“Mrurt el Melai ra Nguked”

“Me kemiu bo mrurt el melai ra nguked.”​—1 KORINTH 9:24.

1, 2. (a) A Paulus nguluusbech er a ngerang el melisiich er a Rekristiano el chad er a Hebru? (b) A remesiungel a Dios te muchelechel el mo mekerang?

NGAR er a babilengel el mo er a Rekristiano el chad er a Hebru, e a apostol el Paulus a uluusbech er a okesiu el mo melisiich er tirka el kldemel. Ngulemeklatk er tir el kmo ngdiak di el tir el tang a ngar tia el klaidesachel el mo er a klengar, e le te iliuekl er a ‘rebetok locholt el ua diliuekl ra eabed,’ el mla rurtii tia el klaidesachel. Me a leblechoel el melatk er a blakerreng er tirke el mle mesiungel a Dios er a irechar me aike el omerellir el ullecholt a klaumerang, e ngmo ngosuterir a Rekristiano el chad er a Hebru el dukduch a rengrir e melemolem el ngar tia el klaidesachel.

² Ngar sel mlo merek el suobel, e kede milsaod er a blekerdelel a klengar er a rebebil el ‘locholt el ua diliuekl ra eabed.’ A mesisiich el klaumerang er tir er a Dios a ngilsuterir el melemolem el blak a rengrir el mo er Ngii el mo lmuut er a ulebongel er a klengar er tir. Nguaisei, te millemolem el rurtii tia el klaidesachel. Me ngngar sel mlo merek el suobel, e a Paulus a millisiich er a rekldemel er a klaumerang, el uldimukl er kid el kmo: “Me de bedobed a bek el berraod, ma klengit el omereked er ngii er kid, el chemoit.”​—Hebru 12:1.

3. Ngera mle belkul a ulekrael er a Paulus er a losaod er a rechad er a rurt er aike el klekool er a Rechigrik?

 ³ El kirel a rurt, el ngii a ta er a merael a chisel el klekool er sel taem, e a babier el Backgrounds of Early Christianity a ouchais el kmo “a Rechigrik a rirurt el mengaidesachel el di meau.” * Ngar er a chouaika el klekool, e a rechad er a rurt a medobed a rokui el bail el sebechel el rulleterir el mo beketimel. Me alta e ngdiak el soad chouaisei el blekerdelir, engdi tirke el chad er a rurt a mirruul el uaisei e le turrekong er tir a mo nguu a nguked. Me a belkul a tekingel a Paulus a kmo a bo el sebechel a chad el nguu a nguked er a klaidesachel el mo er a klengar, e ngkirel el medobed a ngii di el ngerang el sebechel el omekberaod er ngii. Me tiang a mle ungil el ulekrael el mo er a Rekristiano er seikid el taem e dirrek el ungil el kired er chelechang. Ngera el tekoi a sebechel el omekberaod er kid me lak denguu a nguked er tia el klaidesachel el mo er a klengar?

“De Bedobed a Bek el Berraod”

4. Ngera ble lemechesang er ngii a rechad er a taem er a Noah?

⁴ A ulekrael er a Paulus a kmo “de bedobed a bek el berraod.” E tiang a uldimukl er aike el rokui el sebechel el mengesang er kid me lak bo el blak a rengud el rurtii tia el klaidesachel. Me ngera aika el tekoi el omekberaod er kid? El kirel a Noah, el ta er tirke el kerebai el lulsaod er ngii a Paulus, e molatk a tekingel a Jesus el kmo: “Ma klsel a Ngelekel a chad me ngdirrek el morngii choua ikel dilubech ra taem ra Noah.” (Lukas 17:26) A Jesus a dimlak losaod er a klou el telemall el mo er ngii, e ngbai milsaod el kirel a blekerdelel a klengar er a rechad. (Monguiu er a Matteus 24:37-​39.) A ruumesingd el chad er a taem er a Noah a dimlak el semeriar er a Dios, me a ka ble el sorir el mo odeuir a rengul. Me ngngera milengesang er tir? Ngdiak el klou el tekoi a milengesang er tir e ngbai tekoi el doruul er a bek el sils el ua blengur me a omelim me a chebechiil. Me a omerellel aika el tekoi a lmuut el mle klou a ultutelel er tir er a lorrenges er a klemechel a Dios. Me a Jesus a millekoi el kirir el kmo ng “dimlak lolechesiu” a tekoi el mochu er ngii.

