Jesus​—A Blekerdelel a Klengar er Ngii

“Sel kuruul a soal ngikel ulderchak e krekir a urerel, itiaikid a kelek.”​—JOHANES 4:34.

A BLEKERADEL el bla er a chelsel a Jesus e melekoi aike el tekoi a ouchais er kid a betok el kirel a klou a ultutelel el tekoi er a klengar er ngii. A Jesus me a redisaiplo er ngii a ulemuchel er a dirk tutau el mirrael er a kemanget el omerael er a delongelel a bukl el beluu er a Samaria. (Johanes 4:6) Me a redisaiplo a ullengit er a Jesus me lomengur e le te ulemdasu el kmo ngulterekokl el songerenger. (Johanes 4:31-​33) A nger er a Jesus a ulechotii a moktek er a klengar er ngii. A loruul a urerel a Dios a kuk mle klou a ultutelel er a blengur. Me ngoeak a tekingel me a omerellel, e a Jesus a uleltaut aike el tekoi el mle soal a Dios a bo loruul. Me tiang nguldimukl er a ngerang?

▪ Omerk e olisechakl el kirel a Rengedel a Dios A Biblia a mesaod el kirel a urerel a Jesus el kmo: “Ma Jesus a merrael el meliuekl ra Galilea el rokir, el olisechakl . . . e omerk ra evangkelio ra rengedel a Dios.” (Matteus 4:23) A Jesus a dimlak di lomerk me a lechub e louchais el kirel a Rengedel a Dios e lemerekong. Ngdirrek el ullisechakl e mesaod e omeketakl er a belkul tia el Renged el mo er a rechad. A Renged a mle dai er a klemechel a Jesus.

Ngar er a chelsel a omesiungel, e a Jesus a ullisechakl er a rechad el kmo, ngngera Rengedel a Dios e ngerang a bo longetmokl. Momtab aika el klemerang el tekoi el kirel a Renged el lobengkel a llechukl el Bades el meskid a tekingel a Jesus el kirel aika el tekoi.

▪ A Rengedel a Dios a kabelment el ngar er a eanged, el Jesus a mla metutk er a Jehovah el mo King er ngii.​—MATTEUS 4:17; JOHANES 18:36.

▪ A Renged a mo mengedaol er a ngklel a Dios e mo rullii a uldesuel a Dios me lemeketmokl er a chutem el ua omerellel er a eanged.​—MATTEUS 6:9, 10.

▪ Ngar cheungel a omengederederel a Rengedel a Dios, e a chutem el rokir a mo obult el mo paradis.​—LUKAS 23:42, 43.

▪ Ngdi kmedung e a Rengedel a Dios a mei el mo oltaut er a uldesuel a Dios el kirel tia el chutem. *​—MATTEUS 24:3, 7-​12.

▪ Meruul a mengasireng el tekoi A Jesus a ble lodengelii el “Sensei.” (Johanes 13:13) Me nguaisei, ngar er a chelsel a omesiungel el edei el rak me a tedobech e ngdirrek el mirruul a mengasireng el tekoi. Me aike el lurruul a mla er ngii a eru el moktek er ngii. A kot, aike el lurruul a ulechotii el kmo ngmera el mlodurech er a Dios. (Matteus 11:2-6) Me a ongerung, e ngolecholt aike el lmuut el meklou el tekoi el bo loruul sel bo el King er a Rengedel a Dios er a ngar medad el taem. Momtab a bebil er a mengasireng el tekoi el lurruul.

▪ Ngmle sebechel el ollakl a meringel el daob me a meses el eolt.​—MARKUS 4:39-​41.

▪ Ngulemekungil er a resmecher el chad el uldimukl er tir a remeiko me a remechad me a rechitechut.​—LUKAS 7:21, 22.

▪ Ngmle sebechel el omdois a ildisel a kall me bo el sebechel el omeka er a seked.​—MATTEUS 14:17-​21; 15:34-​38.

▪ A kesengil e ngedei el taem, e ngulelluut a klengar er a rulekoad.​—LUKAS 7:11-​15; 8:41-​55; JOHANES 11:38-​44.

Ka di molebedebek er a klungiolel a klengar er tia el chutem el ngar cheungel a omengederederel choua ngika el mesisiich el King!

 ▪ Ngulechotii a blekerdelel a Jehovah el Dios Ngdiak a ngodech el chad el sebechel e dirrek el kirel el olisechakl er a rebebil el kirel a Jehovah, el ua Ngelekel, el ngii a mlo Jesus Kristus. A Jesus el “ulemuchel el mechell loeak uchei ra rokuil bleob” a uchul me ngkiliei el obengkel a Jehovah el ngar er a eanged el kuk meketeket er a rokui el anghel er a Dios. (Kolose 1:15) Ka di molatk aike el betok el techall el lullab el mle sebechel el mo medengei a uldesuel a Demal e suubii a soal me aike el llechul me a dirrek el rolel.

A Jesus a mle sebechel el melekoi el kmo: “E diak a chad el medengelii a Ngalek el kmo ngtechang, ngdi Chedam a medengelii, ma diak a chad el medengelii a Chedam el kmo ngtechang, ngdi Ngalek me ngikel le ngileltii a Ngalek el lomeketakl ra Chedam er ngii, a medengelii.” (Lukas 10:22) Me sera lengar tia el chutem el ua chad, e a Jesus a kilengei e dirrek el mle semeriar el olecholt el kmo ngmle ua ngera el chad a Demal. A Jesus a uleba ileakl el klemedengei er a longedecheduch me a lolisechakl e le ngmle sebechel el melebedebek aike el tekoi el blo lodengei er a lengar er a eanged el mla er bita er ngike el Kot el Ngarbab el Dios.​—Johanes 8:28.

Me sera lengar er a chutem a Jesus, e aike el tekoi el siluub el kirel a Demal er a lengar er a eanged, a lullisechakl el mo er a rechad er a beluulechad me bo el sebechir el omtab me bo lebeot er tir el oltirakl.

Ka molatk a eru el meklou a ultutelel el tekoi el luluusbech a Jesus el olecholt er a Demal.

▪ Ngoeak a osisecheklel e a Jesus a ullecholt a klemerang el tekoi el kirel a Jehovah, el uldimukl er a ngklel me a moktek er ngii me aike el rolel.​—JOHANES 3:16; 17:6, 26.

▪ Ngoeak a omerellel e a Jesus a mle sebechel el olecholt a betok el ungil el blekerdelel a Jehovah. A Jesus a kmal mle cherrungel el olecholt a blekerdelel a Demal me ngmle sebechel el melekoi el kmo: ‘A lsekum e ngsoam el mo medengelii a Demak, e ngkirem el omes er ngak.’​—JOHANES 5:19; 14:9.

Ngmera el mechas a rengud er a blekerdelel a klengar er a Jesus. Ngsebeched el ngmai a betok el klungioled a lsekum e kede merriter a uchul me ngmlad e mo oltirakl aike el tekoi el bla desuub el kirel.

[Footnote]