Mosuub er a Tekingel a Dios

Ngera Mo Duubech el Kirel a Klsuul el Klechelid?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia er kau. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngdi ungil a rokui el klechelid?

Ngar er a chelsel a betok el klechelid, e te ngar er ngii a remelemalt a rengrir el chad el tir a sorir el oldeu er a rengul a Dios. Me a Dios a omes er tir e omekerreu er tir. Engdi ngklengiterreng, e le rebebil a ousbech a klechelid el meruul a mekngit el tekoi. Ngar er a mong, e te mla er ngii a remengeteklel a klechelid el ulemekringel er tirke el ulemtok er tir. (2 Korinth 4:3, 4; 11:13-​15) E chelechang, e a doltirakl a chais, e a rebebil el mengeteklel a klechelid a melisiich a tekoi er a Terrorist, mekemad, e dirrek el chelsechusem er a mekngit el omeruul el mo er a rengalek.​—Monguiu er a Matteus 24:3-5, 11, 12.

A Biblia a olisechakl el kmo ngngar er ngii a eru el bedengel a klechelid, el tang a klemerang me a tang a klsuul. A klsuul el klechelid a diak lolisechakl a klemerang el kirel a Dios. E a Jehovah a kmal soal a rechad a bo lodengei a klemerang el tekoi el kirel.​—Monguiu er a 1 Timoteus 2:3-5.

2. Ngera mo duubech el kirel a klsuul el klechelid?

A Dios a kmal diak el soal a rechad a lemecheblad er a blulak el lolisiich a klsuul el klechelid. Me tirke el chedal aike el klechelid a kmal betik a rengrir e sorir el sechelil tia el beluulechad el chederdall er a Satan el Diabelong. (Jakobus 4:4; 1 Johanes 5:19) A Tekingel a Dios a mesaod el kirel aika el klechelid el melisiich a kabelment er a klechad er a bai lolisiich a tekingel a Dios el kmo te di ua oteruul dil. A Biblia a omekedong er ngika el oteruul dil el “Kloul Babilon,” el ngii a ngklel sel mats el ulemuchel a klsuul el klechelid er ngii er a uriul er a Ieleb er a taem er a Noah. Ngdi telkib kung e a Dios a mo okngemed aika el klechelid el kmal meketeketang el omulak e omekcharm er a klechad.​—Monguiu er a Chocholt 17:1, 2, 5, 17; 18:8, 23, 24.

 3. Ngmekerang a Dios e mo merkii a deurreng er a beluulechad?

A merekung el okngemedel a klsuul el klechelid a kmal ungil el chais. Ngmo uchul a deurreng me a ulengull er a klechad. Ngmo diak el lluut a klsuul el klechelid el mengeblad e lolisiich a omeleakl er a rechad. A rokui el chad a mo kiei el ta rengrir e mengull er a di ta el mera el Dios.​—Monguiu er a Isaia 11:9; Chocholt 18:20, 21; 21:3, 4.

4. Ngera kirir el meruul a remelemalt a rengrir el chad?

A Jehovah a dirkak lobes er a remelemalt a rengrir el tir a ngar er a chelsel a klsuul el klechelid el meliuekl er a beluulechad. Chelecha el taem e ngoleker er tirka el chad el mo dmak e olisechakl er tir er a klemerang el tekingel.​—Monguiu er a Mika 4:2, 5.

A Jehovah a mengemedaol er tirke el sorir el mesiou er ngii el me soiseb er a telungalek er ngii. Alta e a resechelid me a rechedad a mo chetirir kid sel domuchel el mesiou er a Jehovah engdi ngmo uchul a klengeltengat. E le kede mo sechelil a Dios, e mo er ngii a beches el “telungalek” er kid el betik a rengrir er kid, e dirrek el mo er ngii a omeltked el mo kiei el mo cherechar.​—Monguiu er a Markus 10:29, 30; 2 Korinth 6:17, 18.

A lsoam a lmuut el omesodel, e momes er a 15 me a 16 el bliongel er tia el babier el mirruul er a Resioning er a Jehovah.

[Credit Line]

The Complete Encyclopedia of Illustration/J. G. Heck