Jesus​—Ngmla er Ker el Mei?

“[A Pilatus a ] liluut el mo soiseb ra blil a dui e dmu ra Jesus el kmo, ‘A mera er [ngii], ke mlarker el mei?’ E a Jesus a dimlak longer.”​—JOHANES 19:9.

A KABERNOR er a Rom el Pontius Pilatus a uleker er seikid el ker er sera el ngar er a medal a kerrekeriil a Jesus el kirel a klengar er ngii. A Pilatus a mle medengelii sel beluu er a Israel el ble lechad er ngii a Jesus. (Lukas 23:6, 7) Ngmle medengei el kmo a Jesus a kmal ileakl el chad. A Pilatus nguluumededenger er a klengar er a Jesus er a uchei? Me ngika el merreder el diak el oumerang er a Dios ngkilengei el mo oltirakl er a klemerang? A Jesus a di liluk el diak a ngera el lolekoi, me ngmocha bleketakl el kmo a Pilatus a ulemes er a deruchellel el kuk klou a ultutelel er a lolisiich er a klemerang me a llemalt.​—Matteus 27:11-​26.

Kede oba klou el omereng el saul e le tirke el kmal sorir el mo medengei el kmo a Jesus ngmla er ker el mei a sebechir el metik a nger er tir. A Biblia a bleketakl el olecholt el kmo a Jesus Kristus ngmla er ker el mei. Ka molatk aika el tekoi.

▪ Ngmlechell er ker A Jesus a milechell er a kmal chebuul el blekeradel er a Bethlehem el beluu er a Judea. A tekingel a Kaiser el Augustus el kmo lemengai a ulecherangel er a rechad er a beluulechad a uchul me a delal a Jesus, el Maria, “el dioll,” el obengkel a bechil el Josef, a mle kirir merael el mo er a Bethlehem, el belual ngii el Josef. Ngdimlak a delemerab el kirir a remerael er tia el beluu, me ngmle kirir tirka el obekel el mo kiei er a blil a charm, e a Jesus a mlechell er isei me te milekedusii er a chelsel a chongolel a charm.​—Lukas 2:1-7.

Betok el rak er a uchei, e a ulaoch er a Biblia ulechotii sel beluu el bo lemechell er ngii a Jesus el kmo: “Bethlehem el Efrata, kau a tar a kot el kekerei el beluu er a Juda. E ngdi kmo otebedii er kau a mo merreder er a Israel.” * (Mika 5:2) A Bethlehem a locha kmal mle kekerei me ngdimlak el lomasech er ngii el obengkel aike el beluu er a Juda. Engdi tia el kekerei el beluu a mo er ngii a ileakl el chetengakl el kirel e le ngike el meltib el Messias, me a lechub e ng Kristus, a mla er a Bethlehem el mei.​—Matteus 2:3-6; Johanes 7:40-​42.

▪ Ngmlukeroul er ker A telungalek er a Jesus a kiliei er a Ekipten el telkib el taem, e melukl el mo er a Nazareth, el ngii a mats er a Galilea el bekord el 60 mael a cherridel er a diluches er a Jerusalem. Seikid el taem, e a Jesus a dirkak el bo el edei a rekil. Ngar tia el klebokel el basio el rechad er a sers me a remengkar a sib me a rechad er a omenged a mle blak a rengrir er a urerir, e a Jesus a mlukeroul er a klou el telungalek, el dimlak a kmal ngera er tir.​—Matteus 13:55, 56.

Betok el rak er a uchei, e a Biblia a ulemlaoch el kmo a Messias a mo “chad ra Nazareth.” A Matteus a millekoi el kmo a telungalek er a Jesus a mlo kiei er a “mats el Nazareth a ngklel, el kirel me le motaut a tekoi el meldu loeak ar profet el kmo, ‘Ngmo okedongall el chad ra Nazareth.’ ” (Matteus 2:19-23) A ngakl el Nazarene a kmeed el osisiu  a belkul er a tekoi er a Hebru el mloiuid el “tiul.” A Matteus a millutk el kirel a ulochel a Isaia el omekedong er a Messias el beches el “tiul” sel kerrekar el melutk el kirel a klengelakel er a David, el belkul a kmo a Messias a mo ngar er a delongelir a ruldidellel a rsechel a King el David. (Isaia 11:1) Me nguaisei, a Jesus a uldidellel a rsechel a Jesse el oeak a David.​—Matteus 1:6, 16; Lukas 3:23, 31, 32.

▪ Ngulemuchel er ker a klengar er ngii A Biblia a olisechakl el kmo a klengar er a Jesus a ulemuchel er a betok el rak er a uchei er a lemechell er a blil a charm er a Bethlehem. A ulaoch er a Mika, el dulsaod er ngii er a uchei, a melemolem el kmo a uchelel a Jesus “a uldedelid el mor a kmal irechar.” (Mika 5:2) A Jesus a kot el mlechell el Ngelekel a Dios me ngmle anghel el ngar er a eanged er a uchei er a klengar er ngii er tia el beluulechad. A Jesus a di mle ngii el melekoi el kmo: “Ele ngak [a] mlara eanged el me metengel.” (Johanes 6:38; 8:23) Ngmlekerang e mo uaisei?

Me ngoeak sel oureor el klisichel, e a Jehovah el Dios a rirellii a mengasireng el tekoi el uliuelii a klengar er ngika el Ngelekel el loia er a chelsel a delel a ekebil el dil er a Judea el Maria a ngklel me bo el sebechel el mechell el cherrungel el chad. * Chouaitia el ongasireng el tekoi a sebechel ngike el Imong el Kedidai el Dios el kutmeklii. Me nguai aike el tekingel ngike el anghel el mo er a Maria el kmo, “ngdiak a tal tekoi el diak el lak el sebechel a Dios.”​—Lukas 1:30-​35, 37.

A Biblia a ouchais a lmuut el betok el tekoi, el diak di lekirel a kmo a Jesus ngmla er ker el mei e lemerekong. Aike el eua el Evangkelio el Matteus, Markus, Lukas me a Johanes a ouchais er kid a betok el kirel a kmo ngmle ua ngerang a blekerdelel a klengar er a Jesus.

[Aike el Footnote]