5. Ngera mo ngosukid el rurtii tia el klaidesachel?

⁵ Kid a di ua Noah me a telungalek er ngii el betok a doruul er a bek el sils. Ngkired el mengereker e omekerreu er kid me a ongalek er kid. E tiang a sebechel el ousbech er a klou el temed me a klisiched me aike el ngar er ngii er kid. E sebechel el mo suebek a rengud er aike el dousbech er a bek el sils el ileakl er a taem el meringel a keizai er a beluu. Kid el mla tuib a rengud el Kristiano a dirrek el ngar er ngii a ngerecheled el mo er a Dios. Kede oldingel a obliil, e mengetmokl er kid e mo er a bek el miting er a Rekristiano, e melisiich er a deleuill er kid me a Jehovah el oeak a omesubed el di kid el tang me a omengull el telungalek. Me alta ngmle betok a lurruul a Noah el mesiou er a Dios, e ngdi ng “riruul a rokui el tekoi.” (Genesis 6:22) Nguaisei, a dongeroid er kid er a ngii di el tekoi el sebechel el mo omekberaod er kid a klou a ultutelel me bo el sebeched el rurtii a klaidesachel el mo er a klengar.

6, 7. Ngkired el melatk er a ngera el ulekrael er a Jesus?

⁶ Me ngngera mle belkul a tekingel a Paulus er a ledu el kmo “bedobed a bek el berraod”? Nguaisei, ngdiak el sebeched el chemoit a rokui el  ngerecheled. Me ngungil a dolatk a tekingel a Jesus el kirel aika el tekoi el kmo: “Misei e lak mdu el kmo, ‘Ngera kede mo mengang?’ ma ‘Ngera kede mo melim?’ ma ‘Ngera kede mo oubail?’ me lsebek a rengmiu. A ikal rokui a lsal osiik ar Chisentail; e a Demmiu ra eanged a medengei el kmo a ikal rokui cho mousbech.” (Matteus 6:31, 32) Me a belkul a tekingel a Jesus a kmo aike el tekoi el dousbech er a bek el sils el ua kall me a bail a sebechel el omekberaod me a lechub e ngmelibas er kid a lsekum e ngmo meklou a ultutelel el tekoi er a klengar er kid.

⁷ Momtab a tekingel a Jesus el kmo: “A Demmiu ra eanged a medengei el kmo a ikal rokui cho mousbech.” Tia belkul a kmo a Demad er a eanged el Jehovah a mo oltaut a ngerechelel el omeskid aike el dousbech. Nguaisei, “a ikal rokui” a sebechel el mo ngodech er aike el tekoi el soad. Kede muklatk el diak bo el sebek a rengud er “a ikal rokui a lsal osiik ar Chisentail.” E ngera uchul? A Jesus er a uriul a ulemeklatk er a rulerrenges er ngii el kmo: “Mkekerengemiu ma rengmiu lak bo loberaod er chomelechemakl, ma cheltelaol ra rrom, ma ulekerreu er tial klengar, me lak dilemereched el mer kemiu sel sils el ua bedikl el omdechem er kemiu.”​—Lukas 21:34.

8. Ngera uchul me chelechang e ngsel taem el “de bedobed a bek el beraod”?

⁸ Ngkmal kmedang a ulebengelel tia el klaidesachel. Me ngmo uchul a klengiterreng a lsekum kede omekberaod er kid er a diak a ultutelel el berraod el sebechel el mengitechut er kid er chelecha lolekedang a ulebongel! Me nguchul a llomeserreng a ulekrael er a apostol el Paulus el kmo: “Ngdi le ngarngii a meluu ra Dios e lak a ngesonges ra rengul, e ngkloul klungiaol.” (1 Timoteus 6:6) Me a desichedekl a tekingel a Paulus er a chelsel a rengud, e ngmo ngosukid el rurtii tia el klaidesachel e mo nguu a nguked.

“Klengit el Omereked er Ngii er Kid”

9, 10. (a) Sel tekoi el “klengit el omereked er ngii er kid” ngmelutk el kirel a ngerang? (b) Ngera sebechel el duubech el mo er a klaumerang er a Kristiano?

⁹ Ngobengkel a “bek el berraod,” e a Paulus a dirrek el milsaod el kirel a dongeroid er kid er a “klengit el omereked er ngii er kid.” Ngera tia el klengit? A tekoi er a Grik el mloiuid el kmo “omereked” a debetik er ngii er a Biblia el di ta el taem el ngar tia el bades. A ta el mellomes a rengul el chad el Albert Barnes a millekoi el kmo a chad er a rurt a kmal mo kerekikl me ngdiak a bail el sebechel el melebelii a ochil me bo el meringel er ngii el remurt. Me nguaisei, a Kristiano a diak el bechei a ngii di el ngerang me lerellii el mo meringel er ngii el rurtii tia el klaidesachel. Me ngmekerang a Kristiano e mo mechitechut a klaumerang er ngii?

¹⁰ A Kristiano a diak loridii a klaumerang er ngii er a chelsel a di ta el sils. Ngsebechel el diak lolechesuar e mekekokil el oridii a klaumerang er ngii. Ngar er a uchelel a babilengel, e a Paulus a ulemeklatk el kirel a kdekudel el blekeradel el “oberius el mo cheroid” me a dirrek el “mekngit el diak loumera el [rengul a chad].” (Hebru 2:1; 3:12) Me a chad er a rurt a lsekum e ngobelebel a ochil er a bilel, e ngulterekokl el moubuu. E tiang a klou a techellel el duubech a lsekum a chad er a rurt a diak el kerekikl er a bilel sel lerurt. Ngera sebechel rullii me ngdiak el kerekikl? Ngsebechel el mo omdasu el kmo ngkmal meduch el remurt me ngdiak bo lubuu me a lechub e ngmo er ngii a tekoi el mengesang er a osengel. Me ngngera klubeled el denguu er tia el ulekrael er a Paulus?

11. Ngera sebechel el rullid me doridii a klaumerang er kid?

¹¹ Ngkired el mo medengei el kmo kede oridii a klaumerang er kid el oeak a tekoi el doruul er a klteketel a taem. Me a losaod el kirel a “klengit el omereked er ngii er kid,” e a ta er a mellomes a rengul el chad a millekoi el kmo a blekeradel el dechelebangel me a rechad el dobengterir me a mekngit el urunguled a rokui el ngar er ngii a klisichel el mengesuseu er kid. Aikang a sebechel el mengitechut er a klaumerang er kid me a lechub e ngrullid me kede oridii.​—Matteus 13:3-9.

12. Ngera el uleklatk a kired el sichedekl er a rengud me lak doridii a klaumerang er kid?

¹² Ngar er a chelsel aika el betok el rak, e a blak a rengul e mellomes a rengul el mesiou a mle blechoel el omeklatk er kid el mo kerekikl er a tekoi el domes me a tekoi el dorrenges, el ike el tekoi el  dolecha er a rengud me a uldesued. Kede mla muklatk el kirel a skel a udoud me a kerruul. Ngsebeched el mo mechesang er aika el betok el rolel a ongelaod me a betok el beches el klekedall er tia el beluulechad. Me ngsebechel el mo uchul a telemelled a domdasu el kmo a chouaika el uleklatk a kmal meringel me a lechub e ngkuk di melutk el kirir a rebebil, el diak el lolutk el kired. A blekeradel el diak el bleketakl me a blulak a di bebil er a tekoi el lousbech a beluulechad er a Satan el omedikl er kid. A rebebil a oriid a klaumerang er tir e le ngmlo diak el kerekikl, e mlo kedidai a rengrir me a lechub e te mlo mechesang er a tekoi er a beluulechad. Aika el tekoi a ledubech el mei er kid, e ngsebechel el mo uchul e kede oridii a nguked er a diak a ulebengelel el klengar.​—1 Johanes 2:15-​17.

