Aika el Nger Ngklou a Ultutelel?

“Ko mo medengei a klemerang, ma klemerang a meskemiu a ilmokl.”​—JOHANES 8:32.

A BIBLIA a olecholt er a klemerang el sebechel el rullid el mo mimokl er a rraurreng me a cheleuid el uldasu el kirel a Jesus. Engdi omomdasu, e ngklou a ultutelel aike el tekoi el doumerang el kirel a Jesus? Chochoi. Ngklou a ultutelel er a osengel a Jehovah me a Jesus, e dirrek el klou a ultutelel el kired.

● Ngera me ngklou a ultutelel er a osengel a Jehovah? E le “Dios a bltikerreng.” (1 Johanes 4:8) A Jehovah a soal a dekiei el mo cherechar el dmeu a rengud. A Jesus a kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a . . . mo oba diak a ullebengelel klengar.” (Johanes 3:16) A Dios a uldureklii a Ngelekel el me melubet a kngtid e mekengii a techall me ngmo sebeched el kiei er a Paradis el chutem el mo cherechar, el ngii a mle moktek er a Dios er a uchelel. (Genesis 1:28) A Dios a soal el mesterir a sengk er a diak a ulebengelel el klengar el mo er tirke el mesuub a klemerang el kirel a Ngelekel e oltaut a tekoi el losuub er a klengar er tir.​—Rom 6:23.

● Ngera me ngklou a ultutelel er a osengel a Jesus? A Jesus a dirrek el betik a rengul er a rechad, me ngulechotii a bltkil a rengul er sera lekengei el tongetengii a klengar er ngii el kired. (Johanes 15:13) Ngmle medengei el kmo a loruul el uaisei e ngmo uchul a techall er a osobeled. (Johanes 14:6) A Jesus a soal el meseterir a rebetok el chad el mo ngmai a klungiolir el okiu a olubet el tengetengel. Tiaikid a uchul me ngulemekngerachel er a redisaiplo er ngii el mo olisechakl er a rokui el chad el kirel a soal a Dios me a moktek er Ngii.​—Matteus 24:14; 28:19, 20.

● Ngera me ngklou a ultutelel el kired? Ka di molatk aike el meklou a ultutelel el tekoi er a klengar er kau. El ua tiang, ke oureng er a klisichel a bedengem me a ungil el klengar el kirem kau me a rebetik er a rengum? Me ngokiu a Jesus, e a Jehovah a soal kau me a rebetik er a rengum a obo mnguu a ungil el klengar el ngar er a chelsel a beches el beluulechad el diak a ringel me a chelebuul er ngii. (Psalm 37:11, 29; Chocholt 21:3, 4) Ngdiak el soam el mo kiei er a chouaitia el ungil el beluulechad? A lsekum ngsoam, e ngngar er ngii a tekoi el kirem el meruul.

Ka mluut el omes er a bades er a uchelel tia el suobel el kmo: “Ko mo medengei a klemerang, ma klemerang a meskemiu a ilmokl.” A klemerang el kirel a Jesus me a ngerechelel el mo oltaut a moktek er a Dios, a sebechel el ngubetid me ngmo diak dechederedall er a klengit me a kodall. Engdi a kot e ngkirem el mo “medengei a klemerang.” Ngsoam el mesuub a lmuut el betok el kirel tia el klemerang el sebechel el mo uchul a klungiolem kau me a rebetik er a rengum? A Resioning er a Jehovah a kltmokl el mo ngosukau.