Abraham​—A Chad el Uleba Blekeu

A Abraham a omes er a telungalek er ngii me a remesiungel el mengetmokl er tir el kirel a omerael el mo er a beluu er a Kanaan. (Genesis 12:1-5) Me ngomes er tia el klou el ildois er a rechad el ultuil a klengar er tir er ngii, e mlo melechesuar a klungel a ngerachel el lobang el kirel el mo omekerreu er tir. Ngmekerang e mo sebechel el mesterir aike el lousbech er a chelsel a ngodech el beluu el diak lodengelii? Ngsebechel el mo beot el ua lengar er a beluu er a Ur el merau el beluu, e ungil a chutem er ngii, e ungil a rolel a ralm er ngii? Ngera mo duubech a lsekum e ngmo smecher me a lechub e ngmad er sel ngodech el beluu? Ngtecha mo omekerreu er a telungalek er ngii? Alta e ngmle suebek a rengul engdi ngdimlak lebecherei a uldesuel me longitechut er ngii. Ngkmal mle kltmokl el mo meruul a tekoi el lulengelechel er ngii a Dios, er a chelsel a ngii di el tekoi el blo lechelebangel, me a omerellel a mera el ulechotii a klou el blekeu.

NGERANG A BLEKEU? Ngmesisiich el blekeradel el bekeu, el diak lemedakt me a lechub e lemerur. A blekeu a diak el belkul a kmo a chad a diak a ta el bo lemedakt. Engdi a chad el nguu a blekengel er a Dios a sebechel el meruul a tekoi, alta ngmedakt.

NGMILEKERANG A ABRAHAM E OCHOTII A BLEKEU? A Abraham a kilengei el mo meruul a soal a Dios, alta e a rechad a kiliei el ngodech a rolel a klengar er tir. Ngmlukeroul er a chelsel a beluu el rechad er ngii a milengull a betok el kakerous el bleob el chelid. Engdi ngdimlak lebechei a uldesuir a rechad me leterebengii me lak loruul a tekoi el lodengei el kmo ngmelemalt. Ngbai mle bekeu el ngodechii a rolel a klengar er ngii, el mlo mengull er a di ta el Dios el ngike el “Kot el Ngarbab el Dios,” el Jehovah.​—Genesis 14:21, 22.

A Abraham a ngiluu a omengull er ngii el mo er a mera el Dios el mo kot el ngaruchei er a ngii di el tekoi er a klechad. Ngkilengei el choitii a ungilbesul el klengar er ngii er a beluu er a Ur, e mo kiei er a belngel a ked, e mle mui el oumerang er a Jehovah el kmo ngmo msang aike el rokui el lousbech. Ngulterekokl el cherengel aike el rak el lengar er a ked, e nglocha mlo melatk er a ungilbesul el klengar er ngii er a beluu er a Ur. Engdi ngmle ulterekokl a rengul el kmo a Jehovah a mo blechoel el omekerreu er ngii me a telungalek er ngii. Me ngmle blechoel el kmeed er a Jehovah, e ulemes er ngii el kot el klou a ultutelel el Chad er a chelsel a klengar er ngii, el uchul me ngmle sebechel el bekeu e melemolem el olengesenges a ulekrael er a Dios.

NGERANG A KLUBELED EL DENGAI ER TIANG? Ngsebeched el oukerebai er a Abraham el oeak sel dokurulii a blekenged el mo olengesenges er a Jehovah, alta rechad el ngar bita er kid a diak loruul el uaisei. El ua tiang, a Biblia a olisechakl el kmo tirke el kongei el mo oumerang er a Jehovah el Dios a locha mo modechelakl er a resechelirir me a lechub e te chad er a blirir. (Johanes 15:20) Engdi sel lemukeroul a klaumerang er kid el okiu a omesubed el kirel a Jehovah, e kede mo mesisiich el dechor el kirel a klaumerang er kid el oeak a ungil e melemalt el rolel.​—1 Petrus 3:15.

 Ngdirrek el sebeched el oumerang er a telbilel a Jehovah el kmo ngmo mesterir tirke el oumerang er ngii aike el lousbech. Chouaitia el klaumerang a meskid a blekeu me ngmo sebeched el nguu a tekingel a Dios el mo kot er a chelsel a klengar er kid el kuk ngaruchei er a ngii di el tekoi er a klechad. (Matteus 6:33) Ka di molatk er a ta el ongalek el mlo sebechir el meruul er tia el tekoi.