13. Ngmekerang a domekerreu er kid er a omengesuseu er tia el beluulechad?

¹³ A bek el sils, e kede orrenges er a rechad el melisiich a turrekong me a meklou a ultutelel el tekoi me a uldasu er tia el beluulechad el dekiei er ngii. (Monguiu er a Efesus 2:1, 2.) Me tia di mo ultuil er kid el kmo kede mo mechei aika el tekoi me ngomekrael aike el doruul me a lechub e ngdiak. A “milidiul” el lulsaod er ngii a Paulus a sebechel el mo uchul a kodelled. Me ngkmal kired el blechoel el di kerekikl me ngdiak bo el mechitechut a rengud me lak derekir tia el klaidesachel. Ngera mo ngosukid el melemolem el ngar tia el klaidesachel? A Jesus a kot el ungil el kerebai er a chad el rirekir a klaidesachel. (Hebru 12:2) Ngdirrek el ngar er ngii a kerebai er a Paulus, el ngii a ulemasech er ngii el ta er tirke el remurt el ngar tia el klaidesachel er a Rekristiano e milengelechel er a rekldemel er a klaumerang el mo oukerebai er ngii.​—1 Korinth 11:1; Filipi 3:14.

Rolel a ‘Omnguu’ a Nguked

14. Ngmle ua ngerang a osengel a Paulus el kirel tia el klaidesachel?

¹⁴ Ngmle ua ngerang a osengel a Paulus el kirel tia el klaidesachel? Ngar er a ulebongel el cheldechedechal el mo er a remechuodel er a Efesus, e ngdilu el kmo: “Ngdi ngak a rukui chomerolek ma ngerechelek el kngiluu ra Rubak el Jesus.” (Rellir 20:24) Ngkilengei el melenget a rokui er ngii, el uldimukl er a klengar er ngii, me bo el sebechel el rurtii tia el klaidesachel. El kirel a Paulus, e a blakerreng er ngii me a meringel el  urerel el kirel a ungil el chais a di mo diak a ultutelel a lsekum e ngdiak el rekir tia el klaidesachel. Me nguaisei, engdi ngdimlak lomdasu er seikid el taem el kmo ngulterekokl el mo rurtii tia el klaidesachel. (Monguiu er a Filipi 3:12, 13.) Engdi sera lolekedang a ulebengelel a klengar er ngii, e ngmle ulterekokl a rengul el melekoi el kmo: “Ak mla okoad ra ungil klakoad, e rurtii a telkael el kirek el remurt er ngii, el milekedeldar a kloumerang.”​—2 Timoteus 4:7.

15. A Paulus ngmilsterir a rekldemel er a rurt a ngera el omelisiich?

¹⁵ A Paulus a dirrek el mle mesisiich a urungulel el meseterir a rekldemel el Kristiano el rurtii tia el klaidesachel. El ua tiang, ngmilengelechel er a Rekristiano er a Filipi el mo meringel el oureor el kirel a osebelir. Ngmle kirir el “mo misisiich loreked a Tekoi ra klengar.” E lilemelemii a tekingel el kmo: “Me lak bo lak a blkul a ikel krirurt er ngii ma rngelel a urerek, me sel sils ra Kristus e bo le chetengek.” (Filipi 2:16) Me ngmilengelechel er a Rekristiano er a Korinth el kmo: “Me kemiu bo mrurt el melai ra nguked.”​—1 Korinth 9:24.

