Chelebirukel el Omeruul—Ngua Ngerang a Telemellel er Chelechang?
Chelebirukel el Omeruul—Ngua Ngerang a Telemellel er Chelechang?
“A kombalii er kemam a meruul a bebil er a ureor el kirel a ta er a obis er a kabelment. Engdi aki blechoel el mengiil el erung me a lechub e ngedei el buil er a uchei er aki mngai a ududam. Me nguaisei, engdi ngmla er ngii a ta el chad er a ureor er a kabelment el ulemekedong er ngak e dilu el kmo ngsebecham el mereched el ngmai a ududam a lsekum aki msang a bebil er ngii el udoud.”—JOHN. *
KAU ngmla ta el mecheblad er a chelebirukel el omeruul? Alta ngdiak el uai aika el medung er bab, engdi kulterekokl el mla chelebangel a telemellel a chelebirukel el omeruul.
A Transparency International’s (TI) 2011 Corruption Perceptions Index * a melekoi el kmo, “a klou el ildois er aike el 183 el beluu el mla meteriter a kmal klou a chelebirukel er a chelsel.” E a eru el rak er a uchei, e a TI a millekoi el kmo sel report er tir er a rak er a 2009 a ulechotii el kmo a chelebirukel el omeruul a kmal mla mo klou er a beluulechad el rokir. Ngmesaod el kmo: “Ngdiak a ngii di el basio el sebechel el olechib er ngii er a chelebirukel el omeruul.”
A lebebil er a taem, e aike el tekoi el mo duubech el chelebirukel el omeruul a uchul a sebechel el kmal mo mekngit. El uai tiang, a Time magazine a melekoi el kmo a “chelebirukel el omeruul me a rechad el diak lomekerreu” a bebil er a uchul me te kmal mle betok a rechad el mlad er sel desiu el mla er ngii er a Haiti er a rak er a 2010. Ngmesaod el kmo: “A rebetok el chad a mengeluch er a rechad er a kabelment el ousbech a udoud a uchul me ngsebechir el omekedechor a meklou el blai el oltirakl er sel sorir e diak loltirakl a uldesuir a re engineer.”
Ngsebechel a chelebirukel el omeruul el mo diak? A bo donger er tia el ker, e ngkired el mo ungil el medengei a bebil er a uchul me ngmo er ngii a chelebirukel el omeruul. Kede mo mesaod aikang er a ongingil el suobel.
[Aike el Footnote]
^ Ngakl a mla mengodech.
^ “A Corruption Perceptions Index a olecholt aike el beluu el diak a kmal chelebirukel el omeruul er ngii me aike el beluu el betok a chelebirukel el omeruul er ngii.”—Transparency International.
[Blurb el ngar er a 3 el llel]
“A chelebirukel el omeruul a belkul a kmo a chad a ousbech er a deruchellel el di mo uchul a klungiolel. Me a rechad el olab a deruchall sel lak el melemalt a omerellir, e ngtomellii a deuil a rengrir, urerir me a klengar er tirke el chad el ultuil er tir.”—TRANSPARENCY INTERNATIONAL