A Doug me a Becky el mla er ngii a teru el ngelekir el sechal a kmal mle sorir el melukl el mo kiei er aike el beluu el ousbech a ngeso el mo teloi er a ureor er a berkel a klumech. Me te mlerriter a suobel e dirrek el milluluuch, e tilbir el mo oltaut er a turrekong er tir. A Doug a melekoi el kmo: “Aki mera el uluusbech er a blekeu el mo sebecham el kutmeklterir a rengelekam e melukl, el dimlak ki modengei el kmo ngngera mo duubech. Engdi uchelel er a ki molib er tia el turrekong er kemam, e aki milsaod el kirel a kerebil a Abraham me a Sara. Aki millatk er sel klaumerang er tir el bedul a Jehovah el ngii a dirrek el dimlak a ta el lechiteterir. Me ngoeak aika el tekoi, e ngmera el ngilsukemam.”

Me a losaod el kirel a klengar er tir er a ta er a beluu, e a Doug a melekoi el kmo: “Ngmera el klou a klengeltengat el ki bla mngai. A blekerdelel a klengar er kemam a kmal mla mo beot el uchul e ngmla mo sebechel el klou a temam el ongalek el dmak el oldingel a obliil, chadecheduch, e dirrek el dmak el milil el obengterir a rengelekam el sechal. Tiang a uchul e ngmla mo er ngii a klou el temam el dmak, e dirrek el uchul a klou el deurreng er kemam.”

Me nguaisei, engdi ngdiak el rokui el chad a sebechir el meruul er tia el tekoi. Engdi kid el rokui a kmal sebeched el mesuub er a kerebil a Abraham el nguu a omengull er kid el mo er a Dios el mo kot er a rokui el tekoi, e mo oumerang el kmo ngulterekokl el mo melemolem el melisiich er kid. Me sel doruul el uaisei, e kede mera el mo oltaut er a tekoi el medung er a Biblia el kmo: “Me ngdi subed a de du el kmo, ‘A Rubak a ngelseuik, me ngdiak a kdekdelek.’ ”​—Hebru 13:5, 6.

[Baks/Siasing el ngar er a 7 el llel]

A Redil el Meluu er a Dios e Mekreos el Bechiil el Redil

A Sara a mle bechil a chad el kmal uluumerang er a Dios. Nguaisei, engdi ngika el redil el meluu er a Dios a ulechotii a kmal ungil el kerebai. Ngar er a Biblia, e ngomasech er a ngklel el edei el taem el kmo ngta er a ungil el kerebai el kirir a redil. (Isaia 51:1, 2; Hebru 11:11; 1 Petrus 3:3-6) Me alta e ngdiak el betok a omesodel ngika el redil er a Bades, engdi ngsebeched el mes a betok el ungil el blekerdelel.

Ka di molatk er a uldesuel a Sara er sel taem el Abraham a silbedii el kmo a Dios a soal a ltobed er a beluu er a Ur. Ngmlo melatk el kmo te merael el mo er ker, e ngera uchul? Ngmle suebek a rengul el kirel aike el lousbech er a bek el sils? Ngmle mekngit a rengul el mo cheroid er a resechelil me a rechad er a blil, el diak lodengei el mo ngoingerang e nglmuut el mo meseterir? Ngulterekokl el millatk aika el tekoi. Engdi ngkilengei el merael el ulterekokl a rengul el kmo a Jehovah a mo omekngeltengat er ngii el kirel a blekongesenges er ngii.​—Rellir 7:2, 3.

Nguldimukl er a blekongesenges er ngii el mo er a Dios, e ngdirrek el kmal mle ungil el bechiil el redil. Ngdimlak lolasem el orribech er a omengederederel a bechil, e bai milekurulii a dmolech el omengull el bedul ngii, e dirrek el mle blak a rengul el olengeseu e melisiich er ngii sel lomekrael er a telungalek er tir. Aika el blekerdelel a Sara a rirellii el lmuut el mo klebokel.​—1 Petrus 3:1-6.

Ngsebechel a chouaika el blekeradel el mo uchul a klungiolir a rebechiil el redil er chelechang? A Jill el mla bechiil el betok er a 30 el rak a kmo: “A kerebil a Sara a mla osisecheklak el mo bleketakl el ouchais er a bechik el kirel a osengek er a tekoi. Osisiu el taem, e ngngerechelel el melib a tekoi e le ngii el bdelul a delengcheklam. Me sel letibir a tekoi, e ngmocha ngerechelek el melisiich er ngii me lemeketmokl.”

Sel kot el mekreos el suobel el desuubii er a blekerdelel a Sara a kmo: Alta e ngkmal mle klebokel el redil, engdi ngdimlak lebecherei a klebekelel er a ikrel me lerellii el mo kedidai a rengul. (Genesis 12:10-​13) Ngbai mle blak a rengul el olengeseu er a Abraham er a chelsel a ungil me a mekngit el taem er a klengar er tir. Kede medengei el kmo a Abraham me a Sara a mle mesisiich a klaumerang er tir, e ngariou a rengrir, e mle kaubltikerreng, e dirrek el dul mle uchul a betok el klengeltengat er a delongelir.