A Chelebirukel el Omeruul a Mo Diak!

“Motilii omeltkem er a RUBAK e molengesenges a llechul; . . . e ke mo mesa ngikel dengerenger el modik.”​—PSALM 37:34.

KAU ke uai a rebetok el chad el omdasu el kmo a chelebirukel el omeruul a di melemolem el ngar er ngii? Tiang a diak el beches el uldasu. Ngar er aika el mereko el rak, e a rechad a mla melasem a bek el bedengel a kabelment, engdi ngdirkak a ta er ngii el mla choridii a chelebirukel el omeruul. Omomdasu e ngmo er ngii a taem el sebechir a rokui el chad el meruul a melemalt el tekoi?

Ngmera el dmeu a rengud e le a Biblia a kongei er tia el tekoi! Ngmelekoi el kmo ngdi kmedung e a Dios a mo choroid a chelebirukel el omeruul er tia el chutem. Ngoeak a ngera el rolel? Ngoeak a Rengedel, el ngii a kabelment el ngar er a eanged el mo rullii tia el beluulechad el mo paradis. A Jesus a ullisechakl er a rulebengkel el mo meluluuch el kirel tia el Renged. Ngmillekoi el ngar sel nglunguuch el okedongall el Nglunguchel a Rubak el kmo: “A rengedem le mei; ma uldesuel a rengum le meruul ra belulechad.”​—Mateus 6:10, Beches el Testament.

A Biblia a ulemlaoch el kirel a Jesus Kristus el ngii a mo Mengedereder er sel Renged el kmo: “Ng olsobel er a re mechebuul el tirkel omekedong er ngii, me tirkel metacherbesrir ma re cheloit el chad. Ng chubteterir a re mechitechut ma re mechebuul; ng olsobel a klengar er tirkel metacherbesrir. Ng olsobel er tir er a ulecheracheb ma mekngit el bekeu el omeruul.” (Psalm 72:12-14) Momtab el kmo a Jesus a melatk a rengrir tirke el chelebangel a chelebirukel el omeruul, e mo merrob aika el tekoi! Ngmera el dmeu a rengud el mo medengelii tia el tekoi.

Ngar cheungel a omengederederel ngika el chubechub e mesisiich el Merreder, e a Rengedel a Dios a mo choroid a chelebirukel el omeruul er tia el chutem. El oeak a ngera el rolel? Ngoeak sel bo lolekngemed aike el edei el uchul a chelebirukel el omeruul.

A Ongetikaik er a Klengit

Chelecha el taem, e kede rokui el kired el oltngakl a blekerdeled el meruul a mekngit el di oltirakl a soad. (Rom 7:21-​23) Me nguaisei, engdi ngdirk ngar er ngii a rungil el chad el tir a sorir el meruul a llemalt. Te mui el oumerang er a klungel a ultutelel a olubet el tengetengel a Jesus, el ngii a uchul me ngsebechel el musubes a kngterir. * (1 Johanes 1:7, 9) A choua itirka el chad a mo ngmai a klungiolir er sel kot el klou el olechotel a bltkil a rengul a Dios, el ngar er a Johanes 3:16 el kmo: “Ele Dios a kmal mle betik a  rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”

A Dios a mo meruul er a kmal ungil el tekoi el kirir a reblak a rengrir el chad. Ngar sel merael mei el beches el beluulechad, e ngmo choroid a rokui el klengit, e ngosuterir a rechad el mo cherrungel e melemalt. (Isaia 26:9; 2 Petrus 3:13) Ngar cheungel a Rengedel a Dios, e ngdikea el lluut a klengit el mo rullii a chad el mo meruul a chelebirukel.

A Ongetikaik er a Mekngit el Beluulechad el Dekiei er Ngii

Ngmekngit a rengud, e le te betok a rechad er chelechang el meruul a mekngit el mo er a rebebil. Te di ousbech er a remechebuul e mengetikaik er a rebebil el mo meruul a chelebirukel el omeruul. A Biblia a mengelechel er a choua itirka el chad el kmo: “A re dengerenger le chitii a blekerdelel a klengar er tir e le ngedechii a rolel a uldesuir.” A lsekum a reuaisei el chad a mo er a bult, e a Biblia a tibir el kmo a Dios a “mereched el ousubes a klengit.”​—Isaia 55:7.

Me nguaisei, engdi a lsekum a rechad a diak el sorir el melodech a blekerdelir e a Dios a mo kirel el okngemedeterir. Ngoeak a Rengedel, e a telbiil el ngar er a Biblia a mo tmaut. Ngmelekoi el kmo: “Motilii omeltkem er a RUBAK e molengesenges a llechul; . . . e ke mo mesa ngikel dengerenger el modik.” (Psalm 37:34) Me sel bo ledibus a remekngit, e a reblak a rengrir el mesiungel a Dios a dikea lluut el mo chelebangel a chelebirukel el omeruul.

A Ongetikaik er a Satan el Diabelong

A Satan el Diabelong a kmal diak el soal el obult er a kngtil. Engdi ngdmeu a rengud e le a Jehovah a di kmedung e ngmo torrebengii me lak longetikaik er a rechad. E a uriul e ngmo okngemedii. Ngdikea lluut a Satan el mengetikaik er a rechad el mo meruul a chelebirukel el omeruul.

Nguaisei el kora meringel er kid el oumerang el kmo a Dios a mo okngemed aike el rokui el uchul a chelebirukel el omeruul. Ke locha mo melatk el kmo, ‘A Dios ngmera el sebechel el mo remuul a chouaika el tekoi? E a lsekum e ngsebechel, e ngera me ngdirkak loruul?’ Aikang a kmal ungil el ker, e a Biblia a meskid a kmal ungil nger el kirel. * Aki mengemedaol er kau el mo omes el kmo ngera ngolisechakl a Biblia el kirel a ngar medad el klebesei sel bo lak a chelebirukel el omeruul.

[Aike el Footnote]