“Mengelaod er a Rokui el Mengeiung”
“Mengelaod er a Rokui el Mengeiung”
“[A Jehovah a] mla ngiltak . . . el mo mengelaod er a rokui el mengeiung.”—ISAIA 61:1, 2.
1. Ngerang mirruul a Jesus el mo er a rengar er a klengiterreng, e ngera uchul?
A JESUS KRISTUS a dilu el kmo: “Sel kuruul a soal ngikel ulderchak e krekir a urerel, itiaikid a kelek.” (Johanes 4:34) A Jesus er a loltaut er a ngerechelel el mla er a Dios, e ngullecholt aike el klebokel el blekerdelel a Demal. A ta er aika el blekerdelel a Jehovah a sel klou el bltkil a rengul el kirir a rechad. (1 Johanes 4:7-10) A apostol el Paulus a mileketeklii a olechotel tia el bltikerreng er a losaod el kirel a Jehovah el “Dios er a bek longelaod.” (2 Korinth 1:3) A Jesus a ulechotii tia el bltikerreng er sera lotutii a ulochel a Isaia. (Monguiu er a Isaia 61:1, 2.) Ngchiliuii tia el ulaoch el ngar er a blil a ongdibel er a Nazareth, el ngii el tekoi a millutk el kirel. (Lukas 4:16-21) Ngar er a omesiungel, e a Jesus a milengelaod er a rengar er a klengiterreng e mellisiich er tir e dirrek el milsterir a budech er a uldesuir.
2, 3. Ngera me a rultirakl er a Kristus a kirir el oukerebai er ngii el mengelaod er a rebebil?
2 A rokui el oltirakl er a Jesus a kirir el mo oukerebai er ngii el oeak a longelaod er a rengar er a klengiterreng. (1 Korinth 11:1) A Paulus a dilu el kmo: “Misei e mkasisiich e mkateketek a klungioliu.” (1 Thesalonika 5:11) E dirrek el kmal kired el mengelaod er a rebebil e le klechad er chelechang a chelebangel er a “blsechel a ringel.” (2 Timoteus 3:1) Me a remelemalt a rengrir el chad el meliuekl er a beluulechad a kmal chormang er a tekingir me a omerellir a rechad el uchul a klengiterreng me a chelemuurreng el kirir.
3 A Biblia a ulemlaoch el kirel aika el uriul el sils er tia el mekngit el blekeradel er a beluulechad el kmo “ar chad a mo betik a rengrir ra di tir, e nguibes a udoud, e chemat ra di tir, e kididai a rengrir, e oltuub, e omtok rar demerir mar derrir, e diak lodenge saul, e diak le chedaol, e diak le chubechub, e diak le mesumech a rengrir, e melaes, e diak le delodau, e teleberechel, e chetirir a ungil, e keikr, e di olab a rengrir, e blkuuk, e betik a rengrir ra tametereng el kuk ngaruchei ra le betik a rengrir ra Dios.” A chouaika el blekeradel a kmal mla mo mekngit, e le “ar mekngit el chad mar mengeblad a mengal mora mekngit.”—2 Timoteus 3:2-4, 13.
4. Ngera mla duubech el kirel a blekeradel er a beluulechad er chelecha el taem?
4 Aika el tekoi a diak el kirel el mechas a rengud er ngii e le Tekingel a Dios a meketeklii el kmo “a belulechad el rokir a chederdall er ngikel mekngit.” (1 Johanes 5:19) “A belulechad el rokir” a uldimukl er ngii a tekoi er a balatiks me a klechelid me a siobai, me aike el rolel a loltobed a cheleuid el chais er a beluu. Nguaisei, a Satan el Diabelong a ngike el “merreder er tial belulechad” e “chelid er tial belulechad.” (Johanes 14:30; 2 Korinth 4:4) A blekeradel er tia el beluulechad a melemolem el mengal mo mekngit e le Satan a oba klou el cheldechuderreng e le ngmedengei el kmo ngdi kedeb ku temel. (Chocholt 12:12) Ngkmal mechelaod a rengud sel dodengei el kmo a Dios a diak lebecherei a Satan me tia el mekngit el blekeradel er ngii me lolemolem. Me sel omelsemai er a Satan el kirel a llemeltel a Jehovah el mengedereder a ulterekokl el mo meketmokl!—Genesis 3 el bliongel; Job 2 el bliongel.
A Ungil el Chais a Mla Oberk er a Beluulechad el Rokir
5. Ngmekerang e toutang a ulaoch el kirel a ureor er a berkel a klumech er aika el uriul el sils?
5 Ngar er aika el meringel el taem er a reksi er a klechad, e sel tekoi el lulemlaoch er ngii a Jesus a toutang. Ngdilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Matteus 24:14) Tia el ureor el ouchais el kirel a Rengedel a Dios a meketmeklang er sel kot el ngarbab el rolel er chelechang. Chelecha el taem, e a kuk betok er a 7,500,000 el Sioning er a Jehovah, el ngar er a kuk betok er a 107,000 el ongdibel el meliuekl er a beluulechad a omerk el kirel a Rengedel a Dios, el di ua Jesus el lullisechakl e omerk el kirel a Renged. (Matteus 4:17) Me ngoeak a ureor er a berkel a klumech, e te mengelaod er tirke el ngar er a klengiterreng. Nguaisei, ngar er aika el mereko el eru el rak, e a 570,601 el ildisir a rechad a miltecholb el Sioning er a Jehovah!
6. Ngera uldesuem el kirel a klungel tia el urered er a berkel a klumech?
6 A klungel tia el ureor er a berkel a klumech a sebeched el mesang el oeak a urerir a Resioning er a Jehovah, el oleiuid e merous a babier el mesaod er a Biblia el ngar er a kuk betok er a 500 el omelekoi. Ngdirkak desang a choua klungel tia el ureor er a chelsel a reksi er a klechad! A olechotel me a urerel me a okurulel a cheldebechelel a Jehovah el ngar tia el chutem a kmal mengasireng el tekoi. E a lsekum e ngdiak a ulekrael me a ngeso er a mesisiich el oureor el klisichel a Dios, e ngdiak el sebechel a choua klungel tia el ureor el meketmokl er a chelsel a beluulechad el chederedall er a Satan. Tia el ungil el chais el mla oberk er a beluulechad el rokir a uchul, me a ongelaod el ngar er a Bades a loldeu a rengrir er ngii a rekldemed er a klaumerang, me tirke el ngar er a klengiterreng, el tir a kongei er a klumech er a Renged.
Mengelaod er a Rekldemed er a Klaumerang
7. (a) Ngera me kede medengei el kmo a Jehovah a diak bo longeroid a rokui el tekoi el uchul a meringel el blekeradel er chelechang? (b) Kede mekerang e medengei el kmo ngsebeched el outekangel a odechelakl me a ringel?
7 Ngar er a chelsel tia el beluulechad el mui er a chelebirukel me a ringel, e kede ulterekokl el mo chelebangel a bebil el blekeradel el mo uchul a sebekreng. Kid a ungil el medengei el kmo a Dios a diak longeroid aike el rokui el uchul a klengiterreng me a lechub a ringel er a uldasu er a uchei er a bo lokngemedii tia el mekngit el blekeradel er a beluulechad. Me chelecha el dongiil er sel sils er a odechelakl, e ngsebechel el measem a blakerreng er kid el mo er a Jehovah me a omengederederel. (2 Timoteus 3:12) Engdi ngoeak a ngeso me a omelisiich er a Demad el ngar er a eanged, e ngsebeched el mo ua rengellitel el Kristiano er a Thesalonika er a irechar, el mlo chelebangel a odechelakl me a ringel el uleba kllourreng me a klaumerang er tir.—Monguiu er a 2 Thesalonika 1:3-5.
8. Ngera el ocholt er a Bades a meketeklii el kmo a Jehovah a melisiich er a remesiungel?
8 A Jehovah a ulterekokl el lomesterir a remesiungel a ongelaod er sel taem el lousbech er ngii. El ua tiang, a Kuin el Jesebel er a bo el soal el lomekoad er a profet el Elias, e ngkmal mlo medakt ngii el profet me ngchiliis e dirrek el uluureng me bai lemad. A Jehovah a dimlak loungeroel er a Elias e bai milengelaod er ngii e milsa klisichel me bo el sebechel el otutii a urerel el profet er ngii. (1 King 19:1-21) A Jehovah el mengelaod er a rechedal a sebeched el mesang er a tekoi el dilubech el mo er a ongdibel er a Rekristiano er a kot el dart el rak. El ua tiang, kede menguiu el kirel a taem el “eklesia ra Judea, ma Galilea, ma Samaria el rokir a mlo oba budech e meteketek.” Nguaisei, “me te merrael el medakd ra [Jehovah] e mlo obdois ra ngeseuil [sel oureor el klisichel].” (Rellir 9:31) Kede oba klou el omereng el saul e le ngsebeched el nguu a “ngeseuil a [oureor el klisichel a Dios]”!
9. Ngera me a dosuub el kirel a Jesus e ngmo uchul a ongelaod el kired?
9 Kid el Kristiano a mla ngmai a ongelaod e le kede mesuub el kirel a blekerdelel a Jesus Kristus e dirrek el merael el oltirakl er a kerebai er ngii. A Jesus a dilu el kmo: “Mer ngak, kemiu el rokui el merengela ra ureor el mengol er choberaod el chellungel, me kungellemiu. Ngak a medemedemek e ngariou a renguk, mo mchelngii chongelungel er ngak e mosuub er ngak, e cho bo muaisei e a ulengull a mora reng er kemiu. Chongelungel er ngak a mechelechol, ma telechellek a kebekakl.” (Matteus 11:28-30) Me a dosuub er sel rolel a lolisiich er a rechad a Jesus e doltirakl er a ungil el kerebai er ngii, e ngngosukid el mo cheroid er a sebekreng el bo dechelebangel er ngii.
10, 11. Ngar er a chelsel a ongdibel, e te rua techang a sebechir el melisiich er a rebebil?
10 Ngdirrek el sebeched el ngmai a omelisiich er a rekldemed el Kristiano. El ua tiang, ka molatk er a rolel a remechuodel er a ongdibel a lolengeseu er tirke el mo chelebangel a meringel el blekeradel. A disaiplo el Jakobus a milluches el kmo: “Ngngarngii ra delongeliu a smecher [el mechitechut a klaumerang er ngii]? Ngiil chad loleker rar mechuodel ra eklesia, me bo loluluuch el kirel.” Ngera ngmo rullii sel ngeso? “A nglunguuch ra kloumerang chosobelii a chad el smecher, ma [Jehovah] a mo okisii; ma le ngarngii a klengit el le riruul ngiil chad, me ngmuusubes.” (Jakobus 5:14, 15) A rebebil el chedal a ongdibel a dirrek el sebechir el melisiich er a rekldemir el Kristiano.
11 A redil a blechoel el beot er tir el mengedecheduch er a rebebil er a redil el kirel a kakerous el mondai. Ngileakl a remeklou el redil el Kristiano el sebechir el mesterir a remekekerei el redil a ungil el ulekrael el kirel aike el mondai er tir, e le te locha mla chuarm a osisiu el mondai er a klengar er tir. Me a lolecholt a klemeriarreng el mo er tirka el mekekerei el redil e lungil el lorrenges aike el lolekoi, e tia dirrek el sebechel el ngosuterir. (Monguiu er a Titus 2:3-5.) Nguaisei, a remechuodel me a rekuk bebil a sebechir e dirrek el kirir el ‘melisiich rar mechitechut a rengrir’ el ngar er a delongeled. (1 Thesalonika 5:14, 15) E dirrek el kmal ungil a dolatk el kmo a Dios a “mengelaod er kid sel de ngara chelsel a ngiidil ringel, el kirel me bo lsebeched loba uaisel ongelaod el lobang el mengelaod er kid el cholodeterir tirikel ngara chelsel a ngiidil ringel.”—2 Korinth 1:4.
