Ngar er Ngii a Ta el Bla Mecheblad?

NGDI kesai el tekoi a sebechel el mo uchul a kngtil a rengum el ua sel bo modengei el kmo ke mla mecheblad er a chad el moumerang er ngii. Ke locha mo merur, e mo kesib a rengum, e kmal mo mekngit a rengum. A blulak a tomall a klausechelei me a chebechiil, e mulekngeterir a rechad me te oriid a betok el miliol el ududir.

Ka molatk el kmo, ngmo ua ngerang a uldesuem sel bo modengei el kmo a rechad a ulumulak er kau el kirel a Dios. A lsekum e ke mesisiich el chedal a klechelid, e ngulterekokl tia el tekoi el ngar er ngii a klou el lerellii er kau, el ua tekoi el dilubech el mo er tirka el chad:

● Ak milechesuar el kmo ak kmal milecheblad er a ikelesia er ngak.”​—DEANNE.

● “Ngkmal mlo kesib a renguk. Te kmal milengeuid er ngak. Ak milechesukak el kmal milecheblad me a rokui el omeltkek me a turrekong er ngak a kmal di mlo diak a belkul.”​—LUIS.

Nglocha telkib el mo meringel er kau el melatk el kmo ke milecheblad er a cheleuid el osisechakl el kirel a Dios. A tekoi el msiluub a locha mla er a chad el kau a kmal uluumerang er ngii e dirrek el dimlak momdasu el kmo ngmo tomellii a rengum. Te locha rechad er a blim, badrei, bastor, me a lechub e ngkmal kmeed el sechelim. Ke ulterekokl el kmal uluumerang er a ta el osisechakl er a chelsel a klengar er kau. Engdi kau, ngdiak mkengei el kmo ngmo lmuut er a uldasu el mla mo meketeket el loumerang er ngii a rechad me ngdirrek el sebechel el blulak el tekoi? A ta er a mle President er a Merikel el Franklin D. Roosevelt a mle medengelii tia el klemerang el tekoi, e le ngmillekoi el kmo: “A domelekl er a tekoi me ngdi diak el sebechel el rullii a blulak el mo klemerang.”

Ke mekerang e mo medengei el kmo ke mla mecheblad? A Jesus a mle ta el lolekoi el ngar a nglunguchel el mo er a Dios el kmo: “A tikingem a klemerang.” (Johanes 17:17) Ochoi, a Tekingel a Dios el Biblia a ngar ngii aike el tekoi el kid a ousbech el mo kutukel a klemerang el tekoi er a blulak.

Ngera uchul me ngdiak becherei a Biblia me locholt aike el eim el blulak el tekoi el kirel a Dios? Ngulterekokl el sebechem el mo medengelii sel rolel e ngsebechel a klemerang el rullii a klengar er kau el mo ungil.