a uldesuir. Engdi a Jesus a mle ngodech a uldesuel e le ngbai millisiich er a redisaiplo er ngii el mo blak a rengrir el mengudel a mekreos el klalo “er a eanged.” Me ngsoad el mo blak a rengud el oltirakl er a osengel a Jehovah el kirel a ungil el klengar. Me a tekingel a Jesus a omekrael er kid el mo ungil el melilt a tekoi el doruul, el ngii el tekoi a mera el meklou a ultutelel er a uldesued me a rengud.
16. Ngsebechel el mo ulterekokl a rengud er a ngerang?
16 Kede oumerang el kmo a Jehovah a mo meskid aike el dousbech a lsekum e ngmera el soad el oldeu er a rengul. Ngsebechel el mechikid me kede chuarm el ua apostol el Paulus el mle songerenger e meched a rengul el telkib el taem. (1 Korinth 4:11) Me nguaisei, engdi ngulterekokl a rengud el kirel a tekingel a Jesus el kmo: “Isei e lak el sebek a rengmiu er a kmo, ‘Aki mo ngmai er ker a kelam, ma imelam, ma bilam?’ (Tirkel meluluuch a diak le meral chelid a di blechoel el blak a rengrir el osiik a ikang.) A Demmiu el ngar a eanged a medengei el kmo a ikang cho mousbech. Ma ngar uchei er a bek el tekoi, e bai bo le blak a rengmiu er a Rengedel a Dios ma ikel soal, e a ikal rokui a bo lebeskemiu.”—Mateus 6:31-33.
A ROLEL A KLENGAR EL LEKENGEI ER NGII A DIOS
17, 18. (a) A ungil el rolel a klengar ngultuil er a ngerang? (b) E diak lultuil er a ngerang?
17 A klou a ultutelel el tekoi a kmo: A ungil el rolel a klengar a diak lultuil er a kerruul me a deruchall er tia el beluulechad. Ngdirrek el diak lultuil er a ileakl el ngerachel er a chelsel a ongdibel er a Rekristiano. A chouaitia el klengeltengat a kirel el uldimukl er a blekongesenges me a blakerreng er kid el mo er a Dios el ngii a dmu el kmo: “A re chad el oungerachel a tekoi a kirir el sebeched el ultuil er tir er a ngerchelir.” (1 Korinth 4:2) Me ngkired el melemolem el blak a rengud, el ua ledilu Jesus el kmo: “E ngdi ngikel outekangel el mor a ulebongel a mo suobel.” (Mateus 10:22) Ke locha dirrek el kongei el kmo a osobeled a ultuil er a rolel a klengar el lekengei er ngii a Dios.
18 Sel domtab aika el tekoi el mla medung er a uchei, e kede mo medengei el kmo a blakerreng el mo er a Dios a diak lultuil er a chetengakl, skuul, deruchall er a ureor, me a deruchelled er a buai me a lechub e ngllomeserreng, duch, me a kldachelbil a chad. Me ngar er a chelsel a ngii di el blekeradel, e ngsebeched el ochotii el kmo ngblak a rengud el mo er a Dios. Te mla er ngii a remerau me a remechebuul er a delongelir a rechedal a Dios er a irechar. E a Paulus a milengelechel er a remerau el kmo “mdu er tir me bo loruul a ungil, el mo omdois a ungil el ureor, e bo le bekerurau, e bo le kldmokl el merous el mor a re bebil er a re chad.” Misei e a remerau me a remechebuul a dul sebechir el “mo nguu a meral klengar.” (1 Timothy 6:17-19) E tiang a klemerang el tekoi, e le kede rokui el oba osisiu el techall me a osisiu el ngerachel el kired el melemolem el blak a rengud el “mo omdois a ungil el ureor.” Sel doruul el uaisei, e kede mo metik er a ungil el rolel a klengar e dirrek el dmeu a rengud el medengei el kmo kede oldeu er a rengul ngike el Ulemeob er kid.—Osisechakl 27:11.
19. Ke mla tibir el mo mekerang er a klengar er kau?
19 Ngulterekokl el diak el sebechem el omtebechel a rokui el tekoi, engdi ngsebechem el sikii a rolel e ke sumechokl a tekoi. Me ngklou a ultutelel el bo leblak a rengum er a chelsel a ngii di el blekeradel. Bo lulterekokl a rengum el kmo a Jehovah a mo omekngeltengat er kau er chelechang el mo cherechar. Lak mobes a tekingel a Jesus el mo er a rengellitel el Kristiano el kmo: “Bo le blak a rengmiu el mo lmuut er a cho bo mchau a kodall e ak mo meliukes er kemiu er a klengar el ngkediu.” (Ocholt 2:10) Tiaikid a mera el ungil el rolel a klengar!
[Aike el Ker er a Suobel]
[Siasing el ngar er a 14 el llel]
A rechad a ulemes er a Saulus el kmo ngmla er ngii a techellel el mo merau el chad
[Siasing el ngar er a 15 el llel]
A Paulus a ulechotii a ungil el rolel a klengar