12. Ngera uchul me ngklou a ultutelel a debo er a bek el miting er a Rekristiano?
12 A kot el klou a ultutelel el rolel a omelisiich me a ongelaod a sebeched el ngmai el loeak aike el suobel el mesaod er a Biblia el ngar er a bek el miting er a Rekristiano. Kede menguiu el kirel a Judas me a Silas el “ullab a betok el tekoi lomeklatk rar udam el melisiich er tir.” (Rellir 15:32) Me a uchei me a uriul er a miting, e ngoeak a ungil el cheldechedechad e ngsebeched el kasisiich er a delongeled. Me a lsekum e kede chormang er a meringel el blekeradel, e lak dongeroid er kid er a rebebil, e le tia diak el sebechel el mo sumechokl a mondai er kid. (Osisechakl 18:1) Ngbai kired el oltirakl er a uleklatk er a apostol el Paulus el kmo: “E bo de kasisiich el omekses a bltikerreng ma ungil lomeruul, e lak de ua blekerdelir a bebil rar chad el mengoit chongdibel er kid, e bai de kachelechel, e domes er ngiil Sils lolekeed, me de mengal mo uaisei.”—Hebru 10:24, 25.
Ngmai a Ongelaod er a Tekingel a Dios
13, 14. Mochotii a rolel a lolisiich er kid a Chedaol Llechukl.
13 Me a bla demetecholb el Kristiano me a lechub e kede dirk ulemuchel el mesuub el kirel a Dios me a moktek er ngii, e kid el rokui a sebeched el ngmai a ongelaod el oeak a Tekingel a Dios, el Biblia. A Paulus a milluches el kmo: “Le ikal rokuil tekoi el dimla meluches a melluches el kirel chosisechakl el mer kid, el kirel me bo doba chomelatk loeak a ducherreng ma chongelaod el lomeskid a chedaol Llechukl.” (Rom 15:4) A Chedaol el Llechukl a sebechel el melisiich er kid e ngosukid me “bo lsiich a kedmeklel el kirel a ungil lurreor, me le mekedmokl el mecherrungel.” (2 Timoteus 3:16, 17) A bo dungil el medengelii a klemerang el kirel aike el moktek er a Dios e doba mera el omelatk el kirel a ngar medad el taem a ulterekokl el mo uchul a klou el ongelaod el kired. Me a leuaisei, e me bo dungil el ousbech er a Tekingel a Dios me aike el babier el mesaod a suobel er a Biblia, el sebechel el mengelaod er kid e dirrek el mo uchul a klungioled er a betok el rolel.
14 A Jesus a milskid a ungil el kerebai er a lousbech a Bades el olisechakl e mengelaod er a rebebil. El ua tiang, a ta el taem er a uriul er a lebekiis er a kodall, e ng ‘milledaes a chedaol Llechukl’ el mo er a reteru el disaiplo er ngii. Me sera longedecheduch er tir, e a tekingel a mera el mlo remutech a rengrir. (Lukas 24:32) A apostol el Paulus er a loltirakl er a kot el ungil el kerebai er a Jesus, e ‘ngmilsaod a tekoi er a Chedaol Llechukl.’ E ngar er a Beroea, e tirke el ulerrenges er ngii a “mle blak a rengrir el melai a Tekoi, me te mlerriter a chedaol Llechukl ra bek el sils.” (Rellir 17:2, 10, 11) Me ngklou a ultutelel a donguiu er a Biblia er a bek el sils, me aike el babilenged a Rekristiano, el mileketmokl el mo melisiich er kid e meskid a omelatk er a chelsel aika el meringel el taem!
Bebil el Rolel a Dongelaod er a Rebebil
15, 16. Ngera bebil er a rolel e ngsebeched el olengeseu e dirrek el mengelaod er a rekldemed el Kristiano?
15 Ngsebeched el olengeseu e dirrek el mengelaod er a rekldemed el Kristiano er a kakerous el rolel. El ua tiang, ngsebeched el ngar er a oderchelir a remechuodel me a resmecher el omechar a lousbech er a stoang. Ngdirrek el sebeched el olecholt a klemeriarreng er kid el mo er a rebebil el oeak a dolengeseu er tir er a ureor er a blai. (Filipi 2:4) Ngdirrek el sebeched el chemat er a rekldemed er a ungil el blekeradel el lolab, el ua bltikerreng me a blekeurreng me a klaumerang.
16 Ngsebeched el mengelaod er a remechudelang el oeak a doldingel er tir, e bo dungil el orrenges a chisir er a ngar er a mong me aike el klengeltengat el mla er a Jehovah el mo er tir. E tiang a dirrek el sebechel el mo uchul a omelisiich me a ongelaod el mei er kid! Ngdirrek el sebeched el menguiu er a Biblia me aike el babier el mengai a uchetemel er a Biblia el mo er tirke el doldingel er tir. Nglocha sebeched el mesuub er a suobel er a Ongkerongel er sel sandei me a lechub e kede mesuub er sel babier el ngar er a Omesubel a Biblia er a Ongdibel. Ngsebeched el dmak el omes a DVD el mesaod a suobel er a Biblia. Ngdirrek el sebeched el ouchais a ungil el tekoi el bla dechuiu er a chelsel aike el babilenged.
17, 18. Ngera me ngulterekokl a rengud el kmo a Jehovah a mo olengeseu e mengelaod er a reblak a rengrir el mesiungel?
17 Me a lsekum e kede mesang a ta er a kldemed el mesiungel a Jehovah el ousbech a omelisiich, e ngsebeched el meluluuch el kirel el ngar er a nglunguched. (Rom 15:30; Kolose 4:12) Me kid sel doutekangel a mondai er a klengar e leblak a rengud el melisiich er a rebebil, e ngsebeched el mo oba osisiu el klaumerang e mo ulterekokl a rengud el ua milluches er a psalm el milengitakl el kmo: “Bsa [Jehovah] a berredem, e ng mo ngosukau. Ng kmal diak bo le bechere melemalt me bo lubuu.” (Psalm 55:22) Nguaisei, a Jehovah a mo blechoel el olengeseu e mengelaod er tirke el blak a rengrir el mesiungel.
18 A Dios a dilu er a remesiungel er a irechar el kmo: “Ngak ngikel melisiich er kemiu.” (Isaia 51:12) A Jehovah a dirrek el mo ngosukid e omekngeltengat er kid el kirel a ungil el omerelled me a tekinged el melisiich er a rechuarm a rengrir. Me a doba omelatk el mo er a eanged me a lechub e kede mo kiei er tia el chutem, me kid el rokui a ngmai a ongelaod er a tekingel a Paulus el mo er a rengellitel el kldemel el Kristiano el kmo: “Di le ngii a Rubak er kid el Jesus Kristus, me ngikel betik a rengul er kid el omeskid a diak a ullebengelel longelaod ma ulterekokl lomelatk loeak a grazia, el Dios el Demad, el mo mengelaod a rengmiu el sisichemiu mo moruul a bek lungil lurreor e mongedecheduch a melemalt el tekoi.”—2 Thesalonika 2:16, 17.
Ke Dirk Melatk?
• Ngua ngera klungel a urered el melisiich er a rengar er a klengiterreng?
• Ngera bebil el tekoi el sebeched el meruul el mengelaod er a rebebil?
• Ngera el ocholt er a Bades a meketeklii el kmo a Jehovah a melisiich er a rechedal?
[Aike el Ker er a Suobel]
[Siasing el ngar er a 29 el llel]
Kau ke dirrek el melisiich er a rengar er a klengiterreng?
[Siasing el ngar er a 31 el llel]
A remekekerei me a remeklou el chad a sebechir el melisiich er a rebebil