16. Ngera me ngkirel el mo bleketakl a osenged er a turrekong me a lechub a nguked el bo dolai er ngii?

¹⁶ Ngar er a kemanget el klaidesachel, el ua marasong, e sel ulebengelel a rurt a diak el sebeched el mesang. Nguaisei, engdi a chad el remurt a kirel el di ultaut a osengel er a ulebengelel tia el rurt. E a lolekedang a ulebengelel a rurt e ngmengal mo bleketakl a osengel er a turrekong er ngii. Me a klaidesachel el lengar er ngii a Rekristiano a dirrek el uaisei. A turrekong, me a lechub a nguked, a kirel el mo mera el tekoi er a rengud. E tiang a mo ngosukid el mo nguu a nguked.

17. Ngmekerang a klaumerang e ngosuir a chad el mo ultaut a osengel er a nguked?

¹⁷ A Paulus a milluches el kmo: “A kloumerang a sel bo dulterekokl oumera ikel tekoi el dolatk, e mo ulterekokl medenge ikel tekoi el diak le meues.” (Hebru 11:1) A Abraham me a Sara a kilengei el mecherei a ungil el delengcheklir e mo kiei el “chad ra ngodech el beluu el ngar chomerael e ultechakl er tial belulechad.” Ngera ngilsuterir el meruul el uaisei? “Te di ulemes [a otutel a telbilel a Dios] er cheroid.” A Moses a ultngeklii a “tedeb el deourreng ra klengit” me a “mekreos el klalo ra Egipten.” Ngmilekerang e mla er ngii a klaumerang er ngii me a klisichel el meruul el uaisei? A Moses a “mle ultaut a medal er chomeksaul.” (Hebru 11:8-​13, 24-​26) Sei a uchul me a Paulus a ulemuchel a omesodel el kirel a derta er tirka el chad el ousbech a tekoi el kmo a “kloumera uchul.” A klaumerang a ngilsuterir el omes el engelakl er a omelsemai me a ringel el ble lechelebangel, e lomes el bedul aike el bo loruul a Dios el kirir er seikid el taem me a ngar mederir el taem.

18. Ngera el ungil el tekoi a sebeched el meruul el ngosukid el mo cheroid er a “klengit el omereked er ngii er kid”?

¹⁸ Me a dolebedebek er a klaumerang er tirke el sechal me a redil el medung er a babier er a Hebru er a 11 el bliongel e doukerebai er tir, e ngsebechel el melisiich er a klaumerang er kid e ngosukid el mo cheroid er a “klengit el omereked er ngii er kid.” (Hebru 12:1) Ngdirrek el sebeched el “kasisiich el omekses a bltikerreng ma ungil lomeruul” sel bo dekldibel kid me a rechad el dirrek el sorir el melisiich er a klaumerang er tir.​—Hebru 10:24.

19. Ngua ngera uldesuem el kirel a di lultaut a osenged er a nguked?

¹⁹ Kede kmedang er a ulebengelel tia el klaidesachel er kid el mla mo sebeched el mesang er a medad. Ngoeak a klaumerang me a ngelsuil a Jehovah, e ngdirrek el sebeched el ‘medobed a bek el berraod, ma klengit el omereked er ngii er kid.’ Nguaisei, ngsebeched el melemolem el remurt e mo nguu a nguked, el ike el klengeltengat el letilib a Demad e Dios er kid, el Jehovah.

[Footnote]

Ke Dirk Melatk?

• Ngera usbechall me bo el sebeched el medobed a “bek el berraod”?

• Ngera sebechel el mo uchul e a Kristiano a oridii a klaumerang er ngii?

• Ngera me ngkirel el di ultaut a medad er a nguked?

[Aike el Ker er a Suobel]

[Siasing el ngar er a 26 el llel]

Ngerang a “klengit el omereked er ngii er kid,” e mekerang a longitechut er kid